Ikipe ya Manchester United iri mu biganiro bikomeye bigamije gufata icyemezo ku hazaza k’umutoza wayo Michael Carrick, nyuma yo gutsindwa na Bournemouth ibitego 3-0 mu mukino wa Premier League wabereye kuri Old Trafford ku Cyumweru.
Amakuru atangazwa n’ibinyamakuru byo mu Bwongereza avuga ko abayobozi bakuru ba Manchester United bahuriye ku kibuga cy’imyitozo cya Carrington kuri uyu wa Mbere, tariki ya 26 Ukwakira 2026, kugira ngo barebere hamwe uko ikipe imeze n’icyakorwa ku bijyanye n’umutoza wayo.
Umuyobozi mukuru wa Manchester United, Omar Berrada, n’umuyobozi ushinzwe ibikorwa by’umupira w’amaguru, Jason Wilcox, bageze i Carrington mu gihe Carrick n’abakinnyi bari bafite umunsi w’ikiruhuko wari warateganyijwe mbere.
Biteganyijwe ko abo bayobozi bagirana ibiganiro n’abafatanyabikorwa bakuru b’iyi kipe, barimo Joel na Avram Glazer, ndetse na Sir Jim Ratcliffe, ufite imigabane muri Manchester United, kugira ngo hafatwe icyemezo ku hazaza ha Carrick no kureba abashobora kumusimbura mu gihe yakwirukanwa.
Eddie Howe na Julian Nagelsmann mu bashobora kumusimbura
Mu batoza bavugwa nk’abashobora guhabwa inshingano zo gutoza Manchester United harimo Eddie Howe na Julian Nagelsmann, bombi bivugwa ko bashobora kubona akazi ako kanya.
Ibi bije mu gihe umusaruro wa Manchester United ukomeje kuba mubi, aho yatsinzwe imikino itandatu mu mikino 12 imaze gukina muri uyu mwaka w’imikino, nk’uko amakuru yatanzwe abivuga.
Carrick yari yarafashije iyi kipe kubona itike yo gukina UEFA Champions League, bituma ahabwa amasezerano y’imyaka ibiri muri Gicurasi. Ubu asigaranye amezi 18 kuri ayo masezerano.
Gusa, gutsindwa na Bournemouth ibitego 3-0 byongereye igitutu kuri uyu mutoza, cyane ko iyi kipe yari imaze no gusezererwa muri Carabao Cup itsinzwe na Brighton.
Manchester United ntizongera gukina kugeza ku wa Gatandatu, ubwo izaba yasuye Chelsea kuri Stamford Bridge, bikayiha icyumweru cyo kwisuganya no gukemura ibibazo biri muri iyi kipe.
Carrick yemera ko ashinzwe umusaruro mubi
Nyuma yo gutsindwa na Bournemouth, Carrick yagaragaye afite agahinda kenshi, ndetse hari abakekaga ko amagambo n’imyitwarire ye imbere y’abafana byashoboraga kuba ari uburyo bwo kubasezeraho. Icyakora, nyuma yaje kuvuga ko atari cyo yashakaga gukora.
Uyu mutoza yavuze ko atari yakaganiriye n’abayobozi ba Manchester United ku hazaza he mu buryo burambuye, nubwo yemeye ko ikibazo cy’umusaruro mubi cyari gikomeye.
Yagize ati: “Ndumva neza uko ibintu bihagaze. Nta cyemezo runaka ntegereje. Ndakomeza gukora nk’ibisanzwe. Nkunda iyi kipe kandi nzakomeza gukora ibyo mbona ko ari byiza kuri yo, uko icyemezo kizaba kimeze kose.”
Yakomeje agira ati: “Ni ibintu bikomeye, kandi nta cyo kubihisha. Uko bizagenda n’ibizakurikiraho simbizi neza. Nkunda akazi kanjye kandi numva inshingano mfite. Tugomba gutegereza tukareba.”
Carrick yemeye ko ari we ugomba kubazwa umusaruro ikipe iri kubona, avuga ko yakoze ibishoboka byose kugira ngo atagera muri ibi bihe, ariko ko hari impamvu zitandukanye zatumye atabasha kubikumira.
Yagize ati: “Ndemera ko nshinzwe ibyabaye. Nzi neza inshingano mfite muri uyu mwanya. Twagerageje gukora ibishoboka byose kugira ngo tutagera aha, ariko ku mpamvu zitandukanye ntitwashoboye kubihagarika.”
Abakinnyi na bo bababajwe n’ibihe ikipe irimo
Carrick yavuze ko bibabaje kubona Manchester United, ikipe amaze igihe kinini akorera, inyura mu bihe bibi nk’ibi.
Yagaragaje ko abakinnyi na bo bababajwe n’umusaruro mubi, ashimangira ko atari uko batita ku ikipe cyangwa batifuza gutsinda.
Yagize ati: “Ndabibabazwa cyane kuko maze igihe kinini muri iyi kipe. Ibihe turimo birakomeye. Ntabwo twabonye umusaruro n’imikinire biri ku rwego rukwiye.”
Yakomeje avuga ko abakinnyi benshi bababaye nyuma yo gutsindwa, kandi ko ibyo bibagiraho ingaruka zikomeye mu rwambariro.
Ubu amaso yose arekereje ku cyemezo abayobozi ba Manchester United bazafata ku hazaza ha Michael Carrick, mu gihe iyi kipe ikomeje gushaka uko yakongera kubona umusaruro mwiza no guha abafana icyizere.
Ese Carrick azahabwa andi mahirwe yo guhindura ibintu, cyangwa Manchester United izahitamo kumusimbuza undi mutoza? Ni ikibazo gishobora gusubizwa n’ibiganiro biri kubera mu buyobozi bw’iyi kipe.
@Rebero.rw
About The Author
