Umunyamabanga wa Leta muri Minisiteri y’Uburezi, Irere Claudette, yasabye abakozi bo mu nzego za Leta barangije amasomo muri African Leadership University (ALU) gukoresha ubumenyi n’ubushobozi bungutse mu guteza imbere imitangire ya serivisi no kubaka ibigo bakorera.
Irere yabitangaje mu muhango wo gusoza icyiciro cya kane cya porogaramu y’amahugurwa ahabwa abakozi bo mu nzego za Leta, yitabiriwe n’abantu 34 baturutse mu bihugu 14 bya Afurika.
Muri abo barangije, harimo Abanyarwanda batandatu, basoje amasomo nyuma y’amezi icyenda bamara mu mahugurwa agamije kongerera abakozi bo mu nzego za Leta ubumenyi n’ubushobozi mu miyoborere.
Umunyamabanga wa Leta yashimiye abasoje iyi gahunda, abasaba kudasiga ubumenyi n’ubushobozi bungukiye muri ALU mu byumba by’amahugurwa, ahubwo bakabushyira mu bikorwa aho bakorera.
Yabasabye gukoresha ibyo bize mu kunoza imitangire ya serivisi, gukemura ibibazo bihari no kugira uruhare mu kubaka ibigo bakorera.
Abasoje porogaramu bageze ku 140
Iyi porogaramu yatangiye mu 2022, aho igamije guteza imbere ubushobozi bw’abakozi bo mu nzego za Leta, cyane cyane mu bijyanye n’imiyoborere, kuyobora impinduka no gukemura ibibazo mu buryo burambye.
Kuva yatangira, abagera ku 140 baturutse mu bihugu 20 bya Afurika bamaze kuyinyuramo.
Iki cyiciro cya kane cyitabiriwe n’abakozi baturutse mu bihugu 14, bigaragaza ko iyi gahunda ikomeje guhuza abakozi bo mu nzego za Leta baturuka mu bice bitandukanye bya Afurika kugira ngo bungurane ubumenyi n’ubunararibonye.
Abasoje amasomo basabwe gukoresha ubumenyi bungutse mu kuzana impinduka zifatika mu kazi kabo, kunoza imikorere y’ibigo no kugira uruhare mu gutanga serivisi zijyanye n’ibikenewe n’abaturage.
Porogaramu ya ALU igamije kandi gufasha abakozi bo mu nzego za Leta kugira ubushobozi bwo guhangana n’ibibazo by’imiyoborere n’iterambere, ndetse no gushyira mu bikorwa ibisubizo bishobora kugira uruhare mu mpinduka mu nzego bakoramo.
@Rebero.rw
About The Author
