Nyamagabe: Abasore n’inkumi 40 bahinduriwe ubuzima n’umushinga RW 0732 EAR/ Kitabi bari mu byishimo

Abasore n’inkumi 40 bafite imyaka 22 no hejuru yayo bahinduriwe ubuzima n’umushinga RW 0732 EAR/ Kitabi, uterwa inkunga na Compassion international, barizeza na bo kuzagira abo bafasha guhindura ubuzima, nk’uko bagobotowe ku ngoyi y’ubukene bakaba bafite icyizere cy’ejo heza hazaza.

Babigaragaje kuri uyu wa gatatu, tariki ya 18 Werurwe,2026, mu birori byo kubacutsa, byajyanye no koroza inka abatishoboye 11 bafite abana muri uyu mushinga, koroza abandi 41, barimo 31 bawufitemo abana, n’abandi 10 batabafitemo, koroza abandi 4 ingurube, guha abandi babyeyi 5 imashini zidoda byasojwe no guha amata abana bato, nk’ikimenyetso cy’uko iri torero rishishikajwe n’uko nta mwana w’umunyarwanda wagombye kurangwa n’imirire mibi itera igwingira.

Reverend Tite Ndindabahizi, Umuyobozi wa EAR/ Umushumba mwiza Kitabi yabwiye Rebero.rw ko uyu mushinga kuva watangira muri 2008, wagiye ufata abana bo mu miryango ikennye cyane,bafite imyaka hagati y’itatu n’itanu, bakabitaho mu buryo bwose bwo kubagobotora ku ngoyi y’ubukene mu izina rya Yesu.

Ati” Iyi ni inshuro ya 2 ducutsa abana bakuze nk’uko amategeko atugenga abiteganya, aho umwana ugeze ku myaka 22 asezererwa kuko aba yarize,ashobora kwihangira umurimo akikura mu bukene.Ubushize twacukije abasore n’inkumi 40 n’uyu munsi twacukije abandi 40.”

Inka 11 zorojwe abafite abana muri uyu mushinga

Yishimira urwego baba bagezeho kuko nk’aba 40 bafite imirimo inyuranye ibyara inyungu, barimo abacuruzi, abahinzi- borozi b’umwuga, abakora mu bigo by’imari,iby’ubuvuzi,n’ahandi, bakomeje kubera umugisha bo ubwabo n’imiryango yabo.

Yabashimiye uburyo bihindurira ubuzima,bakabuhindurira imiryango yabo n’abaturanyi, bakanakomeza umurimo wabo mwiza wo gusenga wabakujije,banateza imbere itorero ryabareze, abasaba kudasubira inyuma mu iterambere ry’umwuka n’iry’umubiri.

Aba 40 n’ababyeyi babo bishimiye aho bavuye n’aho bageze babikesha uyu mushinga, cyane cyane perezida Kagame bakesha byose.

Mukamuhirwa Berthilde w’imyaka 22, wo mu kagari ka Mukungu,Umurenge wa Kitabi, wafashwe n’uyu mushinga afite imyaka 4,akitabwaho muri byose, yishimira aho ageze ubu.

Mukamuhirwa Berthilde w’imyaka 22, yishimira ko yatangiye kugirira akamaro umuryango we mu mafaranga akorera akaba anirihira kaminuza yigenga

Ati” Niga mu wa 2 muri kaminuza yigenga niga nirihira. Ndi Agoronome muri koperative y’abahinzi b’icyayi. Umuryango wanjye uragenda uhindura ubuzima kubera ibyo nywugezaho nkura mu yo mpembwa. Hari n’abana 2 b’abaturanyi batishoboye ndihira ibikoresho by’ishuri“.

Iyo uyu mushinga utanyitaho simba ndi uwo ndi we ubu ni yo mpamvu nywushimira cyane,ariko cyane cyane umukuru w’igihugu cyacu Paul Kagame kuko hatari umutekano n’imiyoborere myiza n’ibindi bitagerwaho.

Nifitiye inka n’amatungo magufi, n’ibindi ngenda nigezaho.

Nzakomeza guharanira kubaho neza no kubeshaho neza abandi uko nshoboye ntibagiwe abangejeje aho ndi ubu,nishimira.

Habumugisha Japhet w’imyaka 23, na we bafashe afite imyaka 4, yishimira aho ageze ubu.

Ati” Sinari kwiga binyoroheye iyo batamfata. Narangije ayisumbuye ubu ndi umworozi w’ingurube wa kijyambere. Ndubatse mfite umugore twashyingiranywe byemewe n’amategeko Jye n’abandi bafite imishinga bakora na yo twayifashijwemo na bo. ”

Abana bahabwa amata.

Yunzemo ati” Mu kubitura natwe twiyemeje uruhare rwacu dufasha abana barenga 20 tubagurira ibikoresho by’ishuri tunafasha mu kubakira abatishoboye.”

Rév. Past. Ndayishimiye Parfait, Umuhuzabikorwa w’imishinga iterwa inkunga na Compassion muri Nyaruguru-Nyamagabe, yabashimiye imyitwarire yabaranze muri iyi myaka yose bamaranye, abasaba kuzakomeza kwitwara neza mu kazi aho bazaba bari, bakazahesha ishema ababareze bose n’igihugu muri rusange.

Yanasabye aborojwe gufata neza amatungo bahawe bakazayabyazamo iterambere bakanazirikana ko bazitura, kugira ngo iterambere rigere kuri bose.

Rév.Past. Ndayishimiye Parfait, Umuhuzabikorwa Umuhuzabikorwa muri Cluster ya Nyaruguru-Nyamagabe yasabye buri wese guha agaciro amahirwe yahawe.

Umunyamabanga Nshingwabikorwa w’Umurenge wa Kitabi Gasore Jean Claude, ashima uruhare rukomeye rw’uyu mushinga mu iterambere ry’ Umurenge ayoboye n’Akarere muri rusange, kuko uretse abana bo mu miryango itishoboye ufasha, ukanoroza iyi miryango, abashaka kwiga imyuga bakayigishwa bakahabwa ibikoresho, unagira uruhare mu kubakira abadafite aho baba bawufitemo abana, byose bigamije imibereho myiza y’abaturage.

Avuga ko nk’impinduka mu miryango y’aba bacukijwe kubera ko babonye akazi bakaba bayifasha, ari urugero rw’ibishoboka.

Umunyamabanga Nshingwabikorwa w’Umurenge wa Kitabi, Gasore Jean Claude yashimiye umushinga RW 0732 EAR Kitabi uruhare rwawo mu iterambere ry’abaturage ayoboye

Ati” Icyo dusaba aba bana ni ukutarangara kuri aya mahirwe igihugu cyiza bakuriyemo cyabahaye yo kwiga, bagashaka imirimo bakiteza imbere. Abahawe amatungo n’imashini zidoda na bo bakabibyaza umusaruro ufatika ubafasha kwigobotora ingoyi y’ubukene.

Umushinga RW0732 EAR/ Kitabi ubu ufasha abandi bana 231

Umuyobozi w’uyu mushinga, Manirarora Tharcisse avuga ko biteze kuri aba basore n’inkumi kuzaba ab’icyitegererezo, bazatanga serivisi nziza aho bari hose, bakiteza imbere, bakanateza imbere abandi babakeneye,nk’uko n’abababanjirije babigenza.

Umuyobozi w’umushinga RW 0732 EAR/ Kitabi, Manirarora Tharcisse avuga ko biteze byinshi kuri aba basore n’inkumi.

Anavuga ko iyo babasezereye bitaba birangiye, bahurizwa mu ihuriro ryitwa Almuni ari ryo huriro ry’urubyiruko rwarangije gahunda y’umushinga, bakomeza gukurikiranirwamo hafi.

Koroza cyangwa kwigisha imyuga ababyeyi babo bakahabwa ibikoresho bibafasha guhanga imirimo, avuga ko biri mu ntego yo gukomeza kugobotora abana bo mu miryango ikennye cyane ku ngoyi y’ubukene mu izina rya Yesu.

Ababyeyi 5 bafite abana mu mushinga RW 0732 EAR/ Kitabi bigishijwe kudoda bahawe imashini zidoda.

Umuyobozi wa EAR Umushumba mwiza Kitabi avuga ko baterwa ishema n’iterambere ry’abana bareze

Musabyimana Fortunée yishimira ko umwana we wafashijwe n’uyu mushinga afite imyaka 4 gusa, ubu yiga muri kaminuza y’u Rwanda bitari kuborohera.

Imiryango 41 yorojwe ihene

Aha hatahwaga inzu yubakiwe Nzaramba Fidèle utari ufite aho aba

@Rebero.rw

About The Author