Urwego rw’Igihugu rw’Ubugenzacyaha (RIB), ku bufatanye na Polisi y’u Rwanda, rwataye muri yombi abantu 11 bakekwaho kugira uruhare mu bikorwa byo kwiba no kwangiza ibikorwa remezo by’amashanyarazi, birimo insinga zingana na toni imwe n’igice (1.5), zifite agaciro k’amafaranga y’u Rwanda 20.750.000.
Aba bantu bafatiwe mu bikorwa byakorewe mu Turere twa Gasabo, Kicukiro, Nyarugenge, Kamonyi na Bugesera. Mu bakekwaho kugira uruhare muri ubu bujura harimo abiba insinga z’amashanyarazi mu mazu, abazitwara, abazigura bazi ko zibwe, abazikusanyiriza hamwe ndetse n’abazirangura.
RIB ivuga ko aba bantu bakurikiranyweho ibyaha bitatu birimo kurema umutwe w’abagizi ba nabi cyangwa kuwujyamo, kwangiza ibikorwa remezo cyangwa ibikoresho bitanga amashanyarazi, ndetse n’ubujura.
Amategeko ateganya iki kuri ibi byaha?
Itegeko Nº 68/2018 ryo ku wa 30 Kanama 2018 riteganya ibyaha n’ibihano muri rusange, nk’uko ryagiye rivugururwa, riteganya ko umuntu uhamijwe n’urukiko kugira uruhare mu bikorwa by’ubugizi bwa nabi cyangwa mu kwangiza ibikorwa remezo ashobora guhanishwa ibihano biteganywa n’iryo tegeko.
By’umwihariko:
- Kurema umutwe w’abagizi ba nabi cyangwa kuwujyamo: Ubu ni icyaha gishingiye ku guhuriza hamwe abantu bagamije gukora ibyaha. Abagihamijwe n’urukiko bahanishwa ibihano biteganywa n’amategeko.
- Kwangiza ibikorwa remezo by’amashanyarazi: Kwangiza insinga, ibikoresho cyangwa ibindi bikorwa remezo bitanga amashanyarazi ni icyaha gihanwa n’amategeko, bitewe n’uburemere bw’igikorwa n’ingaruka cyateje.
- Ubujura: Umuntu wese wiba umutungo w’undi, awutwara mu buryo bunyuranyije n’amategeko, ashobora gukurikiranwa no guhanwa n’amategeko. N’abagura cyangwa bakira ibintu bibwe, bazi inkomoko yabyo itemewe, bashobora kuryozwa uruhare rwabo mu cyaha hashingiwe ku bimenyetso.
Abafashwe ubu bafungiye kuri Sitasiyo za RIB za Kicukiro na Nyarugenge, mu gihe iperereza rikomeje kugira ngo hamenyekane uruhare rwa buri wese muri ibi bikorwa.
RIB iraburira kandi ikanihanangiriza abantu bose bagira uruhare mu kwangiza ibikorwa remezo by’igihugu, kubyirinda kuko bibangamira imibereho y’abaturage, bigahungabanya itangwa rya serivisi z’ibanze kandi bikadindiza iterambere ry’igihugu.
@Rebero.rw
About The Author
