Minisitiri Musoni Paula yagaragaje ko Afurika ikwiye kwimuka ku mishinga mito y’ikoranabuhanga ry’ubwenge buhangano (AI) ikagera ku bisubizo binini kandi bishobora gukoreshwa ku rwego rwagutse, mu rwego rwo kwihutisha impinduka mu ikoranabuhanga no kongera ubushobozi bw’umugabane bwo kwigenga muri uru rwego.
Ibi Minisitiri Musoni yabigarutseho ku ruhande rw’Inteko Rusange ya 81 y’Umuryango w’Abibumbye (UNGA 81), ubwo yitabiraga ibiganiro byateguwe na World Economic Forum’s Centre for AI Excellence, byibanze ku bwigenge bwa Afurika mu bijyanye na AI, ibikorwaremezo ndetse n’impinduka z’ikoranabuhanga ku mugabane.
Muri ibi biganiro, Minisitiri Musoni yagaragaje ubunararibonye bw’u Rwanda mu guteza imbere ikoranabuhanga, ashimangira ko Afurika ikeneye ubufatanye hagati y’ibihugu kugira ngo habeho ibisubizo bya AI bishobora gukoreshwa ku buryo burambye kandi bikagera ku baturage benshi.
Yagaragaje ko ubwo bufatanye bukwiye kwibanda ku bintu birimo amakuru (data), ubushobozi bwo kubara no gutunganya amakuru (compute), ingufu, ubumenyi n’ubushobozi bw’abantu, ndetse no gushyiraho uburyo bw’ikoranabuhanga bushobora gukorana hagati yabwo (interoperable frameworks).
Minisitiri Musoni kandi yashimangiye ko Afurika ikwiye kugira uruhare mu gufata ibyemezo bijyanye n’ikoreshwa rya AI, kugira ngo ibihugu by’umugabane bigumane ubushobozi bwo kugena uburyo iri koranabuhanga rikoreshwa n’ibyo rigamije kugeraho.
Yavuze ko ubumenyi n’ubushobozi bw’abantu ari inkingi ikomeye y’ubwigenge bwa Afurika mu bijyanye na AI. Kubyubakira ubushobozi, nk’uko yabigaragaje, bizafasha ibihugu bya Afurika guteza imbere no gukoresha ibisubizo bya AI bihuye n’ibyo abaturage babyo bakeneye.
Ibi kandi bishobora gufasha AI kutaba ikoranabuhanga rikorwa ku rwego rw’imishinga yihariye gusa, ahubwo rigakoreshwa mu gukemura ibibazo bifatika by’abaturage no gushyigikira iterambere ry’ibihugu.
Ibiganiro byabereye ku ruhande rwa UNGA 81 byagarutse ku buryo Afurika yakongera ubushobozi bwayo mu ikoranabuhanga rya AI, binyuze mu gushora mu bantu, ibikorwaremezo, amakuru n’ubufatanye bw’ibihugu, mu gihe buri gihugu gikomeza kugira uruhare mu kugena uburyo AI ikoreshwa mu gihugu cyacyo.
@Rebero.rw
About The Author
