Abayobozi bahagarariye amakipe yose akina muri Shampiyona y’Icyiciro cya Mbere mu Rwanda (BK Pro League) bahuriye na Banki ya Kigali (BK) mu nama nyunguranabitekerezo yabereye muri Kigali Serena Hotel, hagamijwe kurebera hamwe uburyo bwo kurushaho guteza imbere umupira w’amaguru mu Rwanda.
Iyi nama yiswe BK Pro League Club Workshop yitabiriwe n’abayobozi b’amakipe atandukanye ndetse n’abayobozi ba Banki ya Kigali, umuterankunga mukuru wa shampiyona, baganira ku buryo ubufatanye bwabo bwarushaho gutanga umusaruro no guteza imbere amarushanwa.
Abitabiriye iyi nama baganiriye ku ngingo zitandukanye zirimo imiyoborere y’amakipe, kunoza imikorere ya shampiyona, guteza imbere ubucuruzi bushingiye kuri ruhago, kongera ubunyamwuga no gushimangira ubufatanye hagati y’umuterankunga n’amakipe.
BK yavuze ko ikomeje gushyigikira iterambere rya ruhago nyarwanda binyuze mu bufatanye na BK Pro League, hagamijwe kubaka shampiyona irushaho guhangana ku rwego rw’akarere ndetse no kuzamura impano z’abakinnyi.
Abayobozi b’amakipe bagaragaje ko inama nk’iyi ari umwanya mwiza wo kungurana ibitekerezo no gushaka ibisubizo ku bibazo bikigaragara muri ruhago y’u Rwanda, banagaragaza ko ubufatanye n’abaterankunga bufite uruhare rukomeye mu iterambere ry’amakipe.
Umuyobozi Mukuru ushinzwe Serivisi z’Ikoranabuhanga n’Abakiliya ku Giti Cyabo muri Banki ya Kigali, Rumanyika , yatangiye yakira kandi ashimira abitabiriye inama nyunguranabitekerezo, ashimangira akamaro k’ubufatanye mu guteza imbere ruhago. Nyuma y’ibyo, Umuyobozi Mukuru wa Rwanda Premier League,
Karangwa Jules, yatanze ikiganiro cyagaragaje uko ubufatanye na BK buhagaze ndetse n’icyerekezo n’umurava dusangiye mu guteza imbere umupira w’amaguru mu Rwanda.
BK Pro League Club Workshop yabaye umwanya wo gusangira ubunararibonye no gushimangira umubano hagati ya BK n’amakipe, hagamijwe kubaka shampiyona irushaho kugira ireme, gukurura abafana benshi no kuzamura urwego rw’umupira w’amaguru mu Rwanda.
Iyi nama ibaye mu gihe amakipe akomeje imyiteguro y’umwaka mushya w’imikino, aho yitezweho kuzatanga shampiyona irimo ihangana rikomeye ndetse n’impinduka zigamije guteza imbere ruhago nyarwanda.
@Rebero.rw
About The Author
