U Burusiya na Koreya ya Ruguru byafunguye ku mugaragaro ikiraro cya mbere gihuza ibihugu byombi, igikorwa cyitezweho kurushaho guteza imbere ubuhahirane n’imikoranire hagati y’impande zombi.
Iki kiraro cyubatswe ku Mugezi wa Tumen, gihuza Umujyi wa Khasan mu Burusiya n’uwa Tumangang muri Koreya ya Ruguru.
Gifite uburebure bwa kilometero imwe, kikaba gifatwa nk’umushinga w’ingenzi mu guteza imbere ubwikorezi n’ubucuruzi hagati y’ibihugu byombi.
Ikiraro gifite ubushobozi bwo kwakira abantu barenga 2,000 ndetse n’imodoka zigera kuri 300 ku munsi, ibintu biteganyijwe ko bizoroshya urujya n’uruza rw’abantu n’ibicuruzwa hagati y’U Burusiya na Koreya ya Ruguru.
Abayobozi b’ibihugu byombi biteze ko iki kiraro kizagira uruhare mu kongera ibikorwa by’ubucuruzi, koroshya gutwara ibicuruzwa no guteza imbere imibanire y’ubukungu hagati y’impande zombi.
U Burusiya na Koreya ya Ruguru bisanzwe bifitanye umubano wa hafi, ndetse mu myaka ya vuba ibihugu byombi byakomeje kongera ubufatanye mu nzego zitandukanye.
Gufungura iki kiraro ku mugaragaro rero bibaye indi ntambwe mu kongera imikoranire hagati y’ibihugu byombi, cyane cyane mu bijyanye n’ubucuruzi, ubwikorezi n’itumanaho ryambukiranya imipaka.
Iki kiraro kandi giteganyijwe gutanga ubundi buryo bwo guhuza ibikorwa by’ubukungu hagati y’uturere duhana imbibi, bityo kikagira uruhare mu kuzamura ubuhahirane n’urujya n’uruza hagati y’U Burusiya na Koreya ya Ruguru.
@Rebero.rw
About The Author
