Polisi y’u Rwanda yatangaje ko yafunze abapolisi babiri bagaragara mu mashusho yafatiwe muri Gare ya Rubavu, aho bari bafashe umukobwa bamushinja kwambara imyenda idakwiriye.
Aya mashusho yakwirakwiye ku mbuga nkoranyambaga agaragaza abapolisi bafashe uyu mukobwa, bigaragara ko bari kumubaza cyangwa kumubuza gukomeza urugendo kubera imyambarire ye.
Nyuma y’uko aya mashusho akwirakwiye, Polisi y’u Rwanda yemeje ko abo bapolisi babiri bafashwe ndetse bagafungwa, mu gihe umukobwa wari wafashwe we yarenganuwe.
Mu butumwa Polisi y’u Rwanda yanyujije ku mbuga nkoranyambaga, yagize iti: “Abapolisi bagaragara muri aya mashusho bafashwe ndetse barafungwa. Uwo mukobwa na we yarenganuwe.”
Polisi kandi yavuze ko nyuma y’iki gikorwa, abapolisi bose bahawe amabwiriza ndetse bihanangirizwa ko bagomba kwirinda ibikorwa nk’ibi no kubahiriza inshingano zabo mu buryo butabangamira uburenganzira bw’abaturage.
Iki gikorwa cyabaye mu gihe mu Rwanda hakomeje impaka ku myambarire, cyane cyane ku bakobwa n’abagore, ndetse n’uburyo abashinzwe umutekano n’abategura ibirori bakwiye kubyitwaramo.
Imyambarire ikomeje guteza impaka
Iki kibazo cyongeye kuzamura impaka zari zisanzwe ziri ku mbuga nkoranyambaga, cyane cyane nyuma y’igitaramo cy’umuhanzi w’Umunyatanzaniya Diamond Platnumz cyabereye mu Rwanda.
Muri icyo gitaramo, hari abakobwa bagarutsweho cyane ku mbuga nkoranyambaga nyuma yo kugaragara basubizwa inyuma ku muryango w’ahabereye igitaramo, aho bivugwa ko imyambarire yabo yari itujuje ibisabwa n’abateguye igitaramo.
Ibi byatumye bamwe bibaza niba ari ngombwa ko umuntu abuzwa kwinjira ahantu runaka kubera imyambarire ye, mu gihe abandi bo bavuga ko abategura ibirori bafite uburenganzira bwo gushyiraho amabwiriza agenga imyambarire y’abitabira.
Polisi ishimangira kubahiriza uburenganzira bw’abaturage
Ibyabereye muri Gare ya Rubavu byongeye kugaragaza uburemere bw’ikibazo cy’imikorere y’abashinzwe umutekano mu gihe basohoza inshingano zabo.
Nubwo abapolisi bafite inshingano zo kubungabunga umutekano no gukumira ibyaha, Polisi y’u Rwanda yagaragaje ko ibyo bigomba gukorwa hubahirizwa amategeko, uburenganzira n’agaciro ka muntu.
Gufunga aba bapolisi babiri kandi bishimangira ko ibikorwa by’umupolisi bidakwiye kurenga ku bubasha ahabwa n’amategeko cyangwa ngo bigire ingaruka ku burenganzira bw’umuturage.
Polisi yavuze ko amabwiriza yatanzwe ku bapolisi bose agamije gukumira ko ibikorwa nk’ibi byongera kubaho.
Kugeza ubu, ikibazo cy’imyambarire mu ruhame n’uburyo gikwiye gukurikiranwa kiracyari mu biganiro bikomeye ku mbuga nkoranyambaga, aho bamwe basaba ko hakubahirizwa amahame n’amategeko mu gihe abandi bagasaba ko hashyirwaho umurongo usobanutse ku myambarire ahantu hatandukanye.
@Rebero.rw
About The Author
