Rusizi: Musenyeri Karemera Francis  yasabye abakirisito kwirinda ababaka amafaranga ngo babavuganire ku Mana

Umwepisikopi wa EAR/ Diyoseze ya Cyangugu Karemera Francis  yasabye abakirisito b’iyi Diyoseze kwirinda  abiyita abakozi b’Imana bakabasaba amafaranga ngo bayibavuganireho kuko  ubwabo bayigereraho  bitewe no kuyikiranukira ,atari ngombwa ababacucura utwabo ngo  barabavuganirayo.

Yabivugiye muri paruwasi ya Mpinga,ubucidikoni bwa  Busozo,umurenge wa Gikundamvura,akarere ka Rusizi ubwo yifatanyaga n’abakirisito baho  mu iteraniro ryo kucumweru tariki ya  29 Nzeri,2024,anakomezamo 55,anabasezeraho  kuko kuva ku wa 1 Ukuboza uyu mwaka  azatanga inkoni y’ubushumba akerekeza mu kiruhuko cy’izabukuru.

Mu nyigisho ze, Musenyeri Karemera Francis,yagarutse ku bajya mu murimo w’Imana atariyo bagiye gukorera mu by’ukuri, bajyanyweyo n’inyungu zabo bwite, cyangwa ari abantu babasunikiyemo kubera isano bafitanye,abasaba gutunga imitima y’ubwenge,bakamenya abigisha b’ubukuri bakabakurikira,ab’ibinyoma bakabagendera kure.

Musenyeri Karemera Francis yaboneyeho gusezera abakirisito b’ubucidikoni bwa Busozo

Aganira na Rebero.rw,yagize ati’’ Abashukanyi barahari baruzuye na mbere ya Yesu babagaho,biyita abahanuzi b’Imana nyamara ari ab’ibinyoma,bahanuriraga amaramuko ngo babone ababumva n’ababakurikira. Bayobeje  banakenesha benshi ku bw’inyungu zabo bwite.’’

Avuga ko no muri ibi bihe iyo basesenguye babona hari abahamagawe koko n’Imana muri uyu murimo wa gishumba,batareba inyungu zabo bwite ahubwo bashishikajwe n’inyungu z’umurimo n’ubutumwa.

Ati’’ Twanamenye ariko ko hari n’abahamagarwa n’abantu, bagashyiramo abana babo cyangwa abandi bo mu miryango yabo babizeza ibirimo by’ubukire. Bene abo iyo bagezemo,ibyo biringiragamo bakabibura,ntibakora neza bishimiye kuko baba barahamagawe n’abantu banababeshya ibirimo byo kwinezeza kandi ntabyo.’’

 Avuga ko hari n’abareba bagasanga bitazabakundira kubera uburyo aho bagombaga gukemurira ibibazo by’imibereho yabo hadadiye,batapfa kuhamenera,,bagahitamo gushinga  amadini yabo bwite,bakiyita amazina akomeye y’ibyubahiro,adaturutse ku Mana, bakiyita abakozi bayo ikoranabuhanga bakarikoresha cyane bigaragaza,nyamara ari ibirura byihinduye intama.

Basabwe kwirinda abigisha babi babaka amafaranga ngo babavuganire ku Mana

Ati’’ Abo  batangira kugenda bakwiza hose ko ari abakozi b’imana by’ukuri,bavuganye na yo. Bakajya bashuka abakene ko ubukene bwabo bagiye kuburangiza, bakabuza abantu gukora ibibateza imbere bakabiyiriza inyuma ngo bari mu butayu, bakamarayo iminsi myinshi batanaywa amazi ngo ni ku Mana babajyana,bamwe bakazanahapfira ngo bakurikiye umukozi w’Imana.’’

Avuga ko hari n’abacucura abakiri bato utwabo ngo barabasengera babone viza  zo kujya muri Amarika n’uBurayi,urubyiruko rukabiruka inyuma rwabagize Imana,bikarangira ibyo babijeje babihebye,ahubwo hatangiye isubiranamo.

Avuga ko bibibaje cyane kuba hariho abantu nk’abo barimo n’abashuka abagore bakabaha imitungo yose y’urugo ngo barabakemurira ibibazo,bakabasenyera ahubwo, akavuga ariko ko igishimishiej ari uko nk’abo  igihugu ubwacyo cyabibonye.

Umukuru w’igihugu Paul Kagame, mu bushishozi bwe no kureba kure, abo ba runyunyusi yabateye imboni, ubu ibintu bikaba birimo bivugururwa,biganisha ku ivugabutumwa rizima,rizira ubujura bwihishe mu buhanuzi n’ivigabutumwa,abakirisito bakaba bagomba kurangwa n’ubushishozi muri byose.

Agaruka ku bakirisito b’ubucidikoni bwa Busozo, Musenyeri Karemera Francis yabashimiye ko ari abakozi,bumva,bashishikajwe n’iterambere mu buryo bw’umwuka n’iry’umubiri.

Ati’’ Imyaka 5 tumaranye  nabigiyeho byinshi. Baritanga bigaragara,bishakamo ubushobozi ku cyo bakeneye, kukigeraho ntibisabe kubasunika. Bakomereze aho natwe tuzabahora hafi muri iyo nzira.’’

Acidikoni Hakizimana Sylvestre avuga ko Musenyeri Karemera Francis abasigiye byinshi bifatika

Acidikoni w’ubucidikoni bwa Busozo, Rév.past. Hakizimana Sylvestre, mu izina ry’abakirisito bose ry’ubu bucidikoni, yashimiye cyane Musenyeri Karemera Francis imyaka 5 y’ingirakamaro babanye, ari na bwo ubu bucidikoni bwavutse kuko bumazeumwaka umwe n’igice gusa.

Ati’’ Ni twe twagize ababwiriza benshi kuko dufite 5 bivuze ko hano ivugabutumwa ryazamutse cyane, no mu rubyiruko ryongera ingufu nk’uko byagaragaye.’’

Yanashimiye umufasha wa Musenyeri,madame Kirebwa Eva Mélodie, witaye cyane ku mibanire myiza y’abashakanye, afasha bigaragara abakobwa babyariye iwabo,biga imyuga bigarurira icyizere cy’ubuzima bwiza.

Bamusezeyeho bamuha impano

Yanashimye byinshi byakozwe mu mibereho myiza y’abaturage birimo inkoko 60 zorojwe imiryango 30 yabaga mu mirire mibi,amagi yazivuyemo akayigira akamaro gakomeye,gahunda y’iterambere ry’itorero mu baturage yatumye bishakamo ibisubizo, n’ibindi byinshi byabateye kumuha impano yo kumushimira no kumwifuriza umugisha w’Imana  mu bihe byose biri imbere.

Ubucidikoni bwa Busozo mu itorero ry’Abangilikani ry’uRwanda bugizwe  n’abayoboke babyo b’imirenge wa  Gikundamvura ,Butare n’igice cya Nyakabuye. Bugizwe na paruwasi 4 zirimo abakirisito barenga gato 1500.

Mu  izina ry’ubuyobozi bw’umurenge wa Gikundamvura paruwasi ya Mpinga irimo, umunyamabanga nshingwabikorwa w’akagari ka Kizura,Banyangiriki Alphonse,yijeje ubufatanye busesuye bwa bombi kugira ngo iterambere ry’umwuka n’iry’umubiri ry’abakirisito rikomeze ingufu zaryo.

Yakomeje abakirisito 55

@Rebero.rw

About The Author