Aba ni 97 b'imirenge ya Mahembe na Karambi na bake ba Rangiro batemberejwe pariki ya Nyungwe
Kuva ku wa mbere tariki ya 16 Nzeri kugera ku wa 6 Tariki ya 21 Nzeri, ubuyobozi bwa pariki y’igihugu ya Nyungwe buri kuyitembereza komite nyobozi z’imidugudu yose ituriye iyi pariki zo mu turere twa Rusizi na Nyamasheke,basura ibyiza biyitatse birimo ikiraro kiri mu bushorishori bwayo( Canopy walk way).
Ni igikorwa ngarukamwaka kuva muri 2022 nk’uko Rebero.rw yabitangarijwe n’umukozi w’iyi pariki ushinzwe kuyihuza n’abaturage mu mirenge ya Bushekeri,Ruharambuga na Karengera Kabalisa Prospère,akavuga ko cyatangiriye ku bayobozi ku rwego rw’akarere mu turere twa Karongi,Rusizi,Nyamasheke,Nyamagabe na Nyaruguru iyi pariki ibarizwamo,hakurikiraho abo ku rwego rw’imirenge,aba ni bo bari batahiwe.
Yagize ati’’ Ni abafatanyabikorwa b’ingenzi ba pariki ya Nyungwe. Ntacyo twakora ngo kigende neza hatarimo uruhare rwabo,ni yo mpamvu twahisemo kubabwira ibitari mu magambo gusa, turanayibatembereza,dore ko abenshi muri bo nubwo bakuze, ni ubwa mbere bari bayikandagiyemo nubwo bayituriye.’’
Bahabwa ibisobanuro binyuranye ku biyibonekamo
Avuga ko mbere yo kuyinjiramo bayibasobanuriye neza, imiterere yayo,ibyiza nyaburanga ibumbatiye bihogoza amahanga,birimo amoko meza y’inyonyi ,ibimera n’inyamaswa utasanga ahandi, ari byo byanatumye ubu iri mu murage w’isi, nk’abanyarwanda bakaba bakwiye kubyishimira cyane.
Ikindi cyatumye bahitamo kubazana ni ukugira ngo, nubwo bari basanzwe basabwa uruhare rwabo n’urw’abo bayoboye mu kuyibungabunga, barusheho banabanje kuyibona neza, barwanye abayihigamo,abayitwika n’abandi bagizi ba nabi bashobora kuyangiza bigatuma amadovize yinjiraga ahindukira akabubakira amashuri,amavuriro, bakabona amazi meza n’ibindi, ibikorwa bibi by’abangizi bitabibavutsa.
Mu kiganiro bamwe muri bo bahaye Rebero.rw, bishimiye kugera bwa mbere muri iyi pariki nyamara bavukiye iruhande ariko batari baragize amahirwe yo kugeramo.
Nyirangomituje Berthe w’imyaka 58, umukuru w’umudugudu wa Bigari,akagari ka Nyakavumu mu murenge wa Mahembe,yavuze ko yayivukiye iruhande ariko ku myaka 58 ni bwo ayikandagiyemo.
Nubwo yavukiye hafi ya Nyungwe Nyirangomituje Berthe ayikandagijemo ikirenge Ku myaka 58,yuzukuruje.
Ati’’ Nduzukuruje,mfite abuzukuru 5,ni bwo nyikandagiyemo. Kuva iwanjye kugera aho itangiriye muri Mahembe ni isaha 1 ariko kuko bajyaga batubwira ko uzayifatirwamo azahanwa, twarayitinye tukajya twumva kuyigeramo bibujijwe.’’
Yavuze ko yishimiye kugera ku kiraro yajyaga yumva akibaza niba azakirebesha amaso akabona nta nzira byacamo,ariko kubera imiyoborere myiza irangajwe imbere na perezida Kagame uretse kukirebesha amaso anakigenzeho, bikaba byamuhaya imbaraga zo gushishikariza abandi kuyisura no kuyibungabunga.
Uwamurengeye Laurence ushinzwe imiyoborere myiza mu mudugudu wa Rugomero,akagari ka Jurwe,umurenge wa Rangiro, na we ati’’ Ku myaka 43,mbyaye gatanu, ni bwo ndikandagijemo ikirenge.
Nabonye utunyamaswa twiza najyaga mbona ku makayi n’ibitabo, mbona ibyasti birimo icyitwa umukipfo najyaga numva ngo ufasha abagore batwite kubyara neza ,mbona ba mukerarugendo b’abanyamahanga benshi twahahuriye,n’ibindi. Ndishimye bitavugwa,ntawakwangiza iri shyamba ndeba.’’
Babihurijeho na Mukamana Floride na we ushinzwe imibereho myiza mu mudugudu wa Cyivugiza,akagari ka Rushyarara,umurenge wa Karambi,ushimira perezida Kagame,ko ari we utuma n’abadafite amafaranga yo gusura ibyiza bitatse igihugu babisura.
Bishimiye kuyigenda bamwe ari bwo mbwa mbere bahakandagiye
Ati’’ Byose turabikesha perezida Kagame duherutse kongera kwitorera. Kubona natwe bo mu midugudu tubona ibi byiza abakurambere bacu bapfuye batabonye? Badutwaye mu modoka,baratugaburira, turaza twirebera ibi byiza,turifotoza reka sinakubwira, none turatashye. Dutinze kugera mu ngo ngo tubwire abana n’abo twubakanye aho tuvuye. Imana izahore irinda uRwanda umugizi wa nabi wese“.
Bose bahize kurushaho kuyibungabunga, kuzageza ku bo bayobora iby’urugendo rwabo, no kuzabashishikariza kugira igihe bazajya bikokora bakajyana abana bakayisura kuko iragendwa.
Si abayobozi gusa iyi ihatembereza,kuko n’abanyeshuri bayituriye,bari mu makalabu yo kurengera ibidukikije bayisura nk’uko na byo bivugwa na Kabalisa Prospère,buhoro buhoro n’abaturage basanzwe bakazagera ubwo bayitemberezwa bitewe n’uburyo bazaba bagaragaza ko bayicungiye umutekano n’amadovizi yinjira.
Aha bari bageze ku kiraro cyo mu bushorishori bwa Nyungwe
Kugenda ku kiraro cyo mu bushorishi bwa Nyungwe ngo abenshi bari baraye badasinziriye babirota
@Rebero.rw
About The Author
