Senateri Uwizeyimana Evode yibukije Abanyarwanda baba mu mahanga ko badakeneye kuba bari mu Rwanda kugira ngo bagire uruhare mu iterambere ryarwo, abasaba gukoresha ubumenyi, ubushobozi n’amahirwe bafite mu mahanga mu gutanga umusanzu mu kubaka igihugu cyabo.
Yabitangaje ku wa 10 Ukwakira 2026, ubwo yari yitabiriye Rwanda Convention Canada, igikorwa cyahuje Abanyarwanda baba muri Canada n’abaturutse mu bindi bice, by’umwihariko muri Leta Zunze Ubumwe za Amerika.
Senateri Uwizeyimana yagaragaje ko kuba Abanyarwanda baba kure y’igihugu bitagomba kuba inzitizi ibabuza kugira uruhare mu iterambere ryacyo, ahubwo ko umubano bafitanye n’u Rwanda ukwiye kuba umusingi wo kurushaho kurufasha gutera imbere.
Yagize ati: “Umurage wacu ni ikiraro. Ariko ikiraro kigira agaciro iyo abantu bakinyuraho.”
Iyi mvugo yagaragaje akamaro ko guha agaciro umurage Abanyarwanda bahuriyeho, ariko bakawukoresha mu bikorwa bifatika bibahuza, bibateza imbere kandi bigira uruhare mu kubaka igihugu.
Yanibukije Abanyarwanda ko bafite inshingano zo kurinda no gusigasira amateka y’u Rwanda, cyane cyane igihe bahuye n’abantu bayavugaho ibitari ukuri.
Yabasabye kujya basubiza ibitekerezo bigoreka amateka y’igihugu bakoresheje ukuri, ubumenyi n’imyitwarire yubaka, aho kwishora mu gutukana cyangwa mu mpaka zidatanga umusaruro.
Ati: “Umuntu agututse na we ukamutuka, nta cyo muba mukemuye.”
Ubu butumwa bwibanze ku kamaro ko gukoresha ibiganiro byubaka n’ibimenyetso bifatika mu gusobanura amateka y’u Rwanda, no kwirinda imyitwarire ishobora gukomeza amakimbirane aho kuyakemura.
Rwanda Convention Canada ni urubuga ruhuza Abanyarwanda baba muri Canada n’abandi baba mu mahanga, rukabaha umwanya wo guhura, kuganira no gukomeza imikoranire ishingiye ku bumwe n’umurage bahuriyeho.
Ubutumwa bwa Senateri Uwizeyimana bwibukije abitabiriye ko gukunda u Rwanda bitagarukira ku kuba umuntu arutuye, ahubwo ko bigaragazwa n’ibikorwa, indangagaciro n’umusanzu atanga mu kurwubaka, aho yaba atuye hose.
@Rebero.rw
About The Author
