Ikigo cy’Igihugu gishinzwe Iterambere n’imikurire by’Umwana (NCDA) cyagiranye amasezerano y’ubufatanye na Kaminuza ya Mount Kigali (Mount Kigali University), agamije kongera imbaraga mu guteza imbere imikurire y’abana bato, ubuzima bwabo no kubarinda ihohoterwa.
Aya masezerano y’ubwumvikane (MoU) agamije gushimangira ubufatanye mu bikorwa bijyanye no guteza imbere imikurire y’abana bato (Early Childhood Development – ECD), kubungabunga ubuzima bwabo, kubarinda no guteza imbere imibereho myiza yabo.
Ubu bufatanye kandi buzibanda ku bushakashatsi, amahugurwa, ubuvugizi n’ibikorwa bihuriza hamwe abaturage, hagamijwe gushaka ibisubizo birambye ku bibazo birebana n’imikurire n’uburenganzira bw’abana.
NCDA na Mount Kigali University byiyemeje gukorana mu buryo bujyanye n’ibyihutirwa mu iterambere ry’igihugu, kugira ngo ibikorwa by’iterambere ry’umwana birusheho gushingira ku bumenyi, ubushakashatsi n’imikoranire y’inzego zitandukanye.
Guteza imbere imikurire y’abana bato ni ingenzi kuko ari cyo gihe umwana aba akeneye kwitabwaho by’umwihariko mu bijyanye n’imirire, ubuzima, uburezi bw’ibanze, umutekano n’imibanire n’abandi.
Ubu bufatanye buteganyijwe gufasha mu kongera ubushobozi bw’inzego zifite uruhare mu iterambere ry’abana, guteza imbere ubumenyi n’ubushakashatsi no gushishikariza abaturage kugira uruhare mu kubaka ahazaza heza h’abana b’u Rwanda.
@Rebero.rw
About The Author
