Minisitiri w’Ubuzima, Dr Sabin Nsanzimana, yayoboye umuhango wo guhererekanya inshingano hagati y’abayobozi bashya bashyizwe mu myanya muri Rwanda Food and Drugs Authority (Rwanda FDA).
Muri uyu muhango, Minisitiri Nsanzimana yashimangiye ko Minisiteri y’Ubuzima ikomeje gushyigikira Rwanda FDA mu gushyira mu bikorwa inshingano zayo no guteza imbere imikorere y’uru rwego rushinzwe kugenzura ibiribwa, imiti n’ibindi bicuruzwa bifitanye isano n’ubuzima.
Yagaragaje ko ubufatanye hagati ya Minisiteri y’Ubuzima na Rwanda FDA ari ingenzi mu gukomeza guteza imbere ubuziranenge n’umutekano w’ibicuruzwa bikoreshwa mu rwego rw’ubuzima.
Abayobozi bashyizweho n’inama y’abaminisitiri mu kigo cya FDA ni Prof Muganga Raymond umuyobozi mukuru, Dr Munyampundu Jean Pierre umuyobozi ushinzwe Departement y’ibiryo, Dr Kabandana Monia umuyobozi ushinzwe Departement ya Laboratory.
Abayobozi bashya ba Rwanda FDA basabwe gukomeza gushyira mu bikorwa inshingano bahawe, bagaharanira kunoza imitangire ya serivisi no guteza imbere intego z’ikigo mu rwego rwo kurengera ubuzima bw’abaturage.
Uyu muhango wabaye mu gihe Rwanda FDA ikomeje inshingano zo kugenzura no kugenzereza ibicuruzwa birimo imiti, ibiribwa n’ibindi bikoresho n’ibicuruzwa bifitanye isano n’ubuzima, hagamijwe kurengera ubuzima rusange.
@Rebero.rw
About The Author
