Rutsiro: ADEPR yishyuriye abaturage 667 miliyoni 2 ya mituweli mu giterane cyo kurwanya amakimbirane mu miryango

Mu giterane cy’ivugabutumwa  cy’ubukangurambaga bwo  kurwanya amakimbirane mu miryango,inzoga z’ibyuma,ibiyobyabwenge mu rubyiruko n’imyitwarire mibi cyabaye ku wa gatandatu tariki ya 12 Nzeri,2026 ku bufatanye bw’Akarere ka Rutsiro n’itorero ADEPR,iri torero ryashyikirije ubuyobozi bw’aka karere sheki ya miliyoni 2 yo kwishyurira mituweli imiryango 667.

 Cyabereye kuri sitade ya Mukebera ,Umurenge wa Mushubati,cyitabirwa  n’abayobozi batandukanye barimo Meya  Kayitesi Dative, n’umwungirije ushinzwe imibereho myiza y’abaturage, Umuganwa Marire Chantal,gifite intego igira iti’’Umuryango utekanye ni ishingiro ry’iterambere ryihuse.’’

Nk’uko Rebero.rw yabitangarijwe n’umushumba wa ADEPR paruwasi ya Rutsiro, Rév.past.Bizimana Kazungu Charles,cyateguwe nyuma  yo kubona imanza nyinshi z’ubutane mu nkiko,n’izindi ngaruka z’amakimbirane mu miryango zirimo kwamburana ubuzima,babona,nk’abakozi b’Imana bagomba kugira icyo bakora mu kurengera umuryango nyarwanda wugarijwe.

Umushumba wa ADEPR Rutsiro, Rév.past. Bizimana Kazungu Charles ashimira abitanze bose ngo ariya mafaranga 2.000.000 yo kwishyura mituweli abantu 667 aboneke.

Ati’’ Twafashe umwanya wo gusenga no gutekereza,twegera ubuyobozi bw’Akarere dutegura iki giterane tugamije guharanira umuryango utekanye. Cyabanjirijwe n’ubukangurambaga bw’aho dutuye mu midugudu tuganira ku bibangamira umuryango n’icyakorwa ngo amakimbirane ahashywe, abawugize babeho batekanye.’’

Yakomeje ati’’ Muri iki gihe umuryango nyarwanda urimo ubutane bukabije. Ni yo mpamvu nk’itorero  tugomba guhaguruka tukamagana ikibutera,tugaharanira ko imiryango ibana  neza,ni bwo n’iterambere ryakwihuta.’’

Umuyobozi w’Akarere ka Rutsiro wungirije ushinzwe imibereho myiza y’abaturage,Umuganwa Marie Chantal yagarutse ku ngaruka 10 z’amakimbirane mu miryango zirimo gusenya ubumwe n’urukundo by’abashakanye,ihohoterwa rinavamo imfu aho yatanze urugero rw’ umugore wo mu Murenge wa Musasa muri aka karere uherutse kwiyicira umugabo, ubukene bukabije mu miryango ikimbiranye n’ibindi.

Umuyobozi w’Akarere ka Rutsiro wungirije ushinzwe imibereho myiza y’abaturage Umuganwa Marie Chantal yagaragaje ingaruka 10 z’amakimbirane mu miryango zirimo gusenya ubumwe n’urukundo by’abashakanye.

Ati’’ Birababaje cyane kubona abantu bashakana bavuga ko bakundanye, mu bukene bagasangira ubusa bakihangana,bakabana mu mahoro,bagira icyo babona ugasanga ari ho batangira guterana hejuru.’’

Yongeyeho ati’’ Muri iyi minsi turabona abana badashaka kubaho. Tugira imfu nyinshi z’abakiri bato biyahura,abandi barangwa n’agahinda gakabije,abata amashuri,n’ibindi,wakurikira ugasanga impamvu muzi ari amakimbirane mu muryango. Ni yo mpamvu guhagurukira rimwe tukayarwanya  ari ngombwa cyane.’’

Ndayambaje Joseph  waturutse mu karere ka Musanze,watanze ubuhamya, yavuze uburyo yamaranye n’umugore we imyaka myinshi mu bukene  bukabije,bishyurirwa mituweli  na Leta,aho yari umupagasi, bamara gutera imbere,umugore akamutana abana abandi akabajyana hanze y’igihugu, akagaruka nyuma y’imyaka 5, akamwakira abaturanyi bumva  bitashoboka, ubu umwaka umwe amaze agarutse akamubabarira bagasubirana,iterambere ritangiye kugaruka.

Ndayambaje Joseph watanze ubuhamya bw’ingaruka yatewe n’amakimrane mu muryango we, yasabye abashakanye kunoza imibanire ngo bagere ku iterambere rirambye.

Ati’’ Twari twavuye mu cyiciro cy’abatindi Imana itugiriye neza,amangazini y’agaciro k’arenga 8.000.000 abonetse,ibiryo bihari,inzaraishize, muri 2020 antana abana atwara abandi ajya mu Bugande ahitwa Kasese. Nakoresheje arenga 5.000.000 ngo mugarure,aza muri 2023, ataramara n’ukwezi nsanga yajyanye abandi bana 2 hamwe n’abo 2 yari yajyanye mbere yasubiranyeyo,abajyana muri Sudani, nsigarana impanga,ubuzima burasharira. Ubwo nari umuvugabutumwa muri ADEPR.’’

Avuga ko yarwanye urugamba rukomeye mu muryango we bamusaba gushaka undi mugore arabyanga kubera ijambo ry’Imana ryo kwihangana yari yaramenye, muri Nzeri 2025 abona umugore abungukanye n’abo bana 4 aje kumusaba imbabazi.

Ati’’ Nta wiyumvishaga ko namubabarira ariko ubutumwa bwo kwihangana no kubabarira nari narahaye abandi nagombaga kuba  uwa mbere uburinda. Naramubabariye bitangaza benshi kuko nari nzi ingaruka ziri mu gushaka abagore benshi. Sogokuru yari yarashatse abagore 7, data ashaka 2, nkumva ntayoboka izo nzira.’’

Basabwe gusengera Imiryango ibanye nabi igahinduka.

Avuga ko ubu babanye neza, iterambere ryari ryaradindiye ryagarutse,agasaba abashakanye kurwanya no gukumira icyabacamo ibice, aho bahuye n’ikibazo bakamenya kugicoca mu mahoro.’’

Mukaniyonsaba Béata witeje imbere akanabihererwa ibihembo muri 2015 abikesha gusenga no kubana neza n’umugabo we, yahaye ikiganiro imbaga yari iteraniye muri sitade ya Mukebera, avuga ko yatangiye kwikorera muri 2006, ubu akaba ari mu bagore bihagazeho ku ifaranga abikesha urugo rwiza.

Mukaniyonsaba Beata watanze ubuhamya bw’uburyo yazamutse mu iterambere,yavuze ko abikesha gusenga n’umutuzo mu muryango we.

Ati’’ Ubu naguriye ibikorwa  mu karere ka Karongi,ndi umugore ugira uruhare rukomeye cyane mu iterambere ry’urugo rwanjye. Mbikesha kujya inama n’umugabo wanjye, umuryango utekanye no gusenga,ari byo mwese mbifuriza.’’

Umuyobozi w’Akarere ka Rusiro, Kayitesi Dative,avuga ko umurengwe ari wo utera amakimbirane mu miryango myinshi. Ati’’ Umurengwe ni wo utera amakimbirane. Iyo umaze kuturenga twumva abo twashakanye batakitubereye. Utazi Imana ntanamenya icyerekezo cye. Ni we uhora abomborana,ariko iyo uzi icyerekezo cy’ubuzima bwawe urabubungabunga.’’

Avuga ko muri aka karere habarurwa imiryango 520  ikiri mu makimbirane, ko,ku bufatanye n’itorero ADEPR ashimira cyane,n’andi madini n’amatorero, bari kuyegera ngo isubize agatima impembero ibane neza. Iyo  binaniranye igirwa inama yo kugana inkiko aho kugera ku kwamburana ubuzima.

Muri iki giterane itorero ADEPR ryashyikirije ubuyobozi bw’Akarere ka Rutsiro sheki ya miliyoni 2 yo kwishyurira 667 mituweli. Ni igikorwa cyashimishije cyane Meya Kayitesi Dative.

Umuyobozi w’Akarere ka Rutsiro, Kayitesi Dative yashimiye cyane abakirisito ba ADEPR Rutsiro bishyuriye mituweli bagenzi babo

Ati’’ Biradushimishije cyane. Aya mafaranga avuye mu bwitange bw’Abakirisito ubwabo. Bigaragaza uburyo ubumwe ari imbaraga,abishyize hamwe nta kibananira. ADEPR dufatanya muri byinshi birimo kubakira abatishoboye, ubufatanye mu bumwe n’ubudaheranwa bw’abanyarwanda n’ibindi. N’ibi biterane bizakomeza.’’

Yanashimiye n’andi madini n’amatorero akorera muri aka karere uburyo yahagurukiye gufasha mu   kuzamura imibereho y’abaturage,cyane cyane  kurwanya ibiyobyabwenge mu rubyiruko,amakimbirane n’ibindi byangiza umuryango, ayasaba  gukomereza muri uwo mujyo.

Umwaka ushize warangiye Rutsiro iri kuri 99,8% muri mituweli. Ubu iri kuri 68% by’abishyuye 100%. Meya Kayitesi Dative avuga ko uyu mubare ukiri hasi agasaba  uruhare rwa buri wese mu kuwuzamura.

Umushumba wa ADEPR Rutsiro,Rév.past Bizimana Kazungu Charles,ashimira cyane abakirisito be bakusanyije ubu bushobozi ngo barengere ubuzima bwa bagenzi babo bari kuzarembera mu ngo igihe barwaye,akanashimira Akarere n’ubuyobozi bukuru bwa ADEPR imikoranire inoze, akanizeza ikomeza ry,ubu bukangurambaga mu mirenge isigaye y’aka karere.

@Rebero.rw

About The Author