Rusizi:   Imishinga iterwa inkunga na Compassion international yahaye abasore 13 barimo abavuye Iwawa ibikoresho by’imyuga by’agaciro ka 1.200.000

Mu bukangurambaga bwo kurwanya ibiyobyabwenge mu rubyiruko no mu muryango nyarwanda,inda z’imburagihe n’amakimbirane yo mu miryango,imishinga 24 iterwa inkunga na Compassion international ikorera mu karere ka Rusizi yahaye abasore 13 bavuye Iwawa ibikoresho by’imyuga by’agaciro ka 1.200.000,bizeza kubibyaza umusaruro w’iterambere bagasezerera ingeso mbi babagaho mbere.

Bwatangiye ku wa 15 Kanama, busorezwa ku kigo cy’urubyiruko cy’akarere ka Rusizi kiri mu murenge wa Gihundwe, ku wa 30 Kanama,2025, busozwa n’imishinga  RW 0380 ADEPR Gihundwe, RW 0729 EAR Kamembe na RW 0960 EEAR Karangiro, yose interwa  inkunga na Compassion international,ikorera mu mujyi wa Rusizi.

Nubwo bwasojwe ku wa 30 Kanama,2025,  mu mujyi wa Rusizi bwatangijwe n’urugendo  rwabaye ku wa 28 Kanama,2025,rwanyuze mu mujyi rwagati wa Rusizi rugera ku kigo cy’urubyiruko cy’akarere ka Rusizi, cyubatse mu murenge wa Gihundwe,rwitabirwa n’abaturage benshi biganjemo urubyiruko.

Abaturage bagaragaje ko banyuzwe n’ibyakozwe

Mu bikorwa byakozwe mu minsi 3 yo kuva ku wa 28 Kanama kugera ku wa 30 Kanama,2025, harimo  ubuhamya n’ijambo ry’Imana bagejejweho n’umuvugabutumwa Murwanashyaka Alexis waturutse mu mujyi wa Kigali,na we wari warabaswe n’ibiyobyabwenge,bimukururira mu zindi ngeso mbi zirimo ubujura, akavuga ko yagize amahirwe akabyihana,agakizwa,ubu akaba ari umugabo wubatse urugo rwiza.

Ati’’ Nta cyiza cy’ibiyobyabwenge. Ni wo muzi w’ibindi bibi byose. Uwo byabase yumva ari ikitabashwa kuko biba bimukoresha ibyo ubundi umuntu muzima atagakoze, bimukururira mu byaha byo gufungwa cyangwa kujyanwa mu bigo bimusubiza kuri gahunda birimo n’aho Iwawa, akazasubiza ubwenge ku gihe hari bimwe atakigaruye.’’

Urugendo rwo kwamagana ibiyobyabwenge mu rubyiruko no mu muryango nyarwanda, inda ziterwa abangavu n’amakimbirane mu miryango rwakozwe n’abiganjemo urubyiruko

Yifashishije ijambo ry’Imana  riboneka muri Yohana 8: 32-36, ari na ryo ryari insanganyamatsiko y’ubu bukangurambaga, igira iti’ Umwana nababatura muzaba mubatuwe by’ukuri, ati’’  Iyo uwo byabase afashe icyemezo  cyiza cyo guhindukira,akizera Yesu nk’umwami n’umukiza we,arabaturwa by’ukuri agatangira ubuzima bushya.’’

Iri jambo ryafashije benshi kuko habonetse benshi barimo urubyiruko bahindukira bakava mu byo babagamo bibwiraga ko hari aho byabageza, hanaboneka abiyemeza kureka amakimbirane bahoragamo mu miryango.

Umuyobozi wa polisi mu karere ka Rusizi,SSP Karagire Gaston, yashimiye uyu muvugabutumwa ku butumwa buhindura yabahaye,yihereyeho n’uburyo yahindutse, asaba abakibaswe n’izo ngeso guhinduka.

Umuyobozi wa polisi y’igihugu mu karere ka Rusizi, SSP Karigire Gaston asaba uyu uhawe ibikoresho kuzagaragaza impinduka

Ati’’ Amategeko arahana ariko umutima uhindurwa n’icyemezo  nyirawo. Twe iyo tubigufatiyemo,ubikoresha ugateza umutekano muke turagufata  tukaguhana ariko iyo,wifatiye icyemezo,ukihana ukabireka, nta gihe kindi utakaza,utangiza inzira y’iterambere.’’

Yashimiye cyane iyi mishinga iterwa inkunga na Compassion international iki gikorwa cyiza ikoreye aba basore kigiye kubafasha guhindura ubuzima, anashimira aba basore kuba baremeye guhinduka,bagafata inzira y’iterambere, abasaba gufasha mu guhindura abandi bakiri muri izo ngeso.

Mu izina ry’umushumba w’ururembo rwa Gihundwe muri ADEPR, Rév.past. Nsengamungu Valens, yashimiye uru rubyiruko rwiyemeje guhinduka,avuga ko rwahisemo neza, arusaba kubyaza umusaruro ibikoresho rwahawe,ko ababiruhaye bazakomeza gukurikirana ko  rubibyaza koko umusaruro witezwe.

Umuhuzabikorwa w’imishinga iterwa inkunga na Compassion international mu karere ka Rusizi, Nkurunziza Daniel yarusabye kubyaza umusaruro ufatika aya mahirwe

Umuhuzabikorwa w’imishinga iterwa inkunga na Compassion international mu karere ka Rusizi, Nkurunziza Daniel yashimiye abateguye ubu bukangurambaga  n’ababwitabiriye bose, abashimira imitegurire n’imikurikiranire yabwo kugeza burangiye, cyane cyane umusaruro ukomeye bwatanze.

Ati’’  abahawe ibi bikoresho,aya ni amahirwe mudakwiye gupfusha ubusa,mukwiye kubyaza umusaruro ugaragara.’’ Urubyiruko rwahawe ibi bikoresho rurizeza kubibyaza umusaruro uzaruhindurira ubuzima.

Imanirankunda Moise, w’imyaka 30 wo mu murenge wa Gihundwe,ati’’ Nize ubudozi. Mbere na mbere ndashimira cyane umukuru w’igihugu Paul Kagame dukesha ibi byose. Nahawe imashini idoda n’ibijyana na yo  kuko ni ubudozi nize.

Uwagiye IWAWA wahawe ibikoresho byo kubaza

Igiye kumfasha guhindura ubuzima nanjye mu minsi iri imbere nzabe mu batanga ubuhamya ko nyuma yo kuva mu ngeso mbi nkiga umwuga,ngahabwa ibikoresho nahinduye ubuzima.’’

Nsengiyumva Laban w’imyaka 21,wo mu murenge wa Nyakabuye,wize amashanyarazi na we yiteguye kubyaza umusaruro ibyo yahawe.

Ati’’ Abari banzi I Kamembe mu bujura  bagiye kumbona ndi umukungu kubera guhinduka nkiga umwuga nkanabona ibikoresho bizamfasha kuwushyira mu bikorwa. Ndashimira cyane ubu bukangurambaga kuko hari n’abandi twari mu ngeso zimwe nabonye biyemeje guhinduka bataruhanije kubera bwo.Ndasaba ko bwajya buba buri gihe kuko umusaruro ubuvamo wanshimishije,n’uburyo bukoreshwa bw’imikino n’ivugabutumwa ni ingenzi cyane.’’

Bwanabayemo umupira w’amaguru n’uw’intoki( Basket ball) . Mu w’intoki ikipe y’urubyiruko rwitoreza ku kigo cy’urubyiruko cya Gihundwe yatsinze iy’imishinga 3 iterwa inkunga na Compassion international amanota 62-43, mu w’amaguru nanone iy’urwo rubyiruko itsinda iy’iyo mishinga  kuri penaliti 2-1,umukino wari warangiye ari 3-3.

Umunyamabanga nshingwabikorwa w’umurenge wa Gihundwe, Iyakaremye Jean Pierre yijeje ubufatanye mu gukurikirana ko ibi bikoresho bibyazwa umusaruro byitezweho

Mu izina ry’umuyobozi w’akarere ka Rusizi, umunyamabanga nshingwabikorwa w’umurenge wa Gihundwe Iyakaremye,Jean Pierre, yashimiye uru rubyiruko ingamba rwafashe zo guhinduka no guharanira kwiteza imbere.

Ati’’ icyo mwaburaga ni ibikoresho. Ubwo mubibonye nimugaragaze itandukaniro ry’aho mwari mbere n’aho muri ubu, nk’ubuyobozi n’abafatanyabikorwa bacu tuzakomeza kubashyigikira.’’

Yanashimiye cyane iyi mishinga iki gitekerezo cyiza cy’ubu bukangurambaga n’uku kuremera uru rubyiruko,yizeza ko akarere kazakurikiranira hafi  imikoreshereze y’ibi bikoresho n’umusaruro bizatanga mu babihawe,yizera ko bizabahindurira ubuzima nk’uko babyitezweho.

Uru rubyiruko rwahawe iby’amashanyarazi

Ikipe y’urubyiruko rw’imishinga 3 (RW0380 ADEPR Gihundwe, RW0729 EAR Kamembe, RW0960 Karangiro)

Ikipe yitoreza ku kigo cy’urubyiruko cya Gihundwe.

Hari urwahawe imashini zidoda n’ibigendana na zo

@Rebero.rw

About The Author