Nyamasheke: Ubuyobozi bw’intara y’uburengerazuba burizeza itorero EMLR ubufatanye busesuye mu iterambere

Ubuyobozi bw’intara y’uburengerazuba burashimira itorero EMLR ibikorwa byinshi by’ indashyikirwa mu iterambere bimaze kugerwaho muri Conference ya Kibogora bifatiye runini igihugu cyose birimo Kaminuza ya Kibogora polytechnic n’ibitaro byo Ku rwego rwa 2 byigisha Kibogora, bukabizeza ubufatanye mu kubyongera no kubibungabunga.

Byavuzwe n’umunyamabanga nshingwabikorwa w’intara y’uburengerazuba,Uwambajemariya Florence ku wa gatanu tariki ya 12.Ukuboza uyu mwaka, mu imurikabikorwa ryateguwe n’ iyi Conference ya Kibogora,rijyanye n’inama y’umwaka yahaberaga kuva ku wa 11 kugera ku wa 14 Ukuboza uyu mwaka.

Mu bikorwa bikomeye byasuwe n’abayobozi batandukanye,barimo ba Surintendants ba Conferences zose za EMLR uko ari 10, abapasitoro bose n’abalayiki bahagarariye abandi muri Conference ya Kibogora, Ubuyobozi bw’ akarere ka Nyamasheke,ubw’intara y’uburengerazuba, inzego z’umutekano n’abandi, harimo ibikorwa by’ubworozi bw’amafi bukorwa na kaminuza ya Kibogora polytechnic,n’ibindi.

Umwepisikopi w’itorero EMLR akanaba umuyobozi w’inama y’ikirenga y’itorero Méthodiste Libre ku isi Musenyeri Samuel Kayinamura yabwiye Rebero rw, ati” Twahereye ku kumurika ibikorwa bya Kaminuza ya Kibogora polytechnic, duhera ku mushinga munini w’ ubworozi bw’amafi iyi kaminuza ifite mu kivu.”

Musenyeri Samuel Kayinamura yasabye abakirisito gukomera bakirinda ibishobora kubaca intege byose

Yakomeje ati” Ni igikorwa cyiza,kinini,giha abaturage akazi, kinitezweho kuzamura imirire myiza y’abaturage b’aka gace, abahaturiye bakazanigishwa uburyo bugezweho bwo korora amafi, cyane ko iyi kaminuza ifite gahunda yo gushyiraho ishami rijyanye n’ubworozi bwo mu mazi,igihe abanyeshuri 22 yohereje kubiminuza mu Bushinwa bazaba bagarutse kubyigisha nk’inzobere muri byo.”

Akomeza avuga ko hanasuwe agasozi ka Kumbya kagiye kubakwaho Guest house y’ibikorwa by’ubukerarugendo, hanasurwa aho Kaminuza ya Kibogora polytechnic irimo kwagurira inyubako zayo z’amashuri ahitwa mu Kiyanja, inyubako ikomeye y’ubucuruzi y’amagorofa 3 yubakwa mu I Tyazo, izahindura isura y’agace ka Kibogora mu iterambere, hamurikwa aho kaminuza igiye kubaka ishuri rikomeye ry’ubuganga.

Bimwe mu bikorwa byamuritswe

Ibindi byasuwe ni ibitaro bya Kibogora biri ku rwego rwa 2 rw’ibitaro byigisha,ibikorerwa mu mashuri y’iri torero,aherekanywe umunyeshuri wiga muri ES Rangiro TSS,wakoze uburyo bwo kuhira imyaka hakoreshejwe ikoranabuhanga.

Hanamuritswe ibikorwa iri torero rifatanyamo n’abafatanyabikorwa baryo,ahagaragaye nanone agashya gakorwa n’abanyeshuri ba paruwasi ya Mbuga mu murenge wa Macuba,aho abana bafashwa n’umushinga uterwa inkunga na compassion international bakora umutobe n’isukari mu bisheke, ibikorwa by’ubukorikori birimo gukora inkweto, ibyagezweho n’abanyeshuri ba GSFAK,n’ibindi.

Musenyeri Samuel Kayinamura yasabye ko imurikabikorwa ryazajya ritegurwa muri Conferences zose ngo iterambere rizirimo rimenyekane

Musenyeri Samuel Kayinamura ati” Twahamenyeye byinshi bikorerwa muri iyi Conference,aho itorero EMLR ryatangiriye mu 1942 n’uko bikorwa,ba Surintendants b’izindi Conferences biyemeza na bo kuzajya bategura imurikabikorwa nk’iri bakatwereka ibyo bagezeho. Bizajya bituma batirara, bakorane umwete ngo bazabone icyo berekana,kuko udafite ibishya yereka abandi, kizaba ari ikimenyetso cy’intege nke mu mikorere.

Yanavuze ko iri murikabikorwa rinafite izindi ntego, zirimo kugaragaza ubufatanye bw’itorero na Leta mu kuzamura abaturage,kuko ibyasuwe byose bifite uko bibazamura, haba mu guhabwa akazi,ubumenyi,n’izindi nyungu zinyuranye bahabonera.

Mu bindi byakozwe muri iyi nama y’umwaka,harimo gutora Surintendant mushya w’iyi Conference,aho Rév. Mushimiyimana Siméon yongeye kugirirwa icyizere n’abakirisito,agatorwa n’amajwi 78/80.

Rév. Mushimiyimana Siméon wongeye gutorerwa kuyobora Conference ya Kibogora

Amuvugaho, Musenyeri Samuel Kayinamura, ati” Arabikwiye, ntawe ubishidikanyaho. Afite akarusho ko kuba uhagarariye abandi ba Surintendants, kuyobora ku itorero umubyeyi, hari ibikorwa byinshi ntagereranywa by’iterambere.

Ni umugabo uzi kujya inama akayigisha, urangwa n’imiyoborere ikwiriye,idahutaza, utega abandi amatwi akanamenya kuyobora. Kumugira ni iby’agaciro cyane kuri twe. Kumugirira icyizere rero ntibyadutunguye.”

Hanatanzwemo ikiganiro n’umuyobozi w’akarere ka Nyamasheke Mupenzi Narcisse,ku muryango ushoboye kandi utekanye, aho yibanze cyane ku kwita ku muryango kuko itorero n’ igihugu ntibyatekana hadaherewe ku muryango.

Umuyobozi w’akarere ka Nyamasheke Mupenzi Narcisse yabahaye ikiganiro ku muryango ushoboye kandi utekanye, abasaba guhangana n’ihohoterwa rikorerwa abana

Abahamagarira gukangurira abo bayoboye kurera abana neza babashyira mu mashuri, kubarinda ihohoterwa, gutoza abaturage gukora,kwizigamira n’ibindi byose byabateza imbere.

Iyi nama yanaranzwe n’imyanzuro myinshi yayifatiwemo igaruka ku kwita ku burere buboneye bw’abana no kubatoza ijambo ry’Imana, gukora muri paruwasi zose ibikura abaturage mu bukene, kwitegura kwakira neza abakoze ibyaha bya Jenoside yakorewe Abatutsi, bafungurwa,n’ibindi.

Yanaranzwe n’umukino w’umupira w’amaguru,aho ikipe y’abakozi ba Kaminuza ya Kibogora polytechnic yatsinze iy’Abapasitoro ibitego 3-1.

Abapasitoro n’abakozi ba kaminuza ya Kibogora polytechnic mbere y’umupira w’ubusabane, abapasitoro batsinzwemo 3-0.

Yasojwe no kwerekana 3 bamenyerezwa umurimo wa gipasitoro,hanarobanurwa Ngezahayo Aloys wa Conference ya Kibogora na Neza Jean Damascène waturutse muri Conference ya Kibungo kuba abapasitoro buzuye.

Bose Musenyeri Samuel Kayinamura yabasabye kurangwa n’urukundo n’ubupfura, baharanira guteza imbere abo bashinzwe.

Hanahembwe ibigo by’amashuri n’abandi babaye indashyikirwa mu bikorwa bitandukanye.

Umunyamabanga nshingwabikorwa w’intara y’uburengerazuba Uwambajemariya Florence yagaragaje uruhare rw’itorero EMLR mu iterambere ry’iyi ntara ryatangiriyemo.

Abayobozi banyuranye nyuma yo gutambagira ibikorwa by’imurikabikorwa

Ati” Twishimiye ibyagezweho n’itorero EMLR. Iri murikabikorwa ryatubereye umwanya mwiza wo kwishimira ibyo igihugu cyacu kigenda kigeraho kubera ubufatanye bwa Leta namwe abafatanyabikorwa.”

Yunzemo ati” Iyo turebye ibikorwa byose by’iterambere n’imibereho myiza twamurikiwe n’ibyo twasobanuriwe byahinduye ubuzima bw’abaturage bituma twishima tukanabashimira cyane.”

Yijeje iri torero ubufatanye busesuye muri byose biteza imbere abaturage.

Conference ya Kibogora ifite abakirisito barenga 47.000 bari muri paruwasi 23.

Abakirisito bijeje Surintendant Mushimiyimana Siméon uyoboye iyi Conference kuva yabaho,ukeshwa byinshi mu byagezweho n,uruhare rukomeye mu kubibungabunga,kuzamushyigikira bakanagera ku birenze ibyo bishimira ubu.

Ifoto y’urwibutso y’abayobozi bose bitabiriye iri murikabikorwa

Uzayisenga Elina umaze imyaka 62 muri iri torero, ati” Ni umuyobozi mwiza urangwa n’intumbero y’iterambere ry’iby’umwuka n’iby’umubiri.
Tuzamushyigikira mu gukomeza gushyira ku isonga Conference yacu n’ uhageze abone koko ibigaragaraza ko ari Conference umubyeyi.”

Mu bishishikaje cyane itorero EMLR,nk’uko Musenyeri Samuel Kayinamura yabigarutseho,harimo guharanira ko ibitaro bya Kibogora byava ku rwego rwa 2 rw’ibitaro byigisha bikajya ku rwego rwa mbere, bigasanga CHUB, CHUK n’ibya Kanombe.

Musenyeri Samuel Kayinamura ari kumwe n’abapasitoro n’abandi bayobozi mu ifoto y’urwibutso

2 barobanuriwe kuba abapasitoro buzuye

3 banjiye mu bamenyerezwa umurimo wa gipasitoro

Hanashimiwe ababaye indashyikirwa

@Rebero.rw

About The Author