Ubuyobozi bw'akarere ka Karongi n'abafatanyabikorwa bako biyemeje guhuza imbaraga bagakura abaturage mu bukene bakiburimo.
Abafatanyabikorwa mu iterambere ry’akarere ka Karongi bibumbiye mu ihuriro ryabo (JADF) baravuga ko biyemeje gufasha aka karere gukura abaturage 10.880 munsi y’umurongo w’ubukene,iyi myaka 3 ikazarangira bifasha banashobora gufasha bagenzi babo bazaba bakiburimo.
Byagaragarijwe mu nteko rusange yabahuje n’ubuyobozi bw’aka karere ku wa 6 Ugushyingo, 2025, hagamijwe gusubiza amaso imyuma ngo barebere hamwe ibyakozwe umwaka ushize muri uru rwego,aho bageze muri uyu mwaka n’ibiteganywa gukorwa,byose bikura umuturage ukiri habi mu mibereho,aganishwa aheza.
Atangiza iyi nteko rusange, umuyobozi w’akarere ka Karongi,Muzungu Gerald, yashimiye aba bafatanyabikorwa uburyo bashishikajwe no gufatanya n’ubuyobozi bwako gukura abaturage mu bukene, kuko bigaragara ko bakora byinshi muri uru rwego, bibonekera mu musaruro wigaragaza,binagendeye ku murongo n’icyerekezo cy’igihugu mu gukura abaturage mu bukene.
Umuyobozi w’akarere ka Karongi Muzungu Gerald yasabye abafatanyabikorwa mu iterambere ry’akarere kurushaho gukora byinshi bifasha abakiri mu bukene bukabije kubuvamo
Ati’’ Turebye umusaruro uturuka mu bufatanye bwacu,haba mu bukungu,mu miyoborere n’ahandi, ni ibintu bifatika cyane ariko twanakora ibirenze. Murasabwa gukomeza guhuriza hamwe imbaraga,tukagendera mu murongo w’igihugu w’iterambere mu guteza umuturage wacu imbere.’’
Yabijeje ubufatanye busesuye n’akarere ayoboye, ugize ikibazo kigasuzumwa kigahita gikemurwa kugira ngo intego biyemeje bayigereho,bafatanye guhashya ubukene bukigaragara mu baturage benshi b’aka karere.
Umuyobozi w’ihuriro ry’abafatanyabikorwa mu iterambere ry’akarere ka Karongi (JADF Karongi), Uwiragiye Raymond avuga ko umwaka ushize hakoreshejwe arenga miliyari 8 yatanzwe n’aba bafatanyabikorwa 94, yagombaga gufasha abarenga 9.000 kuva mu bukene bukabije bari barimo.
Ati’’ Isuzuma ryabaye ryagaragaje ko muri abo barenga 9.000, bagombaga gufashwa no gukurikiranwa mu myaka 3, hashize imyaka 2, abagera mu 6.000 bikagaragara ko bazamuka, bitanga icyizere ko umwaka usigaye uzarangira bahagaze neza mu iterambere,banashobora kugira abandi bafasha.’’
Abafatanyabikorwa mu iterambere ry’akarere ka Karongi biyemeje gukura mu bukene abaturage 10.880 uyu mwaka
Avuga ko uyu mwaka hateganijwe gukoresha miliyari 5 n’abafatanyabikorwa 80, bazafasha abaturage 10.880 batangiranye na bo,bazakomeza gufatanya n’akarere gukurikirana,imyaka 3 ikazarangira hari aho hafashijwe kwikura no kugera mu iterambere.
Rebero.rw,imubajije icyo abona gitera ubukene bukabije muri bamwe mu baturage b’aka karere, Uwiragiye Raymond yasubije ko buterwa na byinshi ariko byose ahanini bishingira ku myumvire,aho usanga hari abavuga ko mu miryango yabo nta wigeze akira,ko atari bo bizabaho, bigatuma badakora cyane n’utwo babonye bakadusesagurabasesagura.
Ati’’ Abo kubaganiriza ukabahindura imyumvire biba bihagije kuko ubwenge n’imbaraga zo gukora baba babifite,babuze gusa ubakuramo iyo myumvire ya karande,akabashyiramo imizima iganisha ku iterambere.’’
Ikindi avuga babonye, ni abaturage bitwise guhora bafashwa,ntibashake kubyaza umusaruro ibyo bahawe bibwira ko bazakomeza guhabwa,bikarangira baheze mu bukene kandi bari bafashijwe kubuvamo.
Anagaruka ku butaka buto bwa benshi mu batuye aka karere, n’imihingire ikiri iya gakondo,byakemurwa no guhindura imihingire ikajyana n’ibihe, ikaba iya kijyambere,itangiza ibidukikije.
Umuyobozi w’inama njyanama y’akarere ka Karongi Ngarambe Vedaste avuga ko afite icyizere ko ubufatanye bw’izi zego zombi buzagera ku bifatika bikura abaturage mu bukene
Ati’’ Tuzakora byinshi birimo guhindura imyumvire ya bamwe muri bo ikiri hasi, tubashishikarize gukora cyane, ukeneye ubufasha bumuzamura abuhabwe, bigishwe kwibumbira mu matsinda yo kubitsa no kugurizanya,bahabwe imirimo,bagane ibigo by’imari bizigame,hanakorwe n’ibindi byinshi tubona byaba ingenzi mu gukura umubare munini w’abaturage mu bukene.’’
Yakomeje ati’’ Twabyiyemeje,tuzabigeraho dufatanije twese,abishyize hamwe nta kibananira.’’
Asoza iyi nteko rusange, umuyobozi w’inama njyanama y’aka karere, Ngarambe Vedaste, yagaragaje icyizere ahakuye cyo gukura bariya baturage 10.880 mu bukene bukabije,kimwe n’abandi bose bakiburimo
Ati’’ Uru ni urugamba rutoroshye dufite rwo gukura abaturage bacu mu bukene. Nkurikije uko mwese nababonye,ubushake n’imbaraga mufite, nta kabuza tuzarutsinda.’’
Umuyobozi w’akarere ka Karongi wungirije ushinzwe iterambere ry’ubukungu, Ntakirutimana Julienne yizeza ko ibikorwa byose bikura abaturage mu bukene bizakurikiranwa neza.
Yavuze ko nta yindi nshingano buri muyobozi yahawe n’umukuru w’igihugu iruta iyo gushyira umuturage ku isonga,kandi atarijyaho agikennye cyane,ari yo mpamvu bagomba guhagurukira rimwe, buri wese mu bushobozi bwe,iki kibazo kigakemuka.
Akarere ka Karongi gafite abaturage barenga 300. 000.Abarenga 96% bari mu buhinzi nk’uko bivugwa n’umuyobozi wako wungirije ushinzwe iterambere ry’ubukungu, Ntakirutimana Julienne,uvuga ko muri uku kuzamura abagikennye cyane,ubuhinzi buzibandwaho, cyane ubw’ibirayi no kuvugurura urutoki, hakazanibandwa ku guhanga imirimo myinshi mishya iha akazi benshi.
Anavuga ko muri ibi bikorwa,icyiciro byihariye,nk’urubyiruko,abagore n’abantu bafite ubumuga bazarushaho kwitabwaho, akaboneraho gushimira abazabigiramo uruhare bose ngo uyu muhigo utoroshye weswe.
@Rebero.rw
About The Author
Byiza cyane.
Intambwe nziza kabisa.