Nyamasheke : EAR/ paruwasi ya Ntendezi yahuje kwibohora no kuremera abatishoboye 287 iby’agaciro k’arenga miliyoni 18

Abaturage b’impande zinyuranye z’umurenge wa Ruharambuga mu karere ka Nyamasheke, bateraniye mu busitani bwa EAR/ paruwasi ya Ntendezi kuri uyu wa 4.7.2025, bishimira ibyo bagezeho bakesha kwibohora, bari kumwe n’ubuyobozi bw’uyu murenge, inzego z’umutekano n’ubuyobozi bw’umushinga RW 0730 EAR/ Ntendezi,uterwa inkunga na Compassion international, uyu mushinga uboneraho gushyikiriza abagenerwabikorwa bawo 287, iby’agaciro k’arenga miliyoni 18.

Mu kiganiro kijyanye no kwibohora bagejejweho na Mukangoga Yvonne, umukozi w’umurenge wa Ruharambuga ushinzwe ibikorwa by’ubuzima,isuku n’isukura, yababwiye ko Kwibohora bivuze muri rusange umutekano w’abantu n’ibintu, ubwisanzure mu bitekerezo, mu bikorwa, no mu burenganzira bw’ibanze bw’umwenegihugu.

Ati” Bigaragarira mu kwiha no kwihesha agaciro,kugaha abandi no kugaha igihugu cyakubyaye.”

Mukangoga Yvonne watanze ikiganiro kijyanye no kwibohora

Yabagaragarije iterambere n’umutekano abanyarwanda bakesha kwibohora,abasaba gusegasira ibyagezweho, baharanira kubyongera, barwanya uwo ari we wese wahirahira abisenya cyangwa ashaka kubasubiza mu icuraburindi bavuyemo ryatumye ingabo zari iza FPR Inkotanyi, ziyobowe na perezida Kagame zihaguruka zikiyemeza kubohora igihugu ku kiguzi icyo ari cyo cyose byari kuzisaba.

Mu izina ry’inzego z’umutekano, umuyobozi wa polisi y’igihugu mu murenge wa Ruharambuga, CIP Munyaneza Jean Sauveur yabashimiye uburyo bafatanya n’inzego z’umutekano kuwucunga kugira ngo bagire n’ibindi bageraho, abasaba kwirinda icyashaka kuwuhungabanya cyose.

CIP Munyaneza Jean Sauveur yabasabye gukomeza gufatanya n’inzego z’umutekano kuwucunga.

Ati” Mwirinde ibyabasubiza inyuma birimo ibiyobyabwenge, amakimbirane mu miryango, ingengabitekerezo ya Jenoside n’ibindi byose bibi, munakomeze umuco wo gutangira amakuru ku gihe ku cyo mubona cyose cyashaka kubakoma mu nkokora mu bikorwa murimo by’iterambere.”

Rév.past. Bizimana Vincent, umupasitori muri paruwasi ya Ntendezi, akanaba Acidikoni w’ubucidikoni bwa Nyarusange, yavuze ko bahisemo guhuza kwibohora no kuremera abafite ibibazo by’amacumbi,bamwe bahabwa amabati,abandi sima.

Abandi bahabwa ibiryamirwa,ibikoresho byo mu buhinzi,hakaba n’abagomba guhabwa amatungo magufi.

Acidikoni w’ubucidikoni bwa Nyarusange, Rév.past. Bizimana Vincent avuga ko kwita ku batishoboye ari inshingano z’itorero EAR.

Ati”Bose hamwe ni 287 bagomba guhabwa iby’agaciro k’arenga miliyoni 18,barimo n’abahawe insinga z’amashanyarazi ngo bature ahabona kuko muri iki gihe umuntu atavuga iterambere akirara mu kizima.”

Arakomeza ati” Twanabihuje n’umunsi wo kwibohora kuko nubwo dusanzwe dufasha ariko by’umwihariko mu ngingo nkuru zijyanye no kwibohora hari harimo idusaba kuremera abatishoboye kandi iyo tujya gufasha abo bana n’ubundi tureba abo mu miryango itishoboye.”

Avuga ko gufasha ab’ubushobozi buke ari ngombwa cyane mu rwego rwo kubafasha kwibohora ingoyi y’ubukene, kuko ari yo ntego ya Leta n’itorero nk’umufatanyabikorwa w’ingenzi wayo.

Bishimiye guhindura imibereho bijyanye no kwibohora

Avuga ko yizeye ko ibyo bahawe bazabifata neza kuko babanje kubigisha no kubasobanurira ko imfashanyo zitazaboraho, bazageraho bagacuka,ari yo mpamvu hanafashwe gahunda yo kubigisha imyuga iciriritse yabunganira mu iterambere,hifashishijwe amatsinda babumbiwemo.

Ati” Birahura no kwibohora kuko ni inzira yo kwibohora ingoyi y’ubukene kuko iyo dutanga nk’ibi tuba tugobotora wa mwana twitaho, ingoyi y’ubukene mu izina rya Yesu.”

Abaremewe bashimiye perezida Kagame wabohoye igihugu, akifuriza buri wese gutunga no gutunganirwa.

Kaneza Berthe wahawe amabati, ati” Nabaga mu nzu iva, ngiye kuyasakaza ahavaga.Ibi byose tubishimira cyane perezida Kagame watubohoye akanashyiraho umurongo uhamye w’iterambere rya buri munyarwanda hakanabaho uburyo n’abintege nke bazamurwa.”

Abahawe amabati bishimiye ko bagiye kuba heza

Uwitije Berthe wahawe matora na we ati” Ntiwavuga ko wibohoye urara nabi, ni yo mpamvu nshimiye mbere na mbere perezida Kagame ushyiraho uyu murongo wo gutuma natwe abaturage bo hasi turara heza. Ni ko kwibohora nyakuri.”

Yanashimiye uyu mushinga RW 0730 EAR/ Ntendezi wabaremeye ukanabihuza n’umunsi mukuru wo kwibohora kuko bituma barushaho kuwumva neza,binajyanye n’impanuro bahawe n’abayobozi batandukanye.

Nzisabira Fabien, umuhinzi w’imboga n’imbuto wahawe ibikoresho yaburaga ngo akube inshuro 2 umusaruro abona n’amafaranga akuramo nk’uko abivuga, yavuze ko nyuma yo kubibona intego ari iterambere rirambye.

Nzisabira Fabien umuhinzi w’imboga n’imbuto wahawe ibikoresho yaburaga ngo akube inshuro 2 umusaruro abona, nk’uko abivuga aravuga ko icyo yaburaga ngo atere imbere bifatika akibonye

Ati” Bampaye pompe itera umuti wica udukoko mu myaka. Nari nyikeneye cyane,kimwe n’ibindi bikoresho bijyana. Ubwo nyibonye hehe n’ubukene,ngiye kubwibohora bigaragara nkoresheje ubu buhinzi ni yo mpamvu nshima ababimpaye, ku isonga hari umukuru w’igihugu Paul Kagame.”

Umunyamabanga nshingwabikorwa w’agateganyo w’umurenge wa Ruharambuga, Ntagayisha Claude, yashimiye cyane uyu mushinga RW 0730 EAR/ Ntendezi, iki gikorwa wahuje n’uyu munsi mukuru wo kwibohora,asaba abaturage kwishimira ibyagezweho n’ibyo bahabwa, babisegasira,banabibyaza umusaruro mwinshi.

Ati”Ibyo bahawe n’ibyo bigejejeho ubwabo babifate neza, babicungire umutekano kugira ngo ubufasha nk’ubu bujye bunagera ku bandi,twese twihutane mu iterambere ry’ubukungu rirambye n’imibereho myiza ntawe usigaye.”

Umunyamabanga nshingwabikorwa w’agateganyo w’umurenge wa Ruharambuga, Ntagayisha Claude abasaba gufata neza ibyo bahabwa n’ibyo bagezeho.

Uyu murenge wa Ruharambuga ufite amahirwe menshi y’iterambere ashingiye ku buhinzi burimo ubw’urutoki n’icyayi.

Uri mu mirenge mike cyane ikora ku kiyaga cya Kivu na pariki y’igihugu ya Nyungwe, ubworozi n’amasoko mpuzamahanga kimwe n’ibyambu, bifasha abanyekongo kubagana ku bwinshi baje kubahahira, umuhanda wa kaburimbo, n’ibindi byinshi by’iterambere,bakesha kwibohora.

@Rebero.rw

About The Author