Kuri uyu munsi tariki ya 22 Ukuboza 2025, mu kigo cya Polisi gihugura cya Gishari hasojwe amahugurwa y’abapolice bato 1903 barimo abakobwa 359 n’abahungu 1.544 bakaba bari baratangiye aya mahugurwa mu kwezi kwa Mata uyu mwaka.
Urwego rushinzwe igorora (RCS) narwo rwari rufitemo abagera kuri 40 nabo basoje ayo masomo,iri shuri rikaba ryaratangiranye abanyeshuri 1748, abasoje ni 1725 kuko 23 batabashije kurangiza kubera ko batashoboye gukurikirana amasomo, uburwayi ndetse n’imyitwarire itajyanye n’indangagaciro za Polisi y’U Rwanda.
Abanyeshuri 178 batorejwe muri National Police College Musanze aho barimo kwiga amasomo ya Kaminuza mu mwaka wa mbere mu mashami atandukanye nko mu ishami ry’amategeko, Ikoranabuhanga, Itumanaho ndetse n’ishami ryigisha igipolisi cy’umwuga.
Muri uyu muhango wo gusoza amasomo bari bamazemo amezi berekanye uko bashobora guhosha imyigaragambyo mu gihe yaba ibaye rikaba ari rimwe mu masomo babashije kwiga ndetse n’ibijyanye no kumasha (Kurasa), bityo baza gusoreza ku karasisi kashimishije abayobozi bari bitabiriye uyu muhango.
Umuyobozi w’Ishuri rya Gishari Commissioner of Police (CP) Robert Niyonshuti yashimiye ubwitange aba banyeshuri bakoranye byatumye babasha kurangiza ndetse ashimira n’inzego zitandukanye zabashije gutuma aya masomo agenda neza, akaba yashoje ashimira abahize abandi muri aya masomo.
Agira ati: “Dushingiye ku murava bagize mu mezi 9 bamaze mu ishuri, bakanatsinda amasuzuma bumenyi muri disipuline ntagererannywa yabaranze, dufite icyizere ko bazakora akazi kabo neza”.
Umushyitsi mukuru akaba na Minisitiri w’Umutekano mu gihugu Dr. Biruta Vincent yashimye uburyo abanyeshuri batsinze ndetse anashimira Guverinoma idahwema gushyira umutekano imbere kuko ariyo nkingi y’amahoro.
Agira ati: “ Yatangiye ashima uburyo uburyo hinjiye abapolice bato muri Polisi y’u Rwanda aho baje gufatanya n’abandi mu gucunga umutekano w’abaturage, umutekano ugomba guhora imbere bitewe n’amateka igihugu cyacu cyaciyemo, ibi byose bigerwaho kubera gukorera hamwe n’umutekano w’abanyarwanda”.
Yakoje avuga ko kugira ngo dukomeze inzira y’iterambere bisaba guhora dusigasira umutekano w’u Rwanda, abapolice bahagije kandi bakora kinyamwuga, bafite ubumenyi ubushobozi n’imyifatire myiza, bikomoka ku mahugurwa nkayasojwe uyu munsi kimwe n’ayandi atandukanye ahabwa abapolisi.
Abaririmbyi ba Polisi y’U Rwanda nibo bayoboye akarasisi
Berekanye uburyo bashobora gushosha imyigaragambyo kuko biri mu masomo bahigiye
Aha niho bigiraga kumasha(Kurasa) bimwe mu masomo bahakuye yo gucunga umutekano neza
Abahize abandi bahembwe muri batatu bambere nkuko bisanzwe
@Rebero.rw
About The Author
