Intumwa z’ikigo ST Engineering cyo muri Singapore zahuriye n’ubuyobozi bwa Polisi y’u Rwanda, baganira ku buryo ikoranabuhanga rigezweho n’ibisubizo by’ikoranabuhanga mu mutekano byafasha kongera ubushobozi bw’inzego z’umutekano mu Rwanda.
Ibiganiro byabaye mu rwego rw’uruzinduko rw’intumwa z’u Rwanda na Singapore rugamije guteza imbere ubucuruzi n’ishoramari hagati y’ibihugu byombi.
Intumwa za ST Engineering zari ziyobowe na Charles Lee, Visi Perezida ushinzwe ibijyanye n’igurisha ku rwego mpuzamahanga mu Burasirazuba bwo Hagati na Afurika, zakiriwe na Komiseri Mukuru Wungirije wa Polisi y’u Rwanda ushinzwe ibikorwa, CP Vincent B. Sano, ari kumwe n’abandi ba komiseri ba Polisi.
Ibiganiro byibanze ku kureba uburyo ikoranabuhanga rigezweho n’ibisubizo ST Engineering ifite mu bijyanye n’umutekano byakoreshwa mu kongera imikorere myiza ya Polisi y’u Rwanda no gushimangira ubushobozi bw’igihugu mu gucunga umutekano.
Iyi nama yabaye umwanya wo kurebera hamwe amahirwe y’ubufatanye mu gukoresha ikoranabuhanga mu kunoza ibikorwa by’inzego z’umutekano no gushakira ibisubizo bigezweho ibibazo bijyanye n’umutekano w’igihugu.
Uruzinduko rw’intumwa za Singapore mu Rwanda rugamije guteza imbere ubucuruzi n’ishoramari, binyuze mu guhuza ibigo n’inzego z’ibihugu byombi no kureba amahirwe y’ubufatanye mu nzego zitandukanye.
@Rebero.rw
About The Author
