Nyamasheke: Gurd-Rwanda yahangiye imirimo abakobwa 10 bacikirije amashuri barimo ababyariye iwabo

Ubuyobozi bw’akarere ka Nyamasheke burashimira umuryango  Gurd-Rwanda  ibikorwa byawo mu kugarurira icyizere cy’ubuzima bwiza abana b’abakobwa   bahuye n’ibibazo binyuranye birimo guterwa inda bakiri bato bikabatera gucikiriza amashuri, n’abayacikirije ku mpamvu zindi zinyuranye zirimo kubura amafaranga y’ishuri,uyu muryango ukayabarihira.

Byavuzwe n’umuyobozi w’akarere ka Nyamasheke wungirije  ushinzwe imibereho myiza y’abaturage, Mukankusi Athanasie  ku wa kane tariki ya 3 Ukwakira, mu gikorwa  cyo guha ibikoresho by’umurimo abakobwa 10 barangije amasomo y’ubuduzi no gutunganya imisatsi n’ubwiza,barimo 9 babyariye iwabo.

Umuyobozi w’akarere ka Nyamasheke wungirije ushinzwe imibereho myiza y’abaturage Mukankusi Athanasie yashimiye Gurd -Rwanda kwita ku bakobwa baba barahuye n’ibibabangamira mu kwiga

Aba 10 barimo 5 bize ubudozi,bahawe imashini zidoda, 2 bize gutunganya imisatsi n’ubwiza bahawe ibikoresho bizabibafashamo , na 3 barangije ayisumbuye barihiwe n’uyu muryango,buri wese yahawe amafaranga 58.000 bagura amatungo magufi borora.Byanajyanye no  gutangiza ku mugaragaro ishuri  rizajya rifasha abangavu kwimenyereza umwuga w’ubudozi no kubahuza n’isoko ry’umurimo ryitwa Icyizere design HUB.

Mu ijambo rye,umuyobozi w’uyu muryango wanagize igitekerezo cyo kuwushinga nyuma yo kubona ubuzima bubi abangavu bamwe bahura na bwo nyuma yo gucikiriza amashuri,cyane cyane  abababa batewe inda z’imburagihe,icyo gitekerezo akagishyira muri bagenzi be bakawutangiza ngo uhangane n’iki kibazo muri aka karere ka Nyamasheke, Tuyishime Fidèle, yavuze ko basanze kwigisha bake bagahabwa ubushobozi bwo kwihangira imirimo  byaba ingenzi.

Ati’’Twahisemo kwigisha bake tunaha ibikoresho byo guhanga umurimo kuruta kwigisha benshi  batahira aho ugasanga n’ubundi ntacyo biyunguye. Ni muri urwo rwego abarangije twanabahaye ibi bikoresho, tukabasaba kubiryaza umusaruro babiherewe, bikazabafasha binafasha abana babyaye.’’

Umunyamabanga nshingwabikorwa w’umurenge wa Kagano, Uwimana Damas afungura ku mugaragaro ishuri rizajya rifasha abangavu kwimenyereza umwuga w’ubudozi no kubahuza n’isoko ry’umurimo

Yavuze ko uretse aba ,banakora ibindi birimo kwishyurira  abakobwa 21amashuri asanzwe, barimo 7 babyariye iwabo bagasubizwa mu ishuri, banasubiza mu ishuri abandi bakobwa bari bahuye n’ihohoterwa,agashimira cyane ikigo cy’urubyiruko cy’akarere ka Nyamasheke cyafashije mu kwigisha aba barangije,atanga icyizere ko mu myaka 2 iri imbere  bazaba bafite ishuri ryabo ryisgiha imyuga n’ubumenyi ngiro ( TVET) rizafasha cyane mu myigishirize .

Yanavuze ko bifuza kwegera  ubuyobozi bw’akarere  bukabasaba  ko abakobwa bava mu bigo ngororamuco,bazajya babahabwa bakabajyana mu kigo cy’urubyiruko bakabongerera  ubumenyi bakanabaha ibikoresho  bakiteza imbere.

Umuyobozi w’ikigo cy’urubyiruko cya Nyamasheke, Uwumugisha Marie Claire Salomé, yashimiye Leta y’u Rwanda yagitekereje kubera akamaro kanini cyane gifitiye urubyiruko, cyane cyae abakobwa nk’aba bagarurirwa icyizere cy’ubuzima basaga n’abatakaje,  anashimira uyu muryango wabonye utabafasha kwiga gusa ngo batahe,ahubwo ukanabaha ibikoresho  bibafasha guhanga imirimo.

Umuyobozi wa Gurd- Rwanda Tuyishime Fidèle yijeje ko mu myaka 2 bazaba bafite ishuri ry’imyuga n’ubumenyi ngiro bigishirizamo abakobwa nk’aba

Ati’’ Tura shimira cyane Lata y’uRwanda ya fashije mu kugarurira icyizere urubyiruko bwasaga n’urwagitakaje, tukananashimira  uyu muryango,waje ukenewe,kuko ibyo ukora byivugira,.Tugashimira umuuyobozi wawo wanazanye igitekerezo cyo kuwushinga, akarere ka Nyamasheke,aba bakobwa n’ababyeyi babo, uruhare rwa buri wese ngo uyu munsi ugerweho, twizera ko ruzakomeza ngo  n’izindi ntambwe ziterwe.’’

Dufitimana Chantal w’imyaka 24, avuga ko yatewe inda n’umusore ageze mu wa 5 w’ayisumbuye agite imyaka 19, uwayimuteye akamubura. Imibereho mibi yakurikiyeho yatumye aterwa indi n’undi na we aramubura, yumva ubuzima bubaye bubi cyane,ariko aho agiriye kwiga ubudozi,akaba yanabonye imashini,nta kwiheba no kwiganyira bikimurangwaho.

Abize gutunganya imisatsi n’ubwiza bahawe ibikoresho byabyo

Ati’’ Ndumva rwose mpagaze neza. Ngiye gutangira gukora,ninjize amafaranga,ntunge abana banjye, binambere intandaro yo kwihagararaho kuko icyo manshukishaga ni amafaranga kandi ngiye kuyabona. Ndashimira cyane Gurd-Rwanda idukuye ahaomeye,natwe ntituzayitenguha.’’

Nzayituriki Yvonne w’imyaka 27 na we yatewe inda ku mwaka 19 n’umugabo ubyaye 3 wamushukaga ko ari umusore.  Yigaga mu wa 4 w’ayisumbuye ahita avamo, ahangana n’imibereho mibi n’iwabo batahise babyakira, kugeza agiye kwiga.

Ati’’ Nize gutunganya imsatsi n’ubwiza. Ndabirangije,ndabizi neza nanahawe ibikoresho by’intangiriro y’impinduka mu buzima. Ngiye gushinga salo yanjye ntangire nkorere amafaraga bifatika.’’

Umuyobozi w’akarere ka Nyamasheke wungirije ushinzwe imibereho myiza y’abaturage,Mukankusi Athanasie na we yashimiye uyu muryango Gurd-Rwanda  imbaraga ushyira mu mpinduka mu buzima bw’abakobwa bahuye n’ibibazo bakiri bato,yizeza uruhare rw’akarere mu kuzafasha ko  ubu bufasha bugera kuri benshi kuko n’umubare w’abangavu baterwa inda muri aka karere ukiri hejuru.

Abarangije ubudozi bahawe imashini zidoda

Yasabye abarangije kuzitwara neza, impinduka mu buzima ntizizabe intandaro yo kongera kugwa mu bishuko. Ati’’ Aya mahirwe adasanzwe muyabyaze umusaruro mwinshi . Ntabe intandaro yo kongera kugwa mu bishuko ngo  nuko ababashuka bababonye mu mibereho myiza, cyangwa ngo ibikoresho mwahawe mubigurishe.’’

Umuryango Gurd-Rwanda washinzwe muri 2021, ubona ubuzima gatozi mu kwakira 2023. Ukorera muri aka kareer ka Nyamasheke,ukibanda ku mpinduka mu mibereho z’abakobwa ,cyane cyane  abahuye n’ihohoterwa ritadukanye cyangwa ibindi bibazo byabateye  kwisanga mu mibereho igoye.

@Rebero.rw

About The Author