Ikipe y’Igihugu y’u Rwanda y’abatarengeje imyaka 18 mu mukino wa Basketball yatangiye nabi imikino ya FIBA U18 AfroBasket 2026 iri kubera muri Côte d’Ivoire, nyuma yo gutsindwa na Sénégal amanota 78-38 mu mukino wo mu Itsinda C.
Sénégal yagaragaje ubukana kuva umukino utangiye, ibasha kugenzura umukino kugeza ku munota wa nyuma, ibintu byayihesheje intsinzi y’amanota 40.
Nubwo u Rwanda rwagerageje guhangana, ntirwashoboye guhangana n’imbaraga z’iyi kipe ifite amateka akomeye muri Basketball nyafurika y’abato.
Iyi ntsinzi ikomeje gushimangira ubukana bwa Sénégal mu gihe ihuye n’u Rwanda muri iri rushanwa. Mu mukino uheruka guhuza aya makipe, wabaye ku wa 29 Kanama 2018 mu FIBA U18 African Championship yabereye muri Mali, Sénégal na bwo yari yatsinze u Rwanda amanota 99-70.
Uyu mukino wari uwo mu Itsinda B, aho Sénégal yigaragaje nk’imwe mu makipe akomeye muri iryo rushanwa.
Nyuma yo gutsindwa umukino wa mbere, u Rwanda rurasabwa kwisuganya mu mikino itaha y’itsinda kugira ngo rugire amahirwe yo gukomeza mu cyiciro gikurikiraho.
Ku rundi ruhande, Sénégal itangiye neza urugendo rwo gushaka igikombe, yerekana ko ikiri mu makipe ahabwa amahirwe yo kugera kure muri FIBA U18 AfroBasket 2026 iri kubera muri Côte d’Ivoire.
@Rebero.rw
About The Author
