Musenyeri Samuel Kayinamura ( wa mbere i bumoso), Umuyobozi w'Akarere ka Rusizi w'agateganyo Rwiririza Fred ( wa 3 uturutse i bumoso) n'abandi bayobozi bari ku Nkombo gushyikiriza abatishoboye inzu bubakiwe
Ubuyobozi bw’Akarere ka Rusizi burashimira itorero EMLR ibikorwa bihindura imibereho y’abaturage birimo kubakira abatishoboye, ijambo ry’Imana ribahindura mu by’umwuka, kugaburira abashonji, ubumenyi ritanga kuva ku nshuke kugera muri kaminuza, ubuvuzi bunoze mu bigo nderabuzima byaryo,amacumbi meza mu mujyi wa Rusizi, kubigisha gukora, n’ibindi bihindura ubuzima, kakaryizeza ubufataye buhoraho.
Byavuzwe n’Umuyobozi w’Akarere ka Rusizi w’agateganyo,Rwiririza Fred ku wa gatanu tariki ya 14 Ugushyingo,2026 mu gikorwa cyo gutaha inzu 39 z’abatishoboye zubatswe n’umushinga RW 0180 EMLR Bugumira mu Murenge wa Nkombo ku bufatanye na Compassion International.

Surintendant wa Conference ya Kinyaga,Rév. Hakizimana Félicien asobanura uko ubuzima bw’abahawe inzu bwari bwifashe mbere yo kuzihabwa
Byakozwe mu nama y’umwaka ya EMLR,Conference ya Kinyaga, yateranye kuva ku wa 12 kugera ku wa 15 Uguhyingo,2026 ku cyicaro cy’iyi Conference muri paruwasi ya Kamembe,mu mujyi wa Rusizi, yabanjirijwe no kuganira n’abafatanyabikorwa b’iyi Conference, ibiganiro byavuyemo gushyiraho itsinda rigizwe n’abasengera muri iri torero n’abatarisengeramo, rigiye kwita ku guteza imbere iyi Conference.
Mu batorewe kuribera abayobozi bayobowe na Mushengezi Evariste usanzwe asengera mu itorero Angilikani ry’ uRwanda, akungirizwa na Ngirinshuti Callixte wa EMLR Kamembe, Maitre Ndikumana Elisé na we wa EMLR Kamembe, Ugirashebuja Rémy,wo muri ADEPR,Ngendahimana Thacien wa EMLR Mururu na Utamuriza Brigitte wa EMLR Kamembe .

Hanabaye imurikabikorwa. Aha ishuri Child Care Academy rirerekana ubuhinzi bw’ibihimyo n’indi bigaburirwa abanyeshuri bihingira
Kuba irimo n’abo mu yandi matorero, abasengera muri iri torero babibonamo ikimenyetso cyiza cy’ubufatanye bw’amadini n’amatorero mu kuzamurana.
Bukeye ku wa 13 Ugushyingo,2026 ni bwo abayobozi b’iri torero barangajwe imbere n’umwepisikopi waryo akanaba umuyobozi w’inama y’ikirenga y’itorero Méthodiste Libre ku isi, Samuel Kayinamura, umuyobozi w’Akarere ka Rusizi w’agateganyo Rwiririza Fred,inzego z’umutekano,umuhuzabikorwa w’imishinga iterwa inkunga na Compassion international mu karere ka Rusizi Uwintije Jean Damascène, n’abandi, berekeje ku Nkombo gutaha inzu zubakiwe abatishoboye.

Musenyeri Samuel Kayinamura yashimye aho Conference ya Kinyaga igeze n’aho igaragaza igana mu iterambere
Abazishyikirijwe bavuze ko babaga mu zigayitse, bashimira perezida Kagame wifuriza abanyarwanda bose gutura aheza kandi neza, ubufatanye bwiza bwa EMLR,Akarere ka Rusizi na Compassion international bwatumye bubakirwa.
Sunzu Angeline wo mu Mudugudu wa Rutarakiro,akagari ka Rwenje,ati’’ Nahoranaga umutima uhagaze ko ikizu nararagamo cyazangwaho n’abana banjye,nibaza uburyo nzabona aheza ndara. Nakomeje gusenga Imana iranyumva yohereza aba bakozi bayo baranyubakira none barayinkinguriye ku mugaragaro. Ni inzu nziza impesheje agaciro.’’
Yakomeje ati’’ Banayimpanye na matora yo kuraraho n’ibiribwa bimara igihe bidutunze. Nshimiye cyane ubuyobozi bwacu bwiza burangajwe imbere na perezida wacu Paul Kagame bumboneye aho mba.’’

Musenyeri Samuel Kayinamura na Surintendant wa Conference ya Kinyaga, Hakizimana Félicien bishimana n’abasamyi bo ku Nkombo
Safari Damascène wo mu Mudugudu wa Kabuye,Akagari ka Kamagimbo,na we ati’’ Mu by’ukuri sinabura kwishima nyuma yo kuva mu nzu nanyagirirwagamo n’imvura n’umuryango wanjye tugashyirwa mu nzu tunezererwamo,tukanahabwa matora n’ibiribwa. Turashimira cyane umushinga RW0180 EMLR/Bugumira wafatanije na Compassion international bakatwubakira. Byose tubikesha perezida Kagame udukunda.’’
Mu izina ry’abakirisito ba Nkombo, Singirankabo Thomas yashimiye mbere na mbere perezida Kagame umaze guhindura bigaragara ubuzima bwabo,ashimira n’aba bagera ikirenge mu cye bubakira abatishoboye bakanabaha ibiribwa n’isaso,yizeza uruhare rwabo mu iterambere rirambye ry’igihugu.

Bafungura ku mugaragaro inzu bubakiye Sunzu Angéline n’umuryango we
Musenyeri Samuel Kayinamura, yashimiye Imana yahaye uRwanda ubuyobozi bwiza burangajwe imbere na perezida Kagame,bushyira umuturage ku isonga, abadafite aho baba bakubakirwa,bagatura aheza.
Ati’’ Iyo Mana tugomba guhora turishimira iyo mpano nziza yaduhaye. Twaje kubasura no kubafasha kwishimira ibi bikorwa tumaze gutaha, umuturage agatura mu nzu itava,itarangwamo umukungugu cyangwa icyondo. Tunashimiye EMLR Bugumira na Compassion international babubakiye aya macumbi meza. Imana iyo tuyisenze iduha gukora ibikorwa nk’ibi binejeje.’’
Umuyobozi w’Akarere ka Rusizi w’agateganyo,Rwiririza Fred,ati’’ Turashimira cyane EMLR na Compassion international ku nzu nziza tumaze gutaha mpamya ko zihinduye bifatika imibereho y’abazihawe. Dushima cyane iri torero ibikorwa rikora bihindura imibereho y’abaturage, bakabaho neza,batekanye.’’

Safari Damascène, umugore we n’abayobozi nyuma yo gushyikirizwa inzu yubakiwe
Yasabye abahawe inzu kuzifata neza,bagakora biteza imbere,bashakisha icyo baziriramo,bakanita cyane ku isuku ngo bakomeze kubaho neza.
Nyuma ya Nkombo, Musenyeri Samuel Kayinamura n’abo bari kumwe, basuye kaminuza ya Kibogora Polytechnic,ishami rya Rusizi, agashami k’ubuvuzi bw’amenyo, ubuforomo n’ububyaza, yishimira uburyo abahiga bakataje muri aya masomo, bitanga icyizere cy’ikemurwa ry’ikibazo cy’abaganga.
Yakomereje ku imurikabikorwa,ahamuritswe byinshi byo muri paruwasi zinyuranye n’ibigo by’amashuri by’iyi Conference, byibanda ku bikorwa by’ubuhinzi,ubworozi, ubuvumvu n’ikoranabuhanga, arabishima, asaba n’izindi Conferences kwigira aha,ubutaha na zo zikazajya zimurika.

Abasamyi bo ku Nkombo mu byishimo n’abayobozi nyuma yo gushyikiriza inzu abaturanyi babo
Nyuma y’ibi bikorwa,inama y’umwaka yakomereje ku kureba ibindi byagezweho umwaka ushize, uko umutungo w’iyi Conference uhagaze,ibigiye gukorwa muri uyu mwaka bikubiye mu nkingi 5 iri torero rigenderaho, abakirisito bose basabwa guhagurukira rimwe bagaharanira kwesa imihigo bahize.
Mu byifuzo byatanzwe harimo gushyira ishuri risumbuye mu ishuri ribanza cya Child Care Academy, gushaka amacumbi y’abiga mu ishami rya Rusizi rya Kibogora Polytechinic no gufasha ikigo nderabuzima cya Kamonyi,mu Murenge wa Ruharambuga,Akarere ka Nyamasheke giherutse gukubitwa n’inkuba ikahangiza byinshi,basaba ko byasimburwa ngo gikomeze gukora neza. Musenyeri Samuel Kayinamura yemeye ko byose bizabonerwa ibisubizo bihamye.
Mu myanzuro yafashwe,harimo ko 8 bitegura kuba abapasitoro ba Conference ya Kinyaga bakomeza gutegurwa neza,bakazazamurwa mu ntera umwaka utaha. Uwari Surintendant w’iyi Conference,Habiyambere Céléstin wari mu gihano cy’umwaka, utarujuje ibyo yasabwaga ngo akivemo, yongerewe undi mwaka,yaba atarabyuzuza agakurwa burundu mu bapasitoro b’iri torero.

Abagore ba Conference ya Kinyaga boroje bagenzi babo inkoko
Ikindi gikomeye ni uko iyi Conference yasabwe kwita ku bibazo byose bijyanye n’ubutaka bw’itorero. Musenyeri Samuel Kayinamura yashimye intero y’iyi Conference yo guharanira kugira umukirisito wishimye,uteye imbere, avuga ko igiye kuba rusange mu itorero ryose, buri wese agasenga yishimiye anaharanira iterambere.
Yanasabye Conferences zose gukomeza kwita ku bana( uruhongore) bo torero n’igihugu by’ejo hazaza, zikanakomeza gukorera mu bumwe no gucunga neza umutungo w’itorero nk’uko yabisanze aha mu Kinyaga.
Mu cyigisho cye,kinajyanye n’insanganyamatsiko y’uyu mwaka,isaba abakozi b’Imana kwirinda ubwabo bakanarinda umukumbi, Past.Irihose Marc yagaragaje ko mu madini n’amatorero harimo abakozi b’Imana bakorana na yo, abacanshuro Imana ikoresha badakorana na yo, n’abakozi ba Satani bigize intumwa za kiristo mu itorero, abasaba gukorana neza n’Imana birinda ubucanshuro mu itorero.

Mu cyigisho cye, Past Irihose Marc yabasabye kuba abakozi b’Imana bakorana na yo
Ati’’ Biragatsindwa kuba warayoboye itorero, wararirimbye,warakoze indi mirimo y’Imana mu itorero ukazabura ijuru.’’
Hanahembwe Paruwasi ya Kamembe yahize izindi mu mihigo, Musenyeri Kayinamura aha iyi Conference impano y’uwashinze iri torero mu 1860,Benjamin Tite Robert, nk’uko yanayitanze mu zindi Conference ,azanakomeza ngo barusheho kumenya neza inkomoko y’itorero ryabo. Yasabye ko abapasitoro bageze mu zabukuru bakomeza kwitabwaho neza,nk’abakoreye Imana bitanga.
EMLR, Conference ya Kinyaga igizwe n’abakirisito hafi ibihumbi 29, abapasitoro 31 bari mu mirimo, 15 bari mu kiruhuko cy’izabukuru, 8 bitegura. Ikorera mu turere twa Rusizi na Nyamasheke,ikagira ibikorwa byinshi by’iterambere bikomeje kongerwa.

Surintendant wa Conference ya Kinyaga, Rév. Hakizimana Félicien
Surintendanta wayo, Rév.Hakizimana Félicien, yishimira ko abakiristo bayo bakomeje kwiyongera,ahiyongereyeho abarenga 1000 umwaka ushize,akanishimira imikoranire myiza n’izindi nzego, iza Leta,iz’umutekano n’amadini n’amatorero akizeza ko izakomeza.
Anavuga ko yiteze byinshi kuri komite yashyizweho y’iterambere ry’itorero, iyi nama ikaba ibasigiye byinshi byo gukora agasaba abakirisito bose gahagurukira rimwe bagaharanira ko Conference yabo ihora ku isonga mu iterambere ry’umwuka n’iry’umubiri.

Paruwasi ya Kamembe yahembewe ubudashyikirwa mu mihigo

Abagize inama y’umwaka ya EMLR Conference ya Kinyaga mu ifoto y’urwibutso

Bahawe impano ya Benjamin Tite Robert washinze itorero Méthodiste Libre mu 1860.

Basabwe kurushaho kwita ku bana ( uruhongore) nk’itorero ry’ejo hazaza.
@Rebero.rw

Dore ibyiza kbs. Kinyaga Enyanya