Mu nzu ndangamurage ya Melbourne Holocaust Museum iherereye mu Mujyi wa Melbourne muri Australia, habereye umuhango wo kwibuka ku nshuro ya 32 Jenoside yakorewe Abatutsi mu 1994, igikorwa cyateguwe n’Umuryango wa Ibuka Australia.
Uyu muhango wahuje Abanyarwanda batuye muri Leta ya Victoria, abo mu muryango w’Abayahudi, inshuti z’u Rwanda ndetse n’abandi banyacyubahiro, bose bahuriye hamwe mu rwego rwo guha icyubahiro inzirakarengane zirenga miliyoni imwe zishwe mu gihe cy’iminsi 100 ya Jenoside yakorewe Abatutsi.
Abitabiriye uyu muhango bunamiye abazize Jenoside, bacana urumuri rw’icyizere ndetse banafata umwanya wo kuzirikana amateka igihugu cy’u Rwanda cyanyuzemo. Hanatanzwe ubutumwa bwibutsa ko kwibuka ari inshingano yo guharanira ko Jenoside itazongera kubaho ukundi, haba mu Rwanda cyangwa ahandi hose ku isi.
Abayobozi ba Ibuka Australia bagaragaje ko gukorera uyu muhango muri Melbourne Holocaust Museum bifite igisobanuro gikomeye, kuko ari ahantu hagenewe kubungabunga amateka ya Jenoside yakorewe Abayahudi, bityo bikaba binatanga isomo ku ngaruka z’urwango, ivangura n’ubwicanyi bushingiye ku ndangamuntu.
Mu butumwa bwatanzwe, hibanzwe ku gukomeza kurwanya ingengabitekerezo ya Jenoside, guhakana no gupfobya Jenoside yakorewe Abatutsi, no gukomeza kwigisha abakiri bato amateka nyayo kugira ngo babe abafatanyabikorwa mu kubaka isi irangwa n’amahoro, ubutabera n’ubwiyunge.
Abitabiriye uyu muhango banagarutse ku rugendo rw’u Rwanda rwo kwiyubaka nyuma ya Jenoside, bashima intambwe rumaze gutera mu bumwe n’ubwiyunge, iterambere n’ubutabera, banashimangira ko umuryango mpuzamahanga ugomba gukomeza kugira uruhare mu gukumira Jenoside n’ibyaha byibasiye inyokomuntu aho ari ho hose.
Umuhango wasojwe no gushyira indabo ku rwibutso, isengesho n’umunota wo guceceka mu rwego rwo guha icyubahiro abazize Jenoside yakorewe Abatutsi no gukomeza kuzirikana amateka kugira ngo atazasubira ukundi.
@Rebero.rw
About The Author
