Umunyamabanga wa Leta muri Minisiteri y’Ubuzima, Dr. Ivan Butera, yasabye inzego zose gukaza ubufatanye mu gukumira no guhashya ikoreshwa ry’ibiyobyabwenge n’ibinyobwa bisindisha bitujuje ubuziranenge, cyane cyane mu bigo by’amashuri.
Dr. Butera yabitangaje kuri uyu wa Gatatu ubwo yagiriraga uruzinduko mu Karere ka Nyagatare, aho yasuye abanyeshuri n’abarezi bo ku Ishuri rya GS Nyagatare.
Muri uru ruzinduko, yagarutse ku kibazo cy’ibiyobyabwenge n’ibinyobwa bisindisha bitujuje ubuziranenge, avuga ko hari ibigo by’amashuri byagiye bigaragaramo abanyeshuri bakoresha ibyo biyobyabwenge cyangwa ibyo binyobwa.
Yasabye inzego zitandukanye, ababyeyi, abarimu n’abanyeshuri gufatanya mu gukumira iki kibazo, kugira ngo urubyiruko rurindwe ingaruka zishobora guturuka ku ikoreshwa ry’ibiyobyabwenge n’inzoga zitujuje ubuziranenge.
Dr. Butera yibukije abanyeshuri ko inzoga zitujuje ubuziranenge zishobora kugira ingaruka zikomeye ku buzima bw’umuntu, ndetse zigateza ibibazo birenga ku muntu uzinywa bikagera no ku muryango no kuri sosiyete.
Yagize ati: “Ibiyobyabwenge n’inzoga zitujuje ubuziranenge ntabwo byangiza ubuzima bw’umuntu gusa, ahubwo bihungabanya imiryango kandi bikangiza ahazaza h’urubyiruko.”
Yasabye abanyeshuri kwirinda ibiyobyabwenge n’ibinyobwa bisindisha, bakibanda ku myigire yabo no ku bikorwa bibafasha gutegura ejo hazaza heza.
Ku barezi, yasabye gukomeza kugira uruhare mu gukumira no gutahura hakiri kare ibimenyetso by’imikoreshereze y’ibiyobyabwenge mu banyeshuri, ndetse no kubagira inama no kubafasha gushaka ubufasha igihe bibaye ngombwa.
Ubutumwa bwa Dr. Butera buje mu gihe Leta y’u Rwanda ikomeje gukaza ingamba zo kurwanya ibiyobyabwenge, inzoga zitujuje ubuziranenge n’ibindi bicuruzwa bishobora gushyira ubuzima bw’abaturage mu kaga.
Yagaragaje ko kurinda abana n’urubyiruko iki kibazo bisaba uruhare rwa buri wese, kuko ishuri, umuryango n’inzego za Leta byose bifite uruhare mu kubaka urubyiruko rufite ubuzima bwiza kandi rushoboye kugira uruhare mu iterambere ry’igihugu.
Mu gusoza ubutumwa bwe, Dr. Butera yasabye abanyeshuri gufata iya mbere mu kwirinda ibiyobyabwenge no kubwira bagenzi babo ingaruka zabyo, kugira ngo amashuri abe ahantu hizewe ho kwigira no gutegurira urubyiruko ejo hazaza.
@Rebero.rw
About The Author
