Rusizi: Abaturage 13 borojwe inka n’itorero UEBR umwaka ushize bazituriye bagenzi babo

Mu imurikabikorwa ryateguwe n’umushinga RW0450 UEBR/Gasumo ukorera mu tugari twa Rwambogo na Nyamihanda,Umurenge wa Butare,Akarere ka Rusizi, abaturage 13 bari barorojwe n’iri torero binyuze muri uyu mushinga uterwa inkunga na Compassion internatonal,kuri uyu wa gatanu tariki 28 Kanama,2026 boroje bagenzi babo.

Nk’uko Rebero. Rw yabitangarijwe n’umushumba w’iri torero, Past. Nshimiyimana Isaie, uretse izi nka, hanamuritswe ibyagezweho n’ abaturage uyu mushinga witaho bibateza imbere, birimo ibikomoka ku bworozi bw’inkoko ,ubuvumvu,ubudozi n’ububoshyi, abaturage 14 batishoboye bashyikirizwa inzu uyu mushinga wabubakiye,n’ibindi bikorwa birimo guha abana amata,nk’ikimenyetso cy’aho bageze mu kuyihazaho aturutse kuri izo nka.

Umushumba wa UEBR Gasumo, Past. Nshimiyimana Isaïe avuga ko umusaruro uva mu nka zitangwa ushimishije

Ati’’ Ibyagaragajwe bivuze impinduka zikomeye mu mibereho y’abaturage bacu zizakomeza,bigaragara ko abagejejweho ubufasha buhindura imibereho yabo“.

Kuri iki gikorwa cyo kuzituriranira, umuhuzabikorwa w’imishinga iterwa inkunga na Compassion international mu karere ka Rusizi,Uwintije Jean Damascène, washimiye aborojwe uburyo inka borojwe bazifashe neza cyane,kimwe  n’izizikomokaho. Yavuze ko uburyo bwo kuzitura bukorwa hano butamenyerewe ahandi, abona burushaho gutanga umusaruro ushimishije.

Ati’’ Bitandukanye n’uko bikorwa henshi, hano aborojwe inka uyu munsi barazitanga basigarane izazo,mu gihe ahandi aborojwe batanga izazikomotseho bagasigarana za nyina. Ni uburyo tubona butanga umusaruro cyane wo kugera kuri benshi vuba, kuko aborozwa baba bari mu matsinda, itsinda rigafasha uworojwe kuyikurikiranira hafi n’iyikomotseho,ari yo mpamvu mubona zishishe.’’

Umuhuzabikorwa w’imishinga iterwa inkunga na Compassion international mu Karere ka Rusizi, Uwintije Jean Damascène yasabye abahawe inka kuzifata neza zikazanagirira akamaro abandi

Yasabye abazihawe kuzifata neza kurushaho kugira ngo zikomeze kugera kuri benshi, cyane cyane ko akurikije uburyo izatanzwe mbere zimeze neza, nta yapfuyemo, bigaragara ko aka gace ari ak’ubworozi kuko amatungo ahatanzwe yose abaho,akaba ari amahirwe akomeye basa n’abisangije.

Yavuze ko kugeza ubu iyo bagiye gutanga amatungo mu mirenge myinshi y’aka karere bayakura mu ntara y’amajyepfo,bifuza ko mu myaka iri imbere yajya akurwa muri uyu Murenge ajyanwa ahandi,bakaba bagomba gushyiramo imbaraga nyinshi ngo izi mpinduka nziza zishoboke, amatungo bahabwa agere no mu batari mu mushinga.

Aborozanyije bose bagaragaje ibyishimo,bagaragaza ko inka ari umurunga ubahuza,abazituriwe bashimira  ababazituriye ko bazifashe neza, banaganuzanyije amata kuko bahawe izigikamwa.

Ndericyimpaye Alexianne ufite umugabo n’abana 7,wazituriye Kwitonda Jean ufite umugore n’abana 4, yashimiye itoreri UEBR ryamworoje.

Abana bahabwa amata

Ati’’ Yari yarangiriye akamaro cyane,nyikuraho ifumbire n’amata,inyana yayo nyifata neza kuko nari nzi ko ari yo nzasigarana. Nyitezeho umusaruro mwinshi cyane n’izizayikomokaho,uzampindurira ubuzima bigaragara ari yo mpamvu nshimira itorero UEBR ryanyoroje. Inyana nsigaranye ifite amezi 6, ndizera ko uyu mwaka uzarangira ari nziza cyane y’umushishe.’’

Kwitonda Jean Marie na we ati’’ Nyihawe ku mugaragaro uyu unzituriye yari yarayingejeho nanjye nyinywa amata. Narayibanguriye ubu irahaka vuba aha nzaba nyikuyeyo inyo norora nanjye nayizituye.  Impinduka mu buzima ntizabura kuko ukworoje aba akwifuriza gutunga no gutunganirwa kandi ni byo twifuza tunifuriza umugisha w’Imana abatworoje.’’

Umushumba mukuru wungirije w’itorero UEBR Ku rwego rw’igihugu,Rév.past. Ndayishimiye Augustin,yashimiye cyane ubuyobozi bukuru bw’igihugu burangajwe imbere na Perezida Kagame  ku mahirwe buha abanyarwanda bose arimo n’ubworozi nk’ubu binyuze muri gahunda ya girinka n’amatorero ageramo ikirenge.

Umushumba mukuru wungirije wa UEBR ku rwego rw’igihugu, Rév.past. Ndayishimiye Augustin yashimiye Compassion international itera inkunga ibikorwa byo kwita ku miryango itishoboye

Yasabye abazituriwe kuzibyaza umusaruro witezwe. Ati’’ Turabasaba kuzifata neza mugera ikirenge mu cy’ababazituriye bigaragara ko bazitayeho cyane. Bizarushaho kongera iterambere ryanyu,imiryango yanyu n’igihugu muri rusange kandi ni cyo tubifuriza.’’

Yashimiye cyane itorero UEBR/Gasumo uburyo rihindura imibereho  y’abatuye aka gace, anashimira Compassion international iyi nkunga ikomeye n’ubuyobozi bw’Akarere ka Rusizi ubufatanye mu iterambere,yizeza kubukomeza no gukomeza kububyaza umusaruro.

Mu myaka 6 uyu mushinga umaze muri utu tugari twa Rwambogo na Nyamihanda wahinduye bigaragara ubuzima bw’ ababyeyi n’abana babo witaho nk’uko bivugwa n’umuyobozi wawo Nyiranzabahimana Libérée,aho watangiranye abana 250. Ubu ufite abana 244 n’umubyeyi utwite.

Imiryango 60 yahawe amabati

Ati’’ Wakoze byinshi bitandukanye birimo imiryango 20 itaragiraga aho iba yabonye inzu,ihene 480, ingurube 479 n’inkoko 768 zorojwe abaturage, ibilo 2992 by’inyongeramusaruro,imbuto y’ibishyimbo n’ibigori ibilo 750, amatsinda 17 bakoze yo kwiteza imbere, ababyeyi bari mu miryango 56 bigishijwe kudoda n’abari mu miryango 28 bigishijwe kuboha.’’

Yarakomeje ati’’ Imiryango 37 yahawe igishoro cyo kwiteza imbere, 245 ihabwa ibikoresho by’ubuhinzi, 15 ihabwa imirama y’imboga n’ibirungo, n’ibindi byinshi bitarondorwa  byakozwe,birimo bihindura bifatika ubuzima bw’abaturage.’’

Umukozi w’Umurenge wa Butare ushinzwe imari n’ubutegetsi, Ishimwe Didier, yashimye ibi byose byakozwe n’ababikoze, yibutsa abaturage kurushaho gukora cyane,babyaza umusaruro mwinshi aya mahirwe yose agiye kwiyongeraho n’umuhanda wa kaburimbo Bugarama-Butare-Bweyeye ugiye gutangira kubakwa vuba.

Umukozi w’Umurenge wa Butare ushinzwe imari n’ubutegetsi, Ishimwe Didier ashimira UEBR na Compassion international bakora bihindura imibereho y’abaturage

Ati’’ Amahirwe aracyaza ni ahanyu kuyabyaza umusaruro ugaragara. Mu myaka mike iri imbere tugiye kubona umuhanda wa kaburimbo,uzadufasha kugeza umusaruro ku masoko ya kure. Mwongere umusaruro w’ubuhinzi,ubworozi,ubuvumvu,ubukorikori n’ibindi kuko bizakenerwa cyane. Nimubyaza umusaruro aya mahirwe yose mubona nta kabuza ubuzima bwanyu buzahinduka zifatika.’’

Umuyobozi w’umushinga RW 0450 UEBR Gasumo, Nyiranzabahimana Libérée agaragaza ibimaze kugera mu baturage byose bikozwe n’uwo mushinga

Bagaragaza ibyo bakora mu budozi, ubworozi bw’inkoko n’inzuki n’ububoshyi

@Rebero.rw

About The Author