Umutwe wa FRN watangaje ko uruhande bahanganye rugizwe n’ingabo za Repubulika Iharanira Demokarasi ya Congo (FARDC), zifatanyije n’imitwe irimo FDLR, Mai-Mai n’abacancuro, rwagabye ibitero mu bice bitandukanye byo mu burasirazuba bw’iki Gihugu, birimo Minembwe, Walungu na Masisi.
Mu itangazo ryashyizwe hanze n’Umuvugizi wa FRN, Lawrence Kanyuka kuri uyu wa Gatanu, tariki 06 Ugushyingo 2026, yavuze ko ibi bitero byagabwe n’ihuriro ry’ingabo n’imitwe yitwaje intwaro ashinja gushyigikira ubutegetsi bwa Kinshasa, birimo n’ibice by’Ingabo z’u Burundi (FDNB).
Yavuze ko ibi bitero byibasiye ahantu hatuwe n’abaturage benshi, ndetse ko byakoreshejwemo indege zitagira abapilote z’intambara n’imbunda za rutura.
Kanyuka yavuze ko ahagana saa kumi n’imwe za mu gitondo, izi ngabo zagabye ibitero zikoresheje drones muri Lokarite za Rugomero na Nyarurango, mu gace ka Rugezi, muri Minembwe.
Yongeyeho ko saa kumi n’ebyiri za mu gitondo zakajije ibisasu muri Lokarite za Mukoko, Nyaruhinga na Nyamabuguma, na yo iherereye muri Minembwe.
Mu kindi gitero yavuze ko cyabaye saa moya z’igitondo, Kanyuka yavuze ko ibitero byagabwe icyarimwe muri Lokarite za Kasika na Chulwe, muri Teritwari ya Walungu.
Mu masaha yakurikiyeho, ahagana saa tatu za mu gitondo, ngo izo ngabo zakoresheje imbunda ziremereye mu kurasa muri Lokarite za Mahanga na Buhimba, muri Teritwari ya Masisi.
Umuvugizi wa FRN yavuze ko igihe yashyiraga hanze iri tangazo, ibyo bitero byari bikomeje. Yavuze ko abarwanyi ba FRN na bo bahise binjira mu mirwano bagamije kurinda abasivili no kurokora ubuzima bwabo.
Yagize ati “Kubera ubwo bugome, ingabo za FRN zatabaye kugira ngo zirinde abaturage b’abasivili no kurokora ubuzima bwabo mu gihe bahanganye n’ibyo bitero.”
@REBERO.RW
About The Author
