Nyamasheke: EAR/Diyoseze ya Cyangugu  yahaye imiryango irenga 140 itishoboye iby’agaciro k’arenga 27.000.000

Abaturage barenga 140 b’imirenge ya Shangi, Rangiro,Cyato,Ruharambuga na Karengera mu karere ka Nyamasheke bari bafite ibibazo birimo iby’isakaro,amatungo,imirasire y’izuba,sima,n’ibindi barashimira itorero EAR/Diyoseze ya Cyangugu yabibakemuriye,bijyanye n’icyumweru cy’umuryango cyateguwe n’ubuyobozi bw’aka karere n’abafatanyabikorwa bako.

Ibyatanzwe byose bifite agaciro k’amanyarwanda arenga 27.000.000 nk’uko Rebero.rw yabitangarijwe na Ngirinshuti Jonas,umuyobozi w’ishami ry’imibereho myiza muri iyi Diyoseze, mu cyumweru cy’umuryango cyatangiye ku wa 27 Nzeri kigasozwa ku wa 3 Ukwakira,2025.

Mu byatanzwe,hari imiryango 20 yo mu mudugudu wa Muyugiri,umurenge wa Cyato yahawe imirasire y’izuba,imiryango 24 yo mu mirenge ya Rangiro na Shangi yahawe ingurube, imiryango 72 yo mu mirenge ya Rangiro na Karengera yabaga mu nzu zenda kuyigwaho yahawe amabati,aho buri muryango wahawe amabati 25,imiryango 26 ihabwa sima zo gupavoma inzu zayo.

Abahawe ingurube bo mu murenge wa Rangiro

Akomeza anavuga ko muri icyo cyumweru,banafashije abahagarariye imiryango 289 mu nyigisho zitandukanye  ziyifasha kwiteza imbere,n’amatsinda 8 akora ubudozi yo mu murenge wa Ruharambuga  ahabwa  imipira yo kuboha n’imashini zidoda.

 Hanakozwe ubukangurambaga mu rubyiruko bwo kwirinda no kurwanya ibiyobyabwenge n’inda ziterwa abangavu,inyigisho zo guhangana n’ibibazo by’amakimbirane yo mu miryango, n’ibindi.

Ati’’ Ibyo twatanze byose ubiteranije bifite agaciro k’arenga 27.000.000. Ni agaciro faranga k’ubufasha bwatanzwe na Diyoseze. N’uruhare rw’abaturage,n’ubwo rwo rutabazwe mu mafaranga, rwabaye ndashyikirwa, kuko bigaragara ko iyo umuntu agize uruhare mu bimukorerwa arushaho kubiha agaciro.’’

Avuga ko kwita ku batishoboye ari inshingano iri torero rihabwa n’ijambo ry’Imana,  bikazakomeza, agasaba abagira icyo bahabwa kugifata neza kikababera inyungu, nk’abahawe amatungo bakihutira kuyashyira mu bwishingizi, ngo iryagira ikibazo ubwishingizi buhagoboke,bakanasabwa kuzayorora neza bakazitura abandi.

Mukakanyana Pascasie wo mu mudugudu wa Uwakagano,umurenge wa Rangiro,mu izina ry’abahawe amabati, yashimiye cyane perezida Kagame bakesha byose, udasiba guharanira iterambere ry’umuturage, badashidikanya ko n’ibi babihawe n’umurongo mwiza yatanze wo kugera k’utishoboye wese akazamurwa.

Abahawe amabati na sima bo mu murenge wa Karengera

Ati’’ Kuba tugiye kubona aho twikinga imvura yatangiye kugwa turabikesha intore izirusha intambwe, umukuru w’igihugu cyacu,Paul Kagame udahwema guharanira imibereho myiza ya buri munyarwanda. Twabaga mu nzu mbi z’amategura tunyagirirwamo. Duhawe amabati,ubuzima bugiye guhinduka dutahe heza, dushima Imana n’ubuyobozi bwacu.’’

Manirareba Pierre wo mu mudugudu wa  Gasovu,akagari kaGakenke,umurenge wa Rangiro,mu izina ry’aborojwe,yavuze ko kubera ko ingurube zororoka cyane muri aka gace,bakaba nta tungo bagiraga,basubijwe.

Ati’’ Dushimiye cyane Musenyeri wa EAR/Diyoseze ya Cyangugu  ugera ikirenga mu cya Nyakubahwa perezida Kagame,akamenya icyo dukeneye akakitugezaho. Tugiye kuzorora neza tuzoroze abandi. Twizeye kuzazigiriraho umugisha.’’

Barabihuriraho na Maniraruta Emmanuel wo mu mudugudu wa Muyugiri, umurenge wa Cyato,uvuga ko baruhutse kurara bamurika ibishirira.

Abahawe imirasire bo mu murenge wa Cyato

Ati’’ Umudugudu wacu n’ubu ntamashanyarazi ugira. Abana bacu ntibabashaga gusubiramo amasomo nijoro,nta cy’ikoranabuhanga twakwikorera kuko byose bigendera ku mashanyarazi. Nta gushyira umuriro muri telefoni ari yo mpamvu benshi babona kuzitunga ntacyo bibamariye. Iyi mirasire igihe kuduhindirira ubuzima, turashima cyane abayiduhaye.’’

Umukuru w’umudugudu wa Gahira,akagari ka Banda,  Munyeshya Vianney,  yunze mu ry’aba baturage,ashimira cyane umukuru w’igihugu,Paul Kagame uzamura abaturage b’impande zose,aho mbere uduce nk’utu tw’icyaro twadindiraga kubera kutamenyekana, ubu bikaba byarahindutse.

Ati’’ Kumva ngo aha mu bice bya Banda,Gakenke na Muyigiri abaturage bazamuwe mu iterambere ntibyashobokaga. Ubu birashoboka kubera imiyoborere myiza ya parezida wacu Paul Kagame. Kumwitura ni ugufata neza ibi byose duhabwa, bikagira aho bidukura n’aho bitugeza mu iterambere. Turanashimira cyane EAR/Diyoseze ya Cyangugu yazamuriye abaturage ubushobozi, tukayizeza kubyaza umusaruro ufatika aya mahirwe.’’

Umushumba wa EAR/Banda akanaba Acidikoni w’ubucidikoni bwa Banda, Rev.Nkiranyabahizi Sylvère,na we yashimiye ubuyobozi bukuru bw’igihugu, ubw’akarere ka Nyamasheke bwateguye iki cyumweru n’ubwa EAR/Diyoseze ya Cyangugu bwacyitabiriye bifatika,kikaba gisize abaturage heza.

Umushumba wa EAR Paruwasi ya Banda, Rév. Nkiranyabahizi Sylvère avuga ko ibi bikorwa bitarangiriye aha.

Ati’’ Urebye nka hano abahawe amabati inzu babagamo,bamwe barinda kwitwikirira imitaka mu nzu imvura iguye, babura aho barambika umusaya, abandi bagahabwa amatungo batagiraga na kamwe, aba Muyugiri bagahabwa imirasire ibakura mu kizima, ni ibyo kwishimira cyane no gushima Imana.’’

Yanashimye ko,nubwo ari igikorwa cy’itorero EAR, abahawe ubufasha atari abaryo gusa,n’abo mu yandi madini n’amatorero  bwabagezeho,akaba ari inshuro ya 2 amabati yari atanzwe,imirasire yo ari ubwa mbere,  ko,akurikije ubushake umwepisikopi w’iyi Diyozese Muhutu Nathan afite bwo gukura habi abagihari, nta gushidikanya ibi bikorwa bidahagarariye aha.

Umuyobozi w’ishami ry’imibereho myiza muri EAR Diyoseze ya Cyangugu, Ngirinshuti Jonas asaba buri wese wagize icyo ahabwa kugisigasira

@Rebero.rw

About The Author