Mu gihe isi ikomeje guhangana n’ingaruka z’imihindagurikire y’ibihe, u Rwanda rwashyizeho ingamba zigamije kugabanya imyuka ihumanya ikirere, by’umwihariko iya dioxyde de carbone (CO₂), ikomeje kwiyongera buri mwaka.
Imibare igaragaza ko imyuka ihumanya ikirere yoherezwa mu kirere mu Rwanda yiyongeraho toni zigera kuri miliyari 5 buri mwaka, ibintu bishobora kugira ingaruka ku buzima bw’abaturage, ubuhinzi, amazi ndetse n’ibidukikije muri rusange.
Mu rwego rwo gushyigikira amasezerano mpuzamahanga agamije kurwanya imihindagurikire y’ibihe, u Rwanda rwihaye intego yo kugabanya imyuka ihumanya ikirere ku rugero rwa 38% bitarenze mu mwaka wa 2030. Ibi bivuze kugabanya imyuka ingana na toni miliyoni 4,6 za CO₂ ugereranyije n’iyo byari biteganyijwe ko izaba yoherezwa mu kirere mu gihe nta ngamba zifatwa.
Iyi ntego iri mu murongo wa gahunda y’u Rwanda yo kubaka ubukungu butangiza ibidukikije no guteza imbere iterambere rirambye. Mu ngamba zashyizwe imbere harimo kongera ingufu zisubira, guteza imbere ubwikorezi budahumanya ikirere, kubungabunga amashyamba no kongera ibikorwa byo gutera ibiti, ndetse no guteza imbere ubuhinzi butangiza ibidukikije.
Abashinzwe ibidukikije bavuga ko kugira ngo izi ntego zigerweho bisaba uruhare rwa buri wese, kuva ku nzego za Leta, abikorera kugeza ku baturage, binyuze mu kugabanya ibikorwa byangiza ibidukikije no gukoresha ikoranabuhanga rirengera ikirere.
U Rwanda rukomeje kandi gushaka inkunga n’ubufatanye mpuzamahanga kugira ngo rushobore gushyira mu bikorwa imishinga itandukanye izafasha kugabanya imyuka ihumanya ikirere no guhangana n’ingaruka z’imihindagurikire y’ibihe. Ibi bikaba biri mu rwego rwo kurinda ubuzima bw’abaturage no kubaka ejo hazaza harambye ku bisekuru bizaza.
@Rebero.rw
About The Author
