Rév. Rwagasore Ngirabakunzi Alexis ari kumwe n'umugore we
Inama y’umwaka ya Conference ya Nyagatare mu itorero EMLR yateraniye mu karere ka Rwamagana,kuva ku wa 5 kugera ku wa 7 Ukuboza,2025, isoje imirimo yayo itoye umuyobozi ( Surintendant) mushya w’iyi Conference. Hatowe Rwagasore Ngirabakunzi Alexis ku majwi 45/51 batoye.
Kimwe no mu zindi Conferences 6 zimaze gukora inama nk’izi z’umwaka, n’iyi yafatiwemo imyanzuro myinshi izashyirwa mu bikorwa muri uyu mwaka,imyinshi ijyanye n’iterambere, bashingiye ku kiganiro kijyanye n’uruhare rw’amadini n’amatorero mu iterambere ry’umuturage bahawe n’umunyamabanga nshingwabikorwa w’umurenge wa Nzige iyi nama yabereyemo, Kinyamahanga Jackson.
Mu cyigisho cye gisoza iyi nama,cyagendeye ku ntego y’uyu mwaka iboneka mu rwandiko rwa kabiri Pawulo yandikiye Timiteyo igice cya 1: 7, igira iti ” Kuko Imana itaduhaye umwuka w’ubwoba,ahubwo yaduhaye uw’imbaraga n’urukundo no kwirinda, Umwepisikopi w’itorero EMLR akanaba umuyobozi w’inama y’ikirenga y’itorero Méthodiste Libre ku isi, Musenyeri Samuel Kayinamura yasabye abakirisito kwirinda icyaha.
Musenyeri Samuel Kayinamura yasabye abakirisito kwirinda ibyaha
Ati” Icyaha ni cyo kibi,gihindisha umuntu umushyitsi, kikanamuca intege. Udafite icyaha arahagarara,agashikama imbere y’ibiteye ubwoba. Twirinde icyaha Icyo ari cyo cyose. Udafite umutima umucira urubanza arahagarara akema.”
Yabasabye gukura amasomo 5 akomeye mu nyigisho yabahaye.
Ati” Isomo rya mbere dushikame ku kwizera,dukomere ku wo twizeye. Irya 2 tugire umutima utaducira urubanza kuko iyo umuntu yumva hari icyo umutima we ushaka kumuciraho urubanza,kiba ari ikidatunganye,aba agomba kucyihana akakireka.”
Yakomeje ati” Icya 3 dutere abandi umwete n’imbaraga. Icya 4 dukomeze kuba icyitegererezi cyiza. Icya 5 Dusese impano ziturimo,zake,ntizizime. Impano zo gukunda abandi,kubasura,kugira umutima w’impuhwe,gutanga n’izindi,tuzisese zake,ntiziveho.”
Yabasabye kugendana imbaraga z’umwuka wera aho bari hose zibabashisha gutsinda ibishuko byose.
Agaruka ku matora yakozwe muri iyi nama y’umwaka,isize Rév. Rwagasore Ngirabakunzi Alexis ku ntebe y’ubuyobozi bw’iyi Conference, Musenyeri Samuel Kayinamura yabwiye Rebero.rw ko iyi Conference nubwo itaragira abakirisito benshi cyane ugereranije n’izo mu burengerazuba bw’igihugu,atari nto.
Umugore n’abana ba Rév. Rwagasore Ngirabakunzi Alexis bamwijeje kumushyigikira muri izi shingano nshya
Ati” Si nto kuko ikorera mu turere 4 tw’intara y’uburasirazuba,ari two Nyagatare irimo icyicaro cyayo, Rwamagana yakiriye iyi nama y’umwaka,Gatsibo na Kayonza.
Ni Conference ikura,ifite abakirisito beza, bumva, bumvira,bafite icyerekezo nyacyo cy’iterambere,bigaragazwa n’ibikorwa byinshi by’iterambere imaze kugeraho mu myaka 6 gusa imaze ishinzwe. Si Conference nto mu bikorwa. Ni nziza cyane.”
Avuga kuri Surintendant mushya watowe, Rév. Rwagasore Ngirabakunzi Alexis, Musenyeri Samuel Kayinamura, ati” Afite imbaraga, yize iyobokamana. Itorero ararizi neza. Nta gushidikanya rero ko rigiye kongera umuvuduko mu iterambere ry’umwuka n’iry’umubiri.”
Bijeje Surintendant mushya watowe kumushyigikira
Yakomeje ati” Tumufitiye icyizere cyane kuko ni umupasitoro tuzi. Paruwasi yayoboraga ya Nyagatare imeze neza kandi ni umupasitoro wicisha bugufi, w’inyangamugayo,ushobora kugirwa inama akayumva, akanayigira abandi. Aragutse mu bufatanyabikorwa. Tumufitemo ibyiringiro ko iyi myaka 3 izaba iy’umumaro.”
Yasabye abakirisito kumwakira bakamushyigikira,bamugira inama akazumva,na we akabagira izindi,bagatahiriza umugozi umwe.
Kuri Murebwayire Jeanne na Murwanashyaka Janvier Zulu, batangiye urugendo rwo kuba abitegura umurimo wa gipasitoro, Musenyeri Samuel Kayinamura yavuze ko ari izindi mbaraga ziyongereye mu murimo w’Imana,cyane cyane ko bize iyobokamana,banarangwa n’ingeso nziza.
Murebwayire Jeanne na Murwanashyaka Janvier Zulu batangiye urugendo rwo kuba abitegura umurimo wa gipasitoro
Ati” Twagize umugisha wo kugiramo umugore kuko twifuza abagore benshi mu bakozi b’Imana.”
Yunzemo ati” Twari twagize ibyago dutakaza umupasitoro w’umugore twakuye mu nshingano kuko amaze imyaka 2 asiba inama y’umwaka nta mpamvu, n’ubu ntiyayitabiriye.
Imitegekere y’itorero ivuga ko iyo utitabiriye inama y’umwaka imyaka 2 nta mpamvu,uba utakaje umurongo w’itorero uvamo.”
Uwo wakuwe ku rutonde rw’abapasitoro b’itorero Methodiste Libre mu Rwanda no ku isi yose ni Rév. Uwimana Valentine wabaga muri paruwasi ya Ngarama muri Nyagatare.
Rév. Rwagasore Ngirabakunzi Alexis watorewe kuyobora Conference ya Nyagatare.
Rév. Niyonsaba Valens wo muri paruwasi ya Nyagatare yahawe igihano cy’umwaka ngo akomeze yitekerezeho, Rév. Ndagijimana Emmanuel na we ahabwa igihano cy’undi mwaka wa 2 kubera ko amahirwe ya mbere yahawe atayakoresheje.
Uyu mwaka nushira atarisubiraho na we azakurwa ku rutonde.
Musenyeri Samuel Kayinamura avuga ko ibi bitanga ubutumwa bukomeye mu bapasitoro bwo kwirinda kuba urugero rubi rutuma bahabwa ibihano.
Musenyeri Samuel Kayinamura yasoje avuga ko bifuza ko Conferences zose zagira imbaraga nk’izo mu burengerazuba bw’igihugu,ari yo mpamvu bifuje ko mu nama y’umwaka izabera muri Conference ya Kibogora kuva ku wa 11 kugera ku wa 14 Ukuboza,2025 ba Surintendants bose bazahurirayo mu imurikabikorwa rizababera, barebe uko aho itorero ryatangiriye rikora, n’imbaraga rifite ngo bahakure amasomo azabafasha kuzamura Conferences zabo.
Surintendant mushya watowe Rév. Rwagasore Ngirabakunzi Alexis,afite imyaka 51 y’amavuko. Afite umugore n’abana 4, impamyabushobozi y’icyiciro cya 2 cya kaminuza mu micungire y’umutungo n’imiyoborere.
Yijeje kongera imishinga y’iterambere muri iyi Conference,asaba abakirisito kumushyigikira.
Ati” Dufite imishinga myinshi y’iterambere ishingiye ku nkingi 5 itorero ryacu rigenderaho dutekereza gukora, turizera ko mu bufatanye no gushyira hamwe bizoroha.
Yashimiye uwo asimbuye Rév. Habimana Vedaste,imirimo yakoze izamura iyi Conference kugeza ubu agiye mu zindi nshingano,amusaba kumuba hafi kuko inama ze azikeneye cyane.
Surintendant ucyuye igihe Rév Habimana Vedaste yijeje umusimbuye kumuba hafi muri byose azamukeneraho
Rév.Habimana Vedaste yishimiye abakirisito ubufatanye bwabaranze mu myaka 3 yose akabasha gusohoza inshingano ze,yizeza umusimbuye kuzamuba hafi.
Ati” Nubwo ndi mu yindi mirimo ariko n’iy’itorero ndacyayikora.. Nishimiye uburyo nafatanije n’inzego zose z’itorero tukagera ku bifatika byinshi twishimira.
Iyo ubwo bufatanye butabaho ntituba twarageze ku byo twagezeho ngo tunabisigasire.
Ndizeza Rév. Rwagasore Ngirabakunzi Alexis unsimbuye ubufatanye busesuye, buzatuma dukomeza intambwe y’iterambere.
Musenyeri Samuel Kayinamura n’abandi bayobozi
Abakirisito na bo bamwijeje ubufatanye busesuye.
Mukakanuma Valentine ati” Turamwishimiye,turamukunda cyane kubera ishyaka ry’itorero rimuranga. Twiyemeje kumushyigikira mu bikorwa byose by’iterambere.”
Nsengimana Théoneste na we ati” Tumushimira ubunararibonye n’ubushishozi bumuranga ku murimo w’Imana. Tuzamushyigikira ngo Conference yacu ikomeze itere imbere.”
Banashimiye cyane Surintendant ucyuye igihe Rév. Habimana Vedaste uburyo yabayoboye neza n’ibyo bagezeho ku bwe, bakazabisigasira babyongeramo ibindi.
Conference ya Nyagatare igizwe n’abakirisito hafi 7000 bari muri paruwasi 19, abapasitoro barenga 30 bari mu mirimo na 6 bari mu kiruhuko cy’izabukuru.
Korali urumuri ihimbaza Imana
Bishimiye imigendekere y’iyi nama y’umwaka
@Rebero.rw
About The Author
