Kuva kuri uyu wa Mbere, tariki ya 06 Ukwakira 2026, mu Murwa Mukuru wa Kenya, Nairobi, hatangiye Inama ya 10 ya Komisiyo Ihoraho ihuriweho n’u Rwanda na Kenya ishinzwe ubufatanye (Joint Permanent Commission for Cooperation – JPCC).
Iyi nama izamara iminsi itatu, ikaba yahuje intumwa z’impande zombi ziyobowe n’abayobozi bakuru muri Minisiteri z’Ububanyi n’Amahanga z’ibihugu byombi.
Mu gihe cy’iyi nama, impande zombi ziteganyijwe gusuzuma ishusho rusange y’ubufatanye busanzwe hagati y’u Rwanda na Kenya, harebwa ibyagezweho mu masezerano yari yasinywe mu nama ya 9 ya JPCC, ndetse n’imbogamizi zikigaragara.
Biteganyijwe kandi ko hazaganirwa ku ngingo nshya zigamije kurushaho kwagura no gukomeza umubano mwiza usanzwe hagati y’ibihugu byombi, cyane cyane mu nzego z’ingenzi zirimo:
- Ubucuruzi n’ishoramari
- Ubwikorezi n’ibikorwa remezo
- Uburezi, ubuzima n’ikoranabuhanga
- Umutekano n’ubutwererane mu karere ka Afurika y’Iburasirazuba
Inama ya JPCC ni urubuga rukomeye ibihugu byombi byashyizeho mu rwego rwo gushimangira diplomasi n’ubufatanye mu iterambere. U Rwanda na Kenya bisanzwe bifitanye umubano mwiza ushingiye ku mateka, ubucuruzi ndetse no kuba bihuriye mu Muryango wa Afurika y’Iburasirazuba (EAC).
Biteganyijwe ko iyi nama izasozwa ku wa Gatatu hasinywa amasezerano mashya n’ingamba zifatika zigamije guteza imbere imibereho y’abaturage b’ibihugu byombi.
@Rebero.rw
About The Author
