Nyuma y’uko Perezida wa Kenya, William Ruto, ategetse ko ibikorwa byo kugenzura no guhangana n’abimukira badafite ibyangombwa byongerwamo imbaraga, bamwe mu banyamahanga bari muri iki gihugu batangiye gushaka inzira zibasubiza mu bihugu bakomokamo.
Amakuru atangwa agaragaza ko bamwe mu bantu bari mu bice bitandukanye bya Kenya bagiye ku mirongo no ku masite abategurirwaho ingendo, bashaka uburyo bwo gusubira iwabo nyuma yo gukaza igenzura ry’abimukira badafite ibyangombwa.
Bamwe muri abo baturage bavuga ko baturuka mu Burundi, mu gihe ibikorwa byo kugenzura abimukira bikomeje gukorwa n’inzego z’umutekano n’izishinzwe abinjira n’abasohoka muri Kenya.
Izi ngamba zije mu gihe ubuyobozi bwa Kenya bukomeje gushimangira ko abari mu gihugu bagomba kuba bafite ibyangombwa byemewe n’amategeko, ndetse ko abadafite uburenganzira bwo kuhaba bagomba gukurikiza amategeko agenga abinjira n’abasohoka.
Ku bantu bahisemo gusubira mu bihugu byabo, ingendo zabo zishobora gukorwa ku bushake cyangwa hakurikijwe uburyo bwashyizweho n’inzego zibishinzwe, bitewe n’imiterere y’ikibazo n’ibyangombwa bafite.
Ibikorwa byo gukaza igenzura ku bimukira bikomeje gukurura impaka ku bijyanye n’imicungire y’abinjira n’abasohoka, umutekano ndetse no kubahiriza uburenganzira bwa muntu.
Ubuyobozi bwa Kenya busaba abari muri iki gihugu kubahiriza amategeko agenga abimukira, mu gihe abadafite ibyangombwa basabwa gukorana n’inzego zibishinzwe kugira ngo ikibazo cyabo gikemurwe mu buryo bwubahiriza amategeko.
@Rebero.rw
About The Author
