Minisitiri Paula Musoni yakiriye Ambasaderi wa Qatar mu Rwanda, Mansour Ali Fahad Al-Shahwani Al-Hajri, baganira ku buryo bwo gushyira mu bikorwa amasezerano y’ubwumvikane (MoU) asanzwe ahuza u Rwanda na Qatar mu bijyanye n’ikoranabuhanga mu itumanaho (ICT) no guhanga udushya.
Ibiganiro byabo byibanze ku kumenya ibikorwa bifatika byashyirwa mu bikorwa hashingiwe kuri aya masezerano, hagamijwe kurushaho guteza imbere ubufatanye bw’ibihugu byombi mu rwego rw’ikoranabuhanga.
Mu byaganiriweho harimo itumanaho, ubwenge buhangano (AI), guteza imbere ubumenyi n’ubushobozi bw’abakozi ndetse n’ishoramari mu rwego rw’ikoranabuhanga.
Impande zombi kandi zarebeye hamwe amahirwe yo kurushaho gukomeza ubufatanye hagati y’u Rwanda na Qatar, by’umwihariko mu bikorwa byafasha kuzamura ubushobozi bw’igihugu mu ikoranabuhanga no guhanga udushya.
Ubu bufatanye buje mu gihe u Rwanda rukomeje gushyira ikoranabuhanga ku isonga mu iterambere ry’igihugu, aho rushishikariza ishoramari mu ikoranabuhanga, guteza imbere ubumenyi bw’abaturage no kwihutisha ikoreshwa ry’ikoranabuhanga mu nzego zitandukanye.
Ku ruhande rwa Qatar, ubufatanye n’u Rwanda bushobora gutanga amahirwe mashya y’ishoramari no kungurana ubumenyi mu nzego zirimo itumanaho, AI n’iterambere ry’impano z’abahanga mu ikoranabuhanga.
Impande zombi zagaragaje ubushake bwo gukomeza ibiganiro no gushyiraho ibikorwa bifatika bizatuma amasezerano y’ubwumvikane asanzwe ahari avamo imishinga n’ubufatanye bufatika bugirira akamaro ibihugu byombi.
@Rebero.rw
About The Author
