Inzego zishinzwe umutekano za Kenya zafunze imihanda mikuru yerekeza hagati mu murwa mukuru Nairobi, kubera imyigaragambyo iteganyijwe.
Ibikorwa byinshi muri uyu mujyi urangwamo ubucuruzi bunini birafunze, mu gihe abashinzwe umutekano ari benshi ku mihanda.
Amashuri na yo yategetse abanyeshuri kuguma mu rugo uyu munsi.
Abantu amagana bazinduka cyane bagana mu mujyi bahejejwe kuri za bariyeri zinjira muri Nairobi bageze nibura muri 10km uvuye rwagati muri Nairobi. Imodoka nke ni zo zemerewe gukomeza.
Mu mujyi hagati, imihanda yerekeza ku hantu h’ingenzi kuri leta – nko ku rugo rwa perezida, ku biro bye, ku nteko ishingamategeko – irafunze kandi iriho za senyenge zibuza umuntu wese gutambuka.
Mu itangazo ry’igipolisi ku cyumweru nijoro, polisi yavuze ko ari inshingano zayo kurengera ubuzima n’ibikorwa mu kuzana ituze rusange.
Polisi ya Kenya kandi yabeshyuje itangazo ryayitiriwe ryakwirakwiriye ku mbuga nkoranyambaga rivuga ko mu bantu yataye muri yombi mu myigaragambyo iheruka harimo Abarundi n’Abanyarwanda babarirwa muri za mirongo. Yavuze ko iryo tangazo ari “fake”.
Imyigaragambyo yo kuri uyu wa mbere isanzwe yitwa Saba Saba (biva mu Giswahili bivuze tariki 7 z’ukwa karindwi), ubusanzwe yizihiza guhirimbanira demokarasi y’amashyaka menshi kwabaye mu myaka ya 1990 muri Kenya.
Iyi myigaragambyo ubu yateguwe n’urubyiruko ruzwi nk’aba Gen-Z bamagana imiyoborere y’ubutegetsi buriho, n’ubutabera ku bishwe na polisi mu ruhererekane rw’imyigaragambyo yatangiye umwaka ushize.
Mu myigaragambyo iheruka mu gihugu hose tariki 25 z’ukwezi gushize kwa Kamena, abantu nibura 19 barishwe, inzu z’ubucuruzi zibarirwa mu bihumbi zirasahurwa izindi zirangizwa.
@REBERO.RW
About The Author
