Aha ni Gikondo kuri Merez ya Kabiri aho babwiwe kwerekeza ko nta kibazo cya bateri gihari ariko basanze nta tandukaniro naho bari basanzwe bazifatira
Kigali – Bamwe mu bamotari batwara moto z’amashanyarazi za Spiro baravuga ko bahangayikishijwe n’ibibazo bahura na byo mu kubona bateri zisimbura izashizemo umuriro, bavuga ko bituma batakaza umwanya munini ndetse bikagabanya amafaranga binjiza ku munsi.
Aba bamotari bavuga ko hari igihe bamara amasaha bazenguruka ahatangirwa bateri bashaka izifite umuriro uhagije, nyamara bagasanga kubona bateri bitoroshye. Bavuga kandi ko hari aho bakeka ko bamwe mu bakozi bashinzwe gutanga bateri bazitanga hashingiwe ku kuba umukiriya yatanze amafaranga y’inyongera cyangwa afite uwo aziranye na we.
Umwe mu bamotari yagize ati: “Hari igihe ugera aho bahindurira bateri ugasanga nta bateri yuzuye ihari, cyangwa bakagusaba gutegereza igihe kirekire. Hari n’abavuga ko uwatanze amafaranga cyangwa ufite uwo aziranye ari we uhabwa serivisi mbere.”
Ikindi kibazo aba bamotari bagaragaza ni uko bateri zikoreshwa ziri mu byiciro bitandukanye, zirimo izanditseho ikirango cya Spiro, izizwi nk’iz’ibati ndetse n’izishya. Bavuga ko uburyo bwo kuzisimbuza budaha umukiriya uburenganzira bwo gufata bateri iboneka ifite umuriro mwinshi kurusha izindi.
Aba bamotari bavuga ko iyo umuntu yagejeje bateri y’icyiciro runaka, ahabwa indi yo muri icyo cyiciro gusa, kabone n’iyo haba hari izindi zifite umuriro mwinshi cyangwa zimeze neza kurushaho. Basaba ko hashyirwaho uburyo butuma umuntu ahabwa bateri yuzuye ibonetse yose, kuko zose ari umutungo wa Spiro kandi zikora umurimo umwe.
Bagira bati: “Icyo dukeneye ni uko twajya duhabwa bateri yuzuye ibonetse, aho kugendera ku bwoko bwa bateri watanze. Ibyo byatuma serivisi irushaho kunoga kandi tukongera igihe tumara dukora.”
Basaba kandi ubuyobozi bwa Spiro gukora igenzura ku bikorwa by’abakozi batanga bateri, kugira ngo harebwe niba nta ruswa cyangwa favoritisme bikorwa mu gutanga serivisi.
Ibi bibazo bije mu gihe moto z’amashanyarazi zikomeje kwiyongera mu Rwanda, aho zifatwa nk’umusanzu mu kugabanya imyuka ihumanya ikirere no kugabanya ikiguzi cy’ibikomoka kuri peteroli.
Abamotari bavuga ko bashyigikiye gahunda yo gukoresha ibinyabiziga by’amashanyarazi, ariko bagasaba ko serivisi zo gusimbuza bateri zinozwa kugira ngo zibafashe gukora neza no kongera umusaruro.
Aba bamotari bavuga ko usibye ikibazo cyo kumara umwanya munini bashaka bateri ziboneka ku bigo byo kuzisimburizaho, hari n’ikibazo cyo guhabwa bateri zifite umuriro muke ugereranyije n’uwo baba bategereje.
Bagira bati: “Hari igihe baguha bateri itagejeje ku rugero rw’umuriro twari dusanzwe duhabwa. Ariko iyo igushiranye vuba ukagaruka gufata indi, wishyura nk’uwahawe bateri yuzuye. Ibyo bituma duhora duhendwa kandi tudakora urugendo rungana n’urwo twagombaga gukora.”
Aba bamotari bavuga ko iyo bateri idafite umuriro uhagije ibaha intera ngufi yo gukora, bikabaviramo kugaruka kenshi ku bigo bisimburizwaho bateri no gutakaza abakiliya.
Ikindi basaba ni uko niba bateri ituzuye yahawe umukiriya, amafaranga yishyura cyangwa uburyo bwo kuyikoresha byajya bihuzwa n’urwego rw’umuriro yayihereweho, aho kwishyura kimwe n’uwahawe bateri yuzuye ku kigero cya 100%.
Abamotari bavuga ko bishimiye gahunda yo gukoresha moto z’amashanyarazi kubera uruhare rwayo mu kurengera ibidukikije no kugabanya ikiguzi cya lisansi, ariko bagasaba ko serivisi zo gusimbuza bateri zarushaho kunozwa kugira ngo zibafashe gukora neza no kongera umusaruro.
Twagerageje kuvugisha ubuyobozi bwa Spiro kugira ngo bugire icyo buvuga kuri ibi bibazo, ariko kugeza ubu ntibwari bwadusubiza. Nitubona uruhande rwabo turarutangaza.
@Rebero.rw
About The Author
