Rusizi: EAR/Cyato yahaye impamyabushobozi abanyeshuri 68 inoroza abarimo urubyiruko isanzwe yitaho

Itorero EAR/Cyato rikorera mu Murenge wa Nyakarenzo,Akarere ka Rusizi, mu mushinga waryo RW0750 EAR/ Cyato,uterwa inkunga na Compassion International, ryahaye impamyabushobozi abanyeshuri 68 barangije amasomo y’igihe gito mu myuga y’ubudozi, gusudira,ububoshyi, gutunganya imisatsi n’ubwiza no kuboha inkweto rinoroza ihene n’inkoko abarimo urubyiruko uyu mushinga usanzwe ukurikirana.

Umuyobozi w’iyi paruwasi Rev. Nsengiyumva Félicien, yahamirije Rebero.rw ko aba barangije aya masomo bayize neza mu gihe cy’umwaka wose, yizera adashidikanya ireme ry’uburezi batahanye, rinigaragariza ko muri bo hari abatangiye gukora ku ifaranga, ryatangiye guhindurira ubuzima.

Ati’’ Ntidushidikanya ku ireme ry’uburezi bahakuye kuko twakurikiranye imyigire yabo. Ababigishije ni inararibonye zibizobereyemo. Kubyaza umusaruro ubumenyi bafite, n’ubushake mbabonana ntibishidikanywaho.’’

Rev. Nsengiyumva Felicien, Umuyobozi wa EAR paruwasi ya Cyato ahamya ko ubumenyi bahakuye buzabahindurira ubuzima nta shiti.

Yakomeje ati’’ Tubatezeho impinduka mu mibereho yabo n’imiryango yabo, cyane ko tuzakomeza kubaba hafi,haba mu kubagira inama z’uburyo babona ibikoresho bigezweho bakoresha iyo mirimo, uburyo amafaranga babonyemo yababera koko isoko y’iterambere, n’ibindi ku bufatanye n’izindi nzego zirimo ubuyobozi bw’Umurenge wacu n’itorero ryacu.’’

Ku borojwe,yagize ati’’  Dufite abana bo mu mushinga bafite imyaka 12 kuzamura,batangiye kubyiruka. Turashaka kubatoza gukora hakiri kare bahereye ku bworozi ni yo mpamvu bari mu bo tworoje. Twanoroje amatsinda abumbiyemo ababyeyi b’aba bana kugira ngo bakomeze urugamba rwo kwigobotora ingoyi y’ubukene. Abahawe ihene ni 49, tunaha izindi 28 amatsinda 2, tunoroza inkoko 150 abana 75,zose twizera ko zizunguka bakanoroza abandi.’’

Mu kiganiro abasoje amasomo  bahawe na Ven. Kanoni Ndagijimana Ephraim,kirimo n’ijambo ry’Imana, yababwiye ko aya mahirwe ari nk’amatalanto bahawe. Buri wese italanto  ahawe agasabwa kuyibyaza umusaruro ufatika, ntayirambike.

Ven. Kanoni Ndagijimana Ephraim yibukije abarangije kwiga ko aya ari amatalanto bahawe batagomba kurambika

Ati’’ Mubyaze umusaruro ufatika ibyo mwize,muhindure imibereho.Aya ni amatalanto muhawe. Ntimuyarambike. Muyabyaze andi, ni ko gaciro kanyu.’’

Umuhuzabikorwa w’imishinga iterwa inkunga na Compassion International,ukurikirana uyu mushinga, Uwizeye Germain, yababwiye ko byaba bibabaje cyane baramutse baratakajweho igihe,imbaraga  n’amafaranga menshi ngo babone ubwo bumenyi, ugasanga ntacyo bwabahinduyeho.

Ati’’ Kumenya umwuga ni intangiriro y’ubukire. Byaba bibabaje cyane,kubona waba warize umwuga nk’uyu,ejo tugasanga imibereho yawe ntaho itaniye n’abatarawize. Amafaranga,igihe n’imbaraga watanzweho byaba byarapfuye ubusa. Turabifuriza gukira,urwo rugendo tuzarugendana.’’

 Umuhuzabikorwa w’imishinga iterwa inkunga na Compassion international ukurikirana uyu mushinga, Uwizeye Germain avuga ko byaba bibabaje abize badahinduriwe ubuzima n’ibyo bize,bagakomeza kumera uko bari bameze mbere yo kwiga

Umunyamabanga wihariye wa Musenyeri wa EAR Diyoseze ya Cyangugu, unashinzwe ibikorwa remezo muri iyi Diyoseze, Bavugayabo Faustin, ashimira paruwasi ya Cyato yabereye umugisha abaturage b’aho ikorera.

Impanuro nk’izi banazihawe n’ umunyamabanga wihariye wa Musenyeri wa EAR/Diyoseze ya Cyangugu Muhutu Nathan, akaba anashinzwe ibikorwa remezo muri iyi Diyoseze, Bavugayabo Faustin,  wabanje gushimira  abayobora iyi mishinga iterwa inkunga na Compassion International uburyo ihindura bifatika imibereho y’abaturage, anashimira ubuyobozi bw’amatorero ya gikirisito iyi mishinga ikoreramo bushyiraho ibikorwa remezo bituma imishinga basaba yemerwa kuko umushinga utagera aho udasanga ibyo bikorwa remezo.

Yibukije ko inshingano z’amatorero ya gikirisito ari ukumenyesha abantu Imana no kubera umugisha aho akorera.

Abarimo abana b’imyaka 12 kuzamura borojwe ihene

Ati’’ Turashima Imana cyane ko iyi paruwasi ya Cyato yabereye umugisha aho ikorera. Turasaba buri wese ugerwaho n’uwo mugisha kuwubyaza umusaruro. Mukoreshe ubumenyi neza mu buryo bwo kubaha Imana n’ubunyangamugayo. Ni ho buzarushaho kubagirira akamaro,abantu bose babagirire icyizere,mubone amasoko,mubere abandi umugisha.’’

Mukaniyonsaba Olive w’imyaka 35,ufite abana 3 arera wenyine kuko umugabo we yitabye Imana, avuga ko yarangije ayisumbuye muri 2012, akamara imyaka myinshi nta kazi, atangiye gukora ku ifaranga rifatika aho yigiye umwuga wo gutunganya imisatsi.

Ati’’ Maze amezi 3 mbyaza umusaruro ubumenyi naherewe hano,mu gihe nari maze imyaka 13 ndangije ayisumbuye narabuze akazi. Ndashishikariza abarangije ayisumbuye bose badafite icyo bakora gifatika kongeraho umwuga kuko ari wo  wabakura mu bushomeri n’ubukene bukabije, ndi umuhamya wabyo.’’

Mukaniyonsaba Olive warangije ayisumbuye akamara imyaka 13 nta kazi abonye,avuga ko nyuma y’umwaka umwe gusa arangije kwiga gutunganya imisatsi yatangiye gukora ku ifaranga akesha ubu bumenyi

Yashimiye abagize uruhare bose ngo iyi ntambwe iterwe,yizeza ko  abahawe ubu bumenyi bose bugiye kubabera impamba ifatika y’ubuzima, asaba ubuyobozi bw’umurenge.ubw’itorero n’ubwa Compassion international gukomeza kubaba hafi cyane kuko inama zabo zigikenewe,urugamba rw’ubuzima ari bwo rutangiye.

Arabihurizaho na  Kwizera Théogène w’imyaka 19 wari waragarukiye mu wa 3 wisumbuye, ubusuderi yize akaba yaratangiye kubukuramo amafaranga yitezeho kumusubiza kurangiza ayisumbuye,akanakomerezaho n’ubundi  bumenyi.

Abana 75 bahawe inkoko basabwe kuzorora neza,bakazitaho umunsi ku wundi

Ati’’ Kwiga umwuga ntako bisa. Ndashimira mbere n ambere umukuru w’igihugu cyacu Paul Kgame urukundo akunda urubyiruko kuko nk’ibi hatabayeho imbaraga ze ntibyagerwaho.  Ndizera gukoresha aya mahirwe nkihindurira ubuzima nkanahindura ubw’umuryango wanjye. Nzabigeraho kuko ahari ubushake ubushobozi ntibubura.’’

Umushinga RW0750 EAR/Cyato, watangiye muri 2018.ubu wita ku bana 247 wiyemeje kugobotora ingoyi y’ubukene mu izina rya Yesu.

Umunyamabanga Nshingwabikorwa w’Umurenge wa Cyato, Dushimimana Baptiste,yashimiye iri torero na Compassion International ifasha ngo byose hano bigerweho, anasaba gukomeza uru rugamba ngo n’urubyiruko usanga mu bikorwa by’ubujura bukoresheje ikoranabuhanga rwiyise abameni n’abakuru babirimo babivemo, bakizwe, bige imyuga nk’iyi itanga icyizere cyiza cy’ubuzima.

Umunyamabanga Nshingwabikorwa w’Umurenge wa Nyakarenzo, Dushimimana Baptiste asaba urubyiruko rukiri mu bikorwa by’ubumeni kubivamo rukana imyuga ihesheje ishema n’agaciro

Ati’’ Munadufashe abari mu bumeni babuvemo,baze bige imyuga,bareke gukomeza kubangamira umutuzo n’umudendezo w’abandi baturage.’’

Yasabye itorero EAR gukomeza kwita kuri aba barangije aya masomo,bakabaherekeza neza,bakamenya uko bakoresha ubu bumenyi,imbogamizi bahura na zo n’uburyo zikemurwa kugira ngo n’abo basigaye babarebereho baze kwiga, bakoreshe ibyo bize bahindura ubuzima.

@Rebero.rw

About The Author