Rusizi: Akarere na Diyoseze gatolika ya Cyangugu bahaye iminsi mikuru isoza umwaka abana 650 bakuwe mu muhanda

Abana 650 bakuwe mu muhanda na Diyoseze gatolika ya Cyangugu ifatanyije n’akarere ka Rusizi,bagasubizwa mu ishuri,ku wa mbere tariki ya 30 Ukuboza bahawe Noheli banifurizwa umwaka mushya muhire wa 2025 na Musenyeri Edouard Sinayobye,umushumba wa Diyose gatolika ya Cyangugu n’umuyobozi w’akarere ka Rusizi w’agateganyo wungirije ushinzwe imibereho myiza y’abaturage,Uwimana Monique n’abandi bayobozi.

Byabanjirijwe n’igitambo cya misa cyaturiwe kuri katedarali gatolika ya Cyangugu na Musenyeri Edouard Sinayobye wabifurije ubuzima bwiza, kwiyumvamo ingirakamaro no guharanira guhindura amateka y’imibereho yabo, hakurikiraho impanuro z’abayobozi n’ubuhamya bwa bamwe muri aba bana, bagaragaza ingorane bahuye na zo mu buzima bwabo n’uburyo bagerageza kuzirenga.

Aba bana,nk’uko byavuzwe na Mukaruyonza Gloriose na Soeur Marie Claudine Niyongere bakurikirana ubuzima bwabo umunsi ku wundi, ngo akenshi baba bafite ihungabana baterwa n’ibyababayeho mu buzima batashatse ubwabo, bigatuma rimwe na rimwe bumva biyanze kubera guhohoterwa n’ubonetse wese bitewe n’ibikorwa baba barimo by’ubujura,urugomo n’ibindi baterwa n’iyo mibereho mibi.

Gloriose Mukaruyonza na Soeur Marie Claudine Niyongere bashinzwe kwita ku bana bakuwe mu muhanda,bavuga iby’imibereho y’ubwihebe aba bana bacamo

Ari yo mpamvu bashimira cyane Musenyeri Edouard Sinayobye ,ba malayika murinzi bemeye kurerera bamwe mu miryango yabo n’abandi bose bagize icyo bakora ngo aba 650 bagaruke mu buzima bwiza.

Mukaruyonza Gloriose ati’’ Turashimira byimazeyo Musenyeri Edouard Sinayobye wagize igitekerezo cyo gukangurira buri wese w’umutima w’ubumuntu kumva uburemere bw’imibereho mibi yaba bana,bagakurwa mu buzima bwo mu muhanda,bakagarurwa mu mashuri no mu miryango yabo,abandi bakitabwaho na ba Malayika murinzi, n’abatarabona aho baba bakaba bahashakirwa.’’

Yavuze ko byose bitagerwaho hatari imiyoborere myiza, ashimira umukuru w’igihugu Paul Kagame urangaje imbere iyi miyoborere myiza yita kuri buri wese, ituma umwana wahoze mu muhanda yiga ingeso mbi,ahinduka akaba icyizere cy’ejo hazaza, asaba ko n’abandi bagenda bawubonekamo kubera mpavu zitandukanye, hajya habaho uburyo bahita bawukurwamo batarangirika ku mubiri no mu ntekerezo.’’

Undi ushimirwa cyane ni padiri Uwingabire Emmanuel,umuyobozi wa GS Saint Paul Muko mu murenge wa Bugarama na padiri Bikorimana Silas uyobora GS Saint Bruno mu wa Gihundwe, bafite umubare munini w’aba bana mu mashuri bayobora, uburyo babitayeho bakabahindura ab’akamaro mu gihe ubwabo biyumvaga nkakahebwe.

Padiri Uwingabire Emmanuel umwe mu bashimirwa cyane kwitangira aba bana

Hanashimwa ba Malayika murinzi bareze neza abo bahawe,batagamije kubariraho, n’abandi b’umutima mwiza basabwa umusanzu wabo mu bikorwa nk’ibi by’urukundo n’impuhwe.

Mu buhamya bw’abana 3 mu bawuvuyemo, nyuma yo kuvuga ubuzima busharira banyuzemo n’impamvu za buri wese, bashimiye cyane abitanze bose ngo ubuzima bwabo bugaruke I buntu,bizeza kuzavamo ingirakamaro.

Hamaza Scophilde wiga mu yisumbuye muri GS Saint Bruno ati’’ Twabayeho ubuzima bw’umwijima ariko turashimira Musenyeri Edouard Sinayobye,,ubuyobozi bw’akarere ka Rusizi n’abandi bose batweretse umutima w’impuhwe tuteretswe n’ababyeyi bacu, bakadukura mu muhanda,bakadusubiza mu mashuri,uyu munsi bakaba banaduhaye impano za Noheli bakanawifuriza umwaka mushya muhire wa 2025. N abo bazawurye ntuzabarye.’’

Abana 3 bakuwe mu muhanda bavuga iby’ubuzima busharira banyuzemo

Yijeje ko bazaba abana beza, baziga neza bakazigirira akamaro bakazanakagirira abandi, mu bizabashishikaza mu buzima bwabo kwita ku bana bazaba bari nk’uko bo bahoze bikazaza imbere,kuko aho bakuwe,bagomba byanze bikunze kuzahakura abandi bakomeza kugenda bahisanga.

Umuyobozi w’akarere ka Rusizi w’agateganyo wungirije ushinzwe imibereho myiza y’abaturage,Uwimana Monique na we yashimiye byimazeyo Musenyeri Edouard Sinayobye imbaraga yashyizemo,ku bufatanye n’akarere akabasha kurokora aba bana 650,bakaba biga neza, imibereho yabo yarahindutse.

Ati’’ Nk’akarere turabizeza ubufatanye bukomeye kuri aba bana nk’uko twakomeje kujyanamo mu gukurikirana ibibazo byabo,birimo n’ibituruka mu miryango yabo n’abandi bakiwurimo kuko urugendo rukomeje“.

Umuyobozi w’agateganyo w’akarere ka Rusizi wungirije ushinzwe imibereho myiza y’abaturage Uwimana Monique yashimiye Musenyeri Edouard Sinayobye iki gikorwa cy’indashyikirwa cyo gukura abana mu muhanda bagasubizwa mu mashuri, bakahabwa iminsi mikuru

Yavuze ko akarere gafite ingamba zo gukomeza guhangana n’amakimbirane yo mu miryango,nyirabayazana w’ibi bibazo byose, abatagira ababitaho bakazakomeza gushakirwa ababyeyi b’umutima wa kimuntu babakira, buri mwana wese uvutse akabera inyungu igihugu aho kukibera umutwaro.

Musenyeri Edouard Sinayobye,yabwiye abitabiriye ibi birori bose ko,nta yandi mahitamo bafite,bagomba gukora ku buryo buri mwana agira imibereho myiza, abo bagize umuhanda ubuzima bwabo bakawukurwamo, bagahumurizwa,bakerekwa urukundo n’impuhwe kuko abana bose Imana yo ibakunda kimwe.

Ati’’ Twishimiye guha Noheli abana bacu bakuwe mu bizima bubi bwo mu muhanda n’abagenda babuvamo. Umunsi nk’uyu twawugize ngarukamwaka,ubu ni ubwa 3 tuwizihiza. Guhuza abana,kubahanura,kubatega amatwi ,kunoza imigambi myiza yo kubarera, gusangira Noheli n’ubuzima bwabo, n’imigambi bafite,turabishimira Imana cyane.’’

Musenyeri Edouard Sinayobye avuga ko nta yandi mahitamo ku bana bo mu muhanda, bagomba gukurwamo bagashakirwa imibereho iboneye

Yakomeje ati’’ Aba bana baduhanze amaso, baratubona tugenda,tubacaho aho bari,bakareba uko tubareba,ijisho tubarebesha. Iyi gahunda yo kubitaho isanzwe iri mu bantu beza bose no mu nshingano z’umuryango w’Imana idufasha kubareba ijisho ryiza,tutababonamo ibibi n’ibyago bagize byatuma tubahunga tukabaha akato cyangwa tukababona nk’abantu bihebye.’’

Yavuze ko ibyo bakorerwa byose babibona ari yo mpamvu bakwiye gukorerwa ibyiza kugira ngo bazabikorere abandi,asaba buri wese gushyira imbaraga mu kubitaho,ko nta mahitamo yandi ahari uretse ayo kubashakisha,bagasubizwa mu buzima bwiza burimo amashuri n’indi mibereho myiza ibereye koko ikiremwa muntu.

Gahunda yo guha abana bakuwe mu muhanda Noheli no kubifuriza umwaka mushya muhire yatangiye muri 2022. Abana baraganirizwa,bakerekana impano zabo, bagasabana n’abayobozi n’ababyeyi babo,bagahabwa impano,n’ibindi byiza biba byahawe n’abandi bana bagize amahirwe yo kubana mu miryango yabo batekanye.