Amabwiriza mpuzamahanga y’ubuziranenge ni uruhare rukomeye mu gutuma ingufu zisukuye ziboneka mu buryo bwizewe, butekanye kandi burambye, bikaba binagira uruhare mu iterambere ry’ubukungu no kubungabunga ibidukikije.
Ibi ni byo byagarutsweho mu butumwa bwo kwizihiza uruhare rw’amabwiriza mpuzamahanga y’ubuziranenge mu kugera ku Ntego ya Karindwi y’Iterambere Rirambye y’Umuryango w’Abibumbye (SDG 7), igamije kugeza ku batuye isi ingufu zihendutse, zizewe, zirambye kandi zisukuye.
Ingufu zisukuye kandi zizewe zifasha abaturage gukomeza guhabana, zikanatanga amahirwe yo kwihangira imirimo no guteza imbere ubukungu, mu gihe zigira uruhare mu kubaka ahazaza harambye ku bantu no ku isi muri rusange.
Amabwiriza mpuzamahanga y’ubuziranenge afasha mu gushyiraho uburyo bwo gukoresha ingufu butekanye kandi bukora neza, ndetse n’ikoranabuhanga ritandukanye rigakorana nta nkomyi, bikorohereza ibihugu gukoresha no guteza imbere ibisubizo bijyanye n’ingufu.
Mu butumwa bwatanzwe, Ishami Mpuzamahanga ryita ku Bipimo Ngenderwaho (ISO), ku bufatanye na Komisiyo Mpuzamahanga y’Ikoranabuhanga ry’Amashanyarazi (IEC) n’Ihuriro Mpuzamahanga ry’Itumanaho (ITU), ryagaragaje ko ibipimo ngenderwaho ari inkingi y’ubufatanye, guhanga udushya no kwihutisha iterambere.
Hanashimiwe impuguke zo mu Rwanda n’ahandi ku isi zigira uruhare mu gutegura no kunoza ibipimo ngenderwaho, hagaragazwa ko umurimo wazo ufasha mu kubaka isi itekanye, ikoresha ikoranabuhanga rigezweho kandi iteza imbere imibereho myiza y’abaturage.
Amabwiriza mpuzamahanga y’ubuziranenge bifasha koroshya imikoranire hagati y’ikoranabuhanga n’ibikorwaremezo bitandukanye, guteza imbere udushya no guhuza imbaraga z’ibihugu n’inzego zitandukanye mu gushaka ibisubizo by’ibibazo by’iterambere.
Guteza imbere no gukoresha amabwiriza mpuzamahanga y’ubuziranenge ni imwe mu nzira zifasha ibihugu kugera ku ntego yo kugeza ku baturage ingufu zihendutse, zizewe kandi zisukuye, hagamijwe iterambere rirambye n’igihe kizaza kirengera abantu n’ibidukikije.
@Rebero.rw
About The Author
