Senateri Uwizeyimana Evode yasabye Minisitiri w’Intebe, Dr. Justin Nsengiyumva, kuganiriza Ikigo cy’Itumanaho MTN Rwanda ku biciro bikatwa abaturage mu gihe bohereza amafaranga, avuga ko ayo mafaranga ari menshi kandi ashobora kubangamira abakoresha iyi serivisi kenshi.
Senateri Uwizeyimana yagaragaje ko hari abaturage bohereza amafaranga kenshi bakishyura amafaranga menshi kubera amafaranga akatwa kuri buri gikorwa.
Yatanze urugero avuga ko iyo umuntu yohereje amafaranga arenga ibihumbi 150 Frw, ashobora gukatwa amafaranga 1,500 Frw na MTN.
Yagize ati: “Iyo wohereje amafaranga arenga ibihumbi 150, MTN iguca 1,500. Iyo ubikoze inshuro 10 ku munsi, uba umaze gutanga ibihumbi 15.”
Senateri Uwizeyimana yavuze ko amafaranga nk’ayo ashobora kuba umutwaro ku bantu bakoresha serivisi zo kohereza amafaranga kenshi, ari na yo mpamvu yasabye ko MTN Rwanda yaganirizwa kugira ngo harebwe niba ibiciro bishobora kunozwa.
Yasabye Minisitiri w’Intebe Dr. Justin Nsengiyumva kugira icyo akora mu biganiro n’iki kigo, hagamijwe kureba uburyo ibiciro by’izi serivisi byagabanywa cyangwa bigashyirwaho uburyo bworohereza abakoresha serivisi zo kohereza amafaranga.
Iki kibazo kije mu gihe serivisi z’ikoranabuhanga mu by’imari, zirimo kohereza no kwakira amafaranga kuri telefoni, zimaze kuba igikoresho gikoreshwa cyane n’abaturage mu bikorwa byabo bya buri munsi.
About The Author
