Izi sitasiyo, imwe iri i Kigali, indi iri i Muhanga, hakaba hateganyijwe n’izindi i Huye na Rubavu.
Sosiyete ikora ikanacuruza imodoka z’amashanyarazi mu Rwanda yatangaje ko yishimiye kwakira bisi nshya z’amashanyarazi zifite ubushobozi bwo gukora ingendo ndende mu gihugu hose, zikagaruka i Kigali zidasabye kongera gusharijwa mu nzira.
Izi bisi zije mu gihe u Rwanda rukomeje gushyira imbaraga mu guteza imbere ubwikorezi butangiza ibidukikije no kugabanya ikoreshwa ry’ibikomoka kuri peteroli.
Ubuyobozi bw’iyi sosiyete buvuga ko izi bisi zifite bateri zifite ubushobozi bwo kubika umuriro uhagije ku buryo zishobora gukora ingendo ziva i Kigali zikagera mu ntara zitandukanye z’igihugu, nyuma zikagaruka zitarasabwa gusharijwa hagati mu rugendo.
Bwagaragaje ko iri koranabuhanga rigiye gukemura imwe mu mbogamizi zajyaga zigarukwaho n’abatwara abantu n’ibintu, zirimo impungenge z’aho imodoka z’amashanyarazi zishobora kugera n’igihe zimara zikora zitarasharijwa.
Umuyobozi w’iyi sosiyete yavuze ko kwakira izi bisi ari intambwe ikomeye mu rugendo rwo guteza imbere ubwikorezi burambye mu Rwanda.
Yagize ati: “Twishimiye kwakira izi bisi zifite ubushobozi bwo gukora ingendo ndende. Zishobora kuva i Kigali zikagera mu bice bitandukanye by’igihugu, zikagaruka zidasabye kongera gusharijwa mu nzira. Ibi biratanga icyizere ku bakoresha ubwikorezi rusange no ku bashoramari bifuza gushora imari muri uru rwego.”
Bisi 18 nshya zifite ubwo bushobozi bwo kugera mu Rwanda hose, ziri i Kigali, zikaba zarahasanze izindi, maze zose hamwe ziba 66. Gahunda ni ukugira bisi ijana uyu mwaka, ndetse no kugira bisi 1000 muri Afurika y’i Burasirazuba, muri iyi myaka itatu.
Abasesenguzi mu rwego rw’ubwikorezi bavuga ko izo bisi zishobora gufasha kugabanya amafaranga akoreshwa ku mavuta, kugabanya imyuka ihumanya ikirere ndetse no kongera icyizere cy’abakoresha imodoka z’amashanyarazi.
Guverinoma y’u Rwanda ikomeje gushyiraho ingamba zitandukanye zigamije guteza imbere ikoreshwa ry’imodoka z’amashanyarazi, zirimo korohereza abashoramari, kubaka ibikorwa remezo byo gusharijiraho no gukuraho imisoro imwe n’imwe ku binyabiziga bikoresha amashanyarazi.
Iyi Kampani, ikorana n’Ikigo cyo mu Bushinwa gikora amabisi. Gipakira ibyuma by’amabisi muri Konteneri, hanyuma abakanishi b’inzobere bize mu Bushinwa, bakaziteranyiriza Nairobi muri Kenya, aho zipakirwa zikazanwa mu Rwanda
Abakurikiranira hafi uru rwego bemeza ko kwinjira kw’izi bisi zifite ubushobozi bwo gukora ingendo ndende bishobora gutuma ubwikorezi rusange bukoresha amashanyarazi burushaho kwaguka, bityo bikagira uruhare mu rugamba rwo kugabanya imyuka yangiza ikirere no guteza imbere ubukungu butangiza ibidukikije.
@Rebero.rw
About The Author
