Methanol ishobora kwinjira mu nzoga zitujuje ubuziranenge cyangwa zakozwe mu buryo butemewe, ari na yo mpamvu abaturage bakwiye kwirinda kunywa inzoga zidakomoka ahantu hizewe cyangwa zitagaragaza uwazikoze n'ubuziranenge bwazo
Abaganga b’inzobere mu kuvura indwara zo mu mubiri baraburira abaturage kwirinda kunywa inzoga zirimo ikinyabutabire cya Methanol, bavuga ko ari kimwe mu bintu bishobora guteza ingaruka zikomeye ku buzima zirimo guhuma amaso burundu, kwangirika k’ubwonko ndetse no gupfa.
Inzobere mu kuvura indwara zo mu mubiri mu Bitaro bya Kaminuza by’i Kigali (CHUK), Dr. Marcellin Musabende, yavuze ko Methanol ari ikinyabutabire gikoreshwa cyane mu nganda, kidakwiriye kunyobwa kuko umubiri ukigabanyamo ibindi binyabutabire bifite uburozi bukomeye.
Yasobanuye ko iyo umuntu anyweye Methanol, umwijima uyihinduramo formaldehyde na formic acid, ari byo bitera uburozi bukomeye bushobora kwangiza ingingo zitandukanye z’umubiri.
Dr. Musabende yavuze ko amaso ari mu ngingo zibanza kwibasirwa, kuko Methanol ishobora kwangiza umutsi w’ijisho (optic nerve), bikaba byatuma umuntu atabona neza cyangwa agahuma burundu.
Dr. Marcellin Musabende, yavuze ko Methanol ari ikinyabutabire gikoreshwa cyane mu nganda
Dr. Marcellin Musabende yasobanuye ko Methanol itandukanye cyane na Ethanol, nubwo zombi zisa nk’inzoga zifite ibara ritagaragara kandi zifite impumuro isa.
Yavuze ko Ethanol ari yo nzoga iba mu binyobwa bisembuye cyangwa byengwa byujuje ubuziranenge kandi iyo ikoreshejwe mu rugero rutarenze urugero iba yemerewe kunyobwa, nubwo na yo ishobora kugira ingaruka ku buzima iyo ikabije.
Ku rundi ruhande, Methanol ni ikinyabutabire gikoreshwa cyane mu nganda, kirimo izikora amarangi, umuti wo gusukura ibirahure by’imodoka, ibikomoka kuri lisansi n’ibindi bicuruzwa by’inganda. Yashimangiye ko Methanol itagenewe kunyobwa na gato.
Yakomeje avuga ko ubwonko na bwo bushobora kwibasirwa cyane, aho uwanyoye Methanol ashobora kugira umutwe ukabije, urujijo, gucika intege, kugagara, guta ubwenge ndetse no kujya muri koma.
Yagaragaje kandi ko Methanol ishobora guteza ikibazo gikomeye cyo kwiyongera kw’ubusharire mu maraso (metabolic acidosis), bigatuma ibihaha, umutima n’izindi ngingo z’umubiri bidakora neza, bishobora no kuvamo urupfu igihe ubufasha bwihuse butabonetse.
Abanyoye Methanol ishobora kwangiza umutsi w’ijisho (optic nerve), bikaba byatuma umuntu atabona neza cyangwa agahuma burundu
Uyu muganga yavuze ko ibimenyetso by’uburozi bwa Methanol bishobora gutangira nyuma y’amasaha make cyangwa bikagaragara nyuma y’amasaha 12 kugeza kuri 24, bitewe n’ingano umuntu yakoresheje n’uburyo umubiri we wakiriye icyo kinyabutabire.
Yasabye abantu kwirinda kunywa inzoga zitujuje ubuziranenge cyangwa izikorerwa ahantu hatazwi, kuko ari zo zishobora kuba zirimo Methanol nyinshi.
Yanashimangiye ko umuntu uketse ko yanyoye ikintu kirimo Methanol akwiriye guhita ajyanwa kwa muganga byihuse, kuko gutinda bishobora gutuma ingaruka ziba mbi kurushaho cyangwa zikaba zidasubira inyuma.
Abaganga bavuga ko gukaza ubugenzuzi ku nzoga zicuruzwa no kongera ubukangurambaga ku ngaruka za Methanol ari bimwe mu byafasha kurinda ubuzima bw’abaturage no gukumira impanuka ziterwa n’inzoga zifite uburozi.
@Rebero.rw
About The Author
