Nyamasheke/Gihombo: Bigishijwe gukora ifumbire y’ikirundo yitezweho impinduka ku musaruro

Babifashijwemo n’ababibyi b’ibyiringiro bo mu itorero EMLR/ Conference ya Nyabinaga, abaturage b’Akagari ka Mubuga n’abanyeshuri ba GS Gitsimbwe, Umurenge wa Gihombo, Akarere ka Nyamasheke bigishijwe gukora ifumbire y’ikirundo yitezweho impinduka mu musaruro w’ubuhinzi.

Muri iki gikorwa cyayobowe n’umuyobozi wa gahunda y’ababibyi b’ibyiringiro mu itorero EMLR, Mukamudenge Rachel, Umuhuzabikorwa wayo muri Conference ya Nyabinaga, Tuyishime Abraham, yabwiye Rebero.rw ko iyi ari ifumbire nziza cyane, yoroshye gukorwa idasaba byinshi.

Avuga ko iyo uyikoresha amaze gutegura ibikoresho birimo ibiti byumye, ibyatsi byumye n’ibibisi,ivu,ifumbire ikomoka ku matungo, amazi n’amaganga no gutegura umurima ayikoreramo atangira kuyikora

Umuhuzabikorwa w’ababibyi b’ibyiringiro muri EMLR, Conference ya Nyabinaga Tuyishime Abraham asobanura uko ifumbire y’ikirundo ikorwa kugera igejejwe mu murima

Ati” ubanza koroshya ubutaka ubuhinga utabuzesereza, ugasasa bya biti nk’igitanda, ugashyiraho ibyatsi byumye bikagera kuri 20cm uhereye ku gitanda, ugashyiraho ibyatsi bibisi bigera kuri cm 15 ubujyejuru.“

Akomeza avuga ko nyuma y’ibyumye wongeraho ibibisi kuri 20cm ubujyejuru,ugashyiraho ifumbire ikomoka ku matungo kuri 10cm ubujyejuru, ugashyiraho ivu nyuma ugashyiraho ubutaka busanzwe nyuma ugasukaho amazi. Nyuma usubiramo uhereye ku bya kozwe ku ntambwe ya 4 kugera ukoze ikirundo wifuza, ugasukamo amaganga ari yo ntambwe ya nyuma,ugasongora igiti ukagishingamo gifasha kumenya ubushyuhe ifumbire ifite.

Ati” Iyo nta bushyuye wumvise igice cy’igiti gishinze mu ifumbire gifite byerekana ko ifumbire yaboze ikwiye kujyanwa mu murima.”

Bavuga ko kuba iyi fumbire bashobora kuyikorera, nta mafaranga menshi itangwaho n’ibyo ikorwamo biboneka hafi yabo bagiye kuyikora ku bwinshi ikabafasha kongera umusaruro.

Avuga ko iyi fumbire ifata hagati y’amezi 3 n’amezi 6 ngo ibe imeze neza. Iyo umuhinzi yayitayeho akayihindagura kenshi akurikiza amabwiriza, amezi 3 gusa aba ayibonye, nziza nyinshi.

Banigishijwe gukora ifumbire y’umwimerere na yo yoroshye gukorwa, ikorwa hifashishijwe ibyatsi bibisi, amaganga n’amazi gusa uyikora ashyira mu ndobo cyangwa ikindi gipfundikirwa,agakurikiza amabwiriza y’abigisha.

Iboneka nyuma y’icyumweru cyangwa ibyumweru 2 ikozwe igatangira gukoreshwa.

Tuyishime Abraham avuga ko ubutaka bw’uyu Murenge wa Gihombo bugaragaramo ubusharire bwinshi kubera kubura ifumbire ihagije, iyi fumbire y’ikirundo ikaba ije nk’igisubizo.

Bishimangirwa n’Umunyamabanga Nshingwabikorwa w’Akagari ka Mubuga, Tuyishime Augustin ushima cyane ubuyobozi bwa EMLR n’ubw’umuryango Hope international utera inkunga ibi bikorwa.

Umunyamabanga Nshingwabikorwa w’Akagari ka Mubuga Tuyishime Augustin avuga ko ubuyobozi bugiye kugira uruhare mu kugeza ikorwa ry’iyi fumbire mu baturage.

Ati” Turacyafite abaturage benshi batagira amatungo kandi ntiwahinga ngo weze utoroye. Byatubyaga umusaruro cyane tugahorana Ikibazo cy’ibiribwa bike.“

Arakomeza ati” Iki kibazo cyari kituremereye turashimira cyane Itorero EMLR ryaje kukivugutira umuti. Twiteze impinduka zigaragara mu musaruro iyi fumbire izatuzanira ari yo mpamvu tugiye gushyira imbaraga mu kubyigisha abaturage bacu,cyane cyane ko banatwigishiriza abaturage guhinga mu buryo burengera ibidukikije, butangiza ubutaka.”

Umuyobozi wa GS Gitsimbwe, Nsengiyumva Isaac na we ashima cyane iki gikorwa kigiye gutuma bongera imboga n’imbuto baha abanyeshuri, bakanongera iminsi bazibaha kuko kubura ifumbire byatumaga batazibaha uko babyifuza.

Umuyobozi wa GS Gitsimbwe , Nsengiyumva Isaac avuga ko ikoreshwa ry’iyi fumbire rizongera umusaruro w ‘ ubuhinzi ufasha abanyeshuri ayobora kunoza imirire

Ati” Mbere twabanje kujya dutanga amafaranga agera ku 200.000 mu kwezi tugura imboga. Aho dutangiye kuzihingira turatanga atarenga 25.000 agura izindi kubera ifumbire nke. Ubwo babitwigishije abana n’abarezi babo tugiye gufatanya kuyikora, tuzihinge ku bwinshi, ayo mafaranga adufashe kugura ibindi duha abana byunganira mu mirire yabo.”

Umuyobozi w’umushinga RW 0174 uterwa inkunga na Compassion international, mazimpaka Anaclet,avuga ko nyuma y’uko abahagarariye ababyeyi b’abana bitaho bigiye gukora iyi fumbire bagiye kubyigisha bagenzi babo bakorana ubuhinzi mu matsinda bikazafasha kongera umusaruro.

Batangiriye ku gikorwa cyo koroshya ubutaka

Ati” Twabishimiye cyane dushimira itorero EMLR kuko twajyaga tugura ifumbire ariko ntituzongera kuyigura tugiye kuyikorera. Tuzabikurikirana birenge amatsinda binagere mu ngo zabo.

Bikazakuba inshuro nyinshi umusaruro babonaga, bikazanafasha gusagurira amasoko no guhangana n’ibiciro biterwa n’ibiribwa bike.”

Abigishijwe gukora iyi fumbire banagiye kuyikoresha bagaragarije Rebero.rw icyizere bayifitiye.
Hategekimana Uzziel, ati” Tuyifitiye icyizere dukurikije uburyo twayigishijwe,ingufu zayo n’ ikibazo ije gukemura cyari kiduhangayikishije cyane, cyane cyane ko tuzajya tuyikorera nta mafaranga idutwaye,ikirundo kimwe kigafumbira ubutaka bunini. “

Yongeyeho ati” Turashimira cyane perezida Kagame utuma ibi byose bitugeraho tukanashimira itorero EMLR ryadutekerejeho, rikabona ikibazo cy ‘umusaruro muke dufite rikiyemeza kugikemura.”

Surintendant wa Conference ya Nyabinaga, Rév. Mushimiyimana Casimir yashimiye umwepisikopi w’itorero EMLR akanaba Umuyobozi w’ikirenga w’Itorero Méthodiste Libre ku isi, Samuel Kayinamura washyize ingufu mu kugeza iki gikorwa muri iyi Conference, cyari gikenewe cyane kubera ikibazo cy’ubusharire bw’ubutaka.

Surintendant wa Conference ya Nyabinaga, Rév. Mushimiyimana Casimir ashimira umwepisikopi w’itorero EMLR akanaba Umuyobozi w’ikirenga w’Itorero Méthodiste Libre ku isi, Samuel Kayinamura imbaraga yashyize mu kugeza iyi gahunda muri iyi Conference.

Ati” Dukurikije aho twakoze ingendo shuri iyi gahunda yahinduriye ubuzima abayigejweho mbere bakayishyira mu bikorwa neza. Twiteguye kuyibyaza umusaruro witezwe, ije tuyinyotewe.”

Yunzemo ati” Turashimira cyane ubuyobozi bw’itorero EMLR buduha gahunda nk’izi zihindura imibereho y’abaturage, tukabwizeza gukurikirana iyi gahunda ikazatanga koko umusaruro yitezweho.”

Umurenge wa Gihombo wakunze kuvugwamo ikibazo cy’ubukene buterwa n’umusaruro muke w’ubuhinzi kandi ari bwo bukorwa n’abawutuye benshi,kubera ubusharire bw’ubutaka n’ifumbire nke.

Abaturage bakavuga ko iyi gahunda ikozwe neza yaba igisubizo nk’uko byagenze mu bice bimwe by’Imirenge ya Nkombo na Muganza mu karere ka Rusizi.

@Rebero.rw

About The Author