Umujyi wa Addis Ababa minisitiri w’Intebe Abiya Ahmed wa Ethiopia yatashye umushinga w’iterambere ry’inkengero z’inzuzi witwa Kechene–Ambassador–Gihon–Irreecha–Bambis Riverside Development, wubatswe ku buso bwa hegitari 351, ukagira uburebure bwa kilometero 10, ugamije guteza imbere imiturire igezweho, kubungabunga ibidukikije no kunoza imibereho y’abaturage.
Uyu mushinga ugizwe n’ibikorwa remezo bitandukanye bigamije korohereza ingendo z’abaturage, guteza imbere imyidagaduro no kubaka umujyi urengera ibidukikije.
Mu bikorwa byawugize harimo inzira z’abanyamaguru, iz’abatwara amagare n’ibikorwaremezo bifasha uburyo butandukanye bw’ingendo zo mu mujyi.
Hanubatswe ibibuga by’abana, ahantu rusange hagenewe guteranira, ibibuga by’imikino n’imyidagaduro, ndetse n’amasoko y’amazi umunani agamije kurushaho gutaka uwo mujyi.
Uyu mushinga kandi ufite aho guhagarika ibinyabiziga n’ibigo umunani byo kwishyuriramo umuriro w’amashanyarazi mu binyabiziga bikoresha amashanyarazi. Ibi bigo bishobora kwishyurira amashanyarazi ibinyabiziga birenga 100 icyarimwe.
Gusanura ibidukikije no guteza imbere ubukungu
Uretse ibikorwa remezo, uyu mushinga ugamije no gusana ibidukikije binyuze mu gucunga amazi y’inzuzi, kubungabunga ubutaka n’amazi, ndetse no gushyiraho ahantu h’icyatsi ku nkengero z’inzuzi.
Ibi bikorwa bigamije guhuza iterambere ry’imijyi no kurengera ibidukikije, hagamijwe kubaka umujyi ugezweho kandi ubereye abawutuye.
Mu rwego rwo guteza imbere ubukungu bw’abaturage, hashyizweho isoko ryagenewe ubukorikori, rizafasha abaturage bahoze batuye ku nkengero z’uyu mugezi gukora ibihangano byabo, kubimurika no kubigurisha.
Hashyizweho kandi isoko rinini ry’ibikomoka ku buhinzi, rigamije guhuza abahinzi n’amasoko kugira ngo babone aho bagurishiriza umusaruro wabo.
Ibi bikorwa biteganyijwe gufasha abaturage kubona amahirwe yo kwihangira imirimo, kongera amafaranga binjiza no kugira uruhare mu iterambere ry’umujyi.
Umujyi ugezweho kandi uha amahirwe bose
Uyu mushinga ni umwe mu bikorwa bigamije guhindura Addis Ababa umujyi ugezweho, urengera ibidukikije kandi utanga amahirwe angana ku bawutuye.
Ubuyobozi bw’umujyi bushimangira ko intego atari ukugira umujyi mwiza gusa, ahubwo ari no kubaka ahantu hafasha abaturage kubona serivisi, kwiteza imbere mu bukungu no kugira imibereho myiza.
Uyu mushinga kandi ugamije gutuma iterambere ry’umujyi rifasha abaturage muri iki gihe, mu gihe hubakwa n’ishingiro ry’iterambere rirambye rizagirira akamaro n’abazawutuye mu bihe biri imbere.
@Rebero.rw
About The Author
