Inka yashyikirijwe Twagirayezu Charles yorojwe na KOPAKAMA
Mu kwibuka abazize Jenoside yakorewe Abatutsi mu Murenge wa Mushubati, Akarere ka Rutsiro, koperative y’abahinga bakanatunganya umusaruro wa kawa (KOPAKAMA) yoroje inka Twagirayezu Charles warokotse Jenoside yakorewe Abatutsi akanagira uruhare mu rugamba rwo kubohora igihugu banatanga amafaranga 500.000 yo kwishyura mituweli abarokotse batishoboye,Akarere kanamwizeza inzu Kuko iyo yari atuyemo yahuye n’ibiza.
Aganira na Rebero.rw, Twagirayezu Charles ufite ubumuga bw’ ingingo, yagize ati” Itotezwa rikomeye n’akarengane nabonaga bikorerwa Abatutsi byanteye gusanga urundi rubyiruko rwari rwiyemeje kukarwanya, ku rugamba rwo kubohora igihugu. Nje nsanga umuryango wanjye mugari wose barawumazeho nsigaye jyenyine.”
Arakomeza ati” Naje gusezererwa mu gisirikare ndataha mpangana n’ubuzima bwo hanze. Mfite ubumuga bw’akaguru,ngendera mu igare. Nasenyewe n’ibiza ubu ndasembera nkodesherezwa n’Umurenge. Nta mugore ngira,mfite abana 2 bari ku ishuri.“
Umuyobozi w’Akarere ka Rutsiro wungirije ushinzwe imibereho myiza y’abaturage, Umuganwa Marie Chantal asuhuza Twagirayezu Charles anamwifuriza gukomera
Yashimiye cyane KOPAKAMA imworoje inka nziza. Ati” Iyi nka irashimishije bikomeye. Ibi binyongereye imbaraga cyane n’icyizere cy’iterambere kuko nta tungo nagiraga. Mfite umurima ngiye kubona ifumbire mpinge neze, n’abana banjye tubone amata. Uguhaye inka burya aba aguhaye byinshi.” Yavuze ariko ko anifuza aho kuba adakomeje gusembera.
Ati” Ndasaba ubuyobozi bw’Akarere kunamfasha nkanabona aho ndambika umusaya n’abana banjye kuko amezi abaye 6 yose ntagira iwanjye mba. Nshimira cyane abaturage bamba hafi,binyereka ko amaraso yacu ku rugamba atamenekeye ubusa.”
Umuyobozi w’iyi koperative, Irankunda JMV avuga ko abanyamuryango bishimiye koroza Twagirayezu Charles no kuba hari abarokotse baboneye mituweli.
Ati” Gufata mu mugongo abarokotse Jenoside yakorewe Abatutsi, twe muri KOPAKAMA tubifata nk’ inshingano. Ntituzabitezukaho.”
Uhagarariye Ibuka mu Murenge wa Mushubati, Rwamucyo Juvenal yavuze ko Ibuka ishimishijwe cyane n’iki gikorwa cy’indashyikirwa cya KOPAKAMA cyo gufata mu mugongo abarokotse Jenoside yakorewe Abatutsi.
Ati” Iyi nka izamugirira akamaro gakomeye cyane. Tuzamufasha kuyitaho izamubyarire umusaruro tuyitegerejeho.”
Umuyobozi w’Akarere ka Rutsiro wungirije ushinzwe imibereho myiza y’abaturage, Umuganwa Marie Chantal na we yashimiye KOPAKAMA ibi bikorwa anifuriza Twagirayezu Charles gutunga no gutunganirwa.
KOPAKAMA inashyikiriza umuyobozi w’Akarere ka Rutsiro wungirije ushinzwe imibereho myiza y’abaturage, Umuganwa Marie Chantal ibihumbi 500 yo kuzishyurira mituweli abarokotse batishoboye.
Ku kibazo cy’inzu, Umuganwa Marie Chantal yamwijeje ko ashonje ahishiwe.
Ati” Turakizi ari yo mpamvu ari twe twishyura ubukode bw’iyo arimo kandi ari ku rutonde rw’abakeneye icumbi. Umwaka utaha w’ ingengo y’imari azatekerezwaho, inzu nta kabuza azayibona.”
Umurenge wa Mushubati uri mu Mirenge y’Akarere ka Rutsiro yashegeshwe bikomeye na Jenoside yakorewe Abatutsi byatumye bamwe mu bayirokotse basigara iheruheru, bakeneye kwitabwaho by’umwihariko ngo bakomeze kwiyubaka.
@Rebero.rw
About The Author
