Bizimana Emmanuel yatawe muri yombi akurikiranyweho guhohotera Umukuru w'Umudugudu wamukizaga n'uwo barwanaga
Kuri sitasiyo y’urwego rw’igihugu rw’ubugenzacyaha ( RIB) rwa Kagano mu Karere ka Nyamasheke hafungiye Bizimana Emmanuel w’imyaka 28, wo mu Mudugudu wa Gikuyu, Akagari ka Ninzi, Umurenge wa Kagano,Akarere ka Nyamasheke, ukurikiranyweho guhohotera umukuru w’uwo Mudugudu witwa Bizeyiki Domitille w’imyaka 57 wamukizaga n’uwo barwanaga witwa Mazimpaka Octave w’imyaka 59.
Mazimpaka Octave yabwiye Rebero.rw ko yari atashye mu ma saa mbiri z’ijoro rishyira uwa 20 Ugushyingo, 2021avuye ku Kivu kuroba indugu, azifite mu gafuka, anagafitemo umuraga yarobeshaga, afite ingashya mu kundi kuboko ahurira na Bizimana Emmanuel haruguru y’urugo rwa Mudugudu,yasinze atangira kumuhohotera amwaka ibyo yari afite byose,undi abimwima, batangira kurwana.
Ati” Muri iyo mirwano yafashe ingashya yanjye arayangiza n’ibindi nari mfite anankubita ibuye ankomeretsa ugutwi, abaturage n’umukuru w’Umudugudu bantabaye, Mudugudu amubajije impamvu ateza intugunda mu baturanyi undi atangira na we kumuhohotera.”
Mudugudu Bizeyiki Domitille, ati” Nabaye nkimubaza impamvu ateza intugunda mu baturanyi ahita aniga. Abaturage baje kunkiza ankubita umutego ngusha umugongo ku mizi y’igiti cy’umwembe cyari gihari ni wo ukomeje kumbabaza cyane.”
Avuga ko bwakeye ku wa 20 Ugushyingo ajya kwivuza ku bitaro bya Kibogora, Bizimana Emmanuel wari wahise acika abaturage bari bamufashe bwakeye yohereza nyirakuru gusaba imbabazi.
Ati” Yaje avuga ko asabira imbabazi umwuzukuru we wahohoteye inzego z’ubuyobozi, tumubwira ko tutazimuha atamuzanye.”
Arakomeza ati” Hashize umwanya nyirakuru agiye tubona uwo Bizimana Emmanuel araje avuga ko inzoga zimushizemo yatekereje agasanga yahemutse guhohotera umuturanyi n’inzego z’ubuyobozi, tumubwira ko twamaze kubibwira izindi nzego,tujyana ku buyobozi bw’Akagari akabibubwira.”
Avuga ko bageze ku Kagari inzego z’umutekano zahise zimufata zimushyikiriza sitasiyo yari RIB ya Kagano kubibazwa.
Mazimpaka Octave avuga ko yifuza ko Bizimana Emmanuel yamuriha ibye yangije akanabazwa ibyo kumuhohotera kugeza ubwo amukomerekeje.
Mudugudu Bizeyiki Domitille akavuga ko Bizimana Emmanuel akwiye kubazwa iby’urwo rugomo runagera ku kubahuka inzego z’ubuyobozi, n’abandi babitekerezaga bakareberaho.
Umuyobozi w’Akarere ka Nyamasheke w’agateganyo, Muneza Placide avuga ko abaturage bagomba kumenya ko kizira kikaziririzwa guhohotera inzego z’ubuyobozi ziri mu kazi kazo.
Ati” Twamumenye. Mudugudu yamukizaga n’uwo barwanaga aramuhohotera. Twamaze kumufata arimo kubibazwa. Uwahohotewe yagiriwe inama yo gutanga ikirego kuri RIB.”
Yakomeje ati” Turakomeza kubikurikirana kuko guhohotera umuyobozi uri mu nshingano ze si byo. Ari byo dusaba abaturage bacu kutigabiza abayobozi batowe n’abaturage ngo babahohotere. N’undi wese uzahirahira guhohotera umuyobozi azabibazwa kandi inzego zacu zirakomeza kubikurikirana.”
@Rebero.rw
