U Rwanda na Jordan byasinyanye amasezerano y’ubwumvikane (MoU) agamije gushimangira ubufatanye mu bijyanye n’ikoranabuhanga no guhindura serivisi hifashishijwe ikoranabuhanga, mu biganiro byabereye ku ruhande rw’Inama Rusange ya 81 y’Umuryango w’Abibumbye (UNGA81).
Ibiganiro byahuje impande zombi byibanze ku kungurana ubunararibonye n’ubumenyi mu gutanga serivisi za Leta hifashishijwe ikoranabuhanga, aho Jordan yagaragaje zimwe muri gahunda zayo z’ikoranabuhanga zirimo urubuga rw’igihugu rutangirwaho serivisi zitandukanye, ruzwi nka “Super App”.
Impande zombi kandi zaganiriye ku buryo bwo gukomeza kungurana ubumenyi, guteza imbere imikoranire hagati y’inzego no gusurana hagati y’abakozi n’inzego birebwa n’ikorwa ry’impinduka mu ikoranabuhanga.
Ubu bufatanye bugamije guhindura amasezerano yasinywe ibikorwa bifatika, binyuze mu gushyiraho inzira zo gusangira ubunararibonye no guteza imbere serivisi za Leta zitangwa hifashishijwe ikoranabuhanga.
Aya masezerano asinywe mu gihe ibihugu byombi bikomeje gushaka uburyo bwo gukoresha ikoranabuhanga mu kunoza imitangire ya serivisi no korohereza abaturage kugera kuri serivisi za Leta.
@Rebero.rw
About The Author
