Minisitiri ushinzwe Ibidukikije muri Suède, Romina Pourmokhtari, yagarutsweho cyane ku mbuga nkoranyambaga no mu bitangazamakuru nyuma yo kwitabira Inama y’Abaminisitiri b’ibihugu bigize Umuryango w’Ubumwe bw’u Burayi (EU) ajyanye n’umwana we w’uruhinja rw’amezi atatu.
Iyi nama yabereye i Luxembourg ku wa 25 Kamena 2026, aho uyu mubyeyi w’imyaka 31 y’amavuko yagaragaye yitwaje umwana we mu cyumba cy’inama, ibintu byafashwe nk’ikimenyetso gishyigikira uburenganzira bw’ababyeyi bakora imirimo y’ubuyobozi.
Romina Pourmokhtari yavuze ko icyemezo yafashe cyari kigamije kugaragaza ko ababyeyi, by’umwihariko abagore, badakwiye gushyirwa mu mwanya wo guhitamo hagati yo kubaka umuryango no gukomeza inshingano z’akazi.
Yagaragaje ko politiki ishyigikira ikiruhuko cy’ababyeyi n’aho bakorera hagomba kubafasha guhuza inshingano z’umuryango n’iz’akazi, aho kubibona nk’ibivuguruzanya.
Suède ni kimwe mu bihugu bizwiho kugira gahunda zifasha ababyeyi, zirimo gutanga ikiruhuko kirekire cy’ababyeyi no kugishyira ku bagabo n’abagore, hagamijwe guteza imbere uburinganire no korohereza imiryango kwita ku bana.
Abayobozi bavuga ko kuba Minisitiri Pourmokhtari yitabiriye iyi nama ajyanye n’uruhinja rwe byongeye gukurura ibiganiro ku kamaro ko gushyiraho politiki zorohereza ababyeyi bakora akazi, cyane cyane mu myanya y’ubuyobozi, kugira ngo batagomba guhitamo hagati y’akazi n’inshingano zo kurera abana.
Iki gikorwa cyanashimwe n’abatari bake babonye ko ari ubutumwa bwerekana ko ububyeyi budakwiye kuba inzitizi ku bagore bafite inshingano zikomeye. Gusa hari n’abagaragaje ko hakenewe amabwiriza asobanutse ku bijyanye no kujyana abana bato mu nama z’akazi, bitewe n’imiterere y’akazi n’aho gakorerwa.
Romina Pourmokhtari ni umwe mu banyapolitiki bakiri bato bafite imyanya ikomeye muri Guverinoma ya Suède, aho akomeje kugira uruhare mu biganiro birebana n’ibidukikije, ihindagurika ry’ibihe n’iterambere rirambye. Icyemezo cye cyo kujyana umwana mu nama cyabaye ikimenyetso cyongeye kuzamura impaka ku buryo inzego z’akazi zakomeza gushyigikira ababyeyi batanga umusanzu mu buyobozi no mu iterambere ry’ibihugu byabo.
@Rebero.rw
About The Author
