Abantu bimuwe mu ntambara bahungira mu mujyi wa Goma, mu burasirazuba bwa Repubulika ya Kongo
Mu burasirazuba bwa Repubulika iharanira demukarasi ya Kongo, ibisasu bitatu byaturikiye i ruhande rw’inkambi y’impunzi ya Kanyarutchinya iherereye mu teritware ya Nyiragongo.
Abacumbikiwe muri iyi nkambi baravuga ko baterwa impungenge no kuba ibisasu bikomeje kugwa hafi y’aho bahungiye no gushyira ubuzima bwabo mu kaga
Aka gace kari kazengurutswe n’inkambi nyinshi zirimo iya Kanyarutchinya n’iya Don Bosco zose zicumbikiye impunzi zahunze imirwano ziturutse muri Rutshuru na masisi zihunga gushyamirana hagati ya M23 n’ingabo za leta ya Kongo.
Kuva mu masaha ya mu gitondo ingabo za M23 zarwanye n’iza Leta FARDC iterwa inkunga n’imitwe ya Wazalendo. Iyi mirwano irabera muri gurupema ya Kibumba mu birometero bine gusa uvuye aha mu nkambi ya Kanyarutchinya.
Gutana mu mitwe ku mpande zombi byatumye ibisasu na za bombe biterwa muri iyi lokalite ya Kibati yegeranye n’inkambi ya Kanyarurtchinya ubuyobozi bwayo buvuga ko kugeza ubu icumbikiye imiryango igera ibihumbi 149 aho abayicumbikiwemo bose bakabakaba ku bihumbi Magana inane.
Kuba ibisasu birimo kugwa hafi y’ahantu nk’aha hahora imbaga y’abantu benshi, bitera icyoba abahakorera ibikorwa byabo bya buri munsi cyane biganjemo impunzi ahanini zaturutse mu teritware ya Ruthuru.
Kuba iyi nkambi ibarirwamo umubare munini w’impunzi ubwoba ni bwinshi haba mu bayicumbikiwemo ndetse n’abaturage basanzwe baturanye nayo.
Inzego za leta zishinzwe ubutabazi ndetse n’iza gisirikare, zahise zigera aho ibi bisasu byaguye. Ubwo ubushakashatsi bwasozwaga mu masaha y’umugoroba izi nzego zumvikanisha ko n’ubwo ibi bisasu byaguye ahantu hateraniye abantu nta wakomeretse cyangwa ngo ahitanwe na byo. Gusa inzego za leta na zo zagaragaje impungenge zo kubona ibi bisasu byaterwa ahantu nk’aha.
@REBERO.RW
About The Author
