Mu gihe u Rwanda n’ibindi bihugu bikomeje guhangana n’izamuka ry’indwara zitandura zirimo diyabete, umuvuduko ukabije w’amaraso, indwara z’umutima ndetse n’umubyibuho ukabije, hari abakomeje kugaragaza impungenge ku ruhare rwo kwamamaza cyane ibicuruzwa bimwe na bimwe bishobora kugira mu guhindura imyitwarire y’ababikoresha.
Mu mijyi itandukanye no ku mihanda minini, usanga hari ibyapa byinshi byamamaza ibicuruzwa birimo amavuta atunganyijwe ndetse n’ibinyobwa birimo isukari nyinshi. Abasesenguzi bavuga ko kwamamaza bifite uruhare runini mu gushishikariza abantu kugura no gukoresha ibicuruzwa runaka, cyane cyane urubyiruko n’abana bakunze gukururwa n’amashusho n’ubutumwa buboneka kuri ibyo byapa.
Abahanga mu buzima bavuga ko nta kibazo kiri mu gukoresha ibicuruzwa nk’amavuta atunganyijwe cyangwa ibinyobwa bidasembuye bidafite inzoga iyo bikoreshejwe mu rugero. Icyakora, iyo bihindutse igice kinini cy’imirire ya buri munsi, bishobora kugira uruhare mu kongera ibyago byo kurwara indwara zitandura.
Ishami ry’Umuryango w’Abibumbye ryita ku Buzima (OMS/WHO) rikomeza gushishikariza ibihugu kugabanya ikoreshwa ry’isukari nyinshi, amavuta amwe n’amwe ndetse n’umunyu mwinshi mu mirire y’abaturage kugira ngo hagabanuke indwara zitandura zikomeje kwiyongera ku Isi.
Bamwe mu baharanira ubuzima bwiza bavuga ko hakwiye kubaho uburinganire hagati y’ubucuruzi n’ubuzima rusange. Bagaragaza ko mu gihe ibigo bishora amafaranga menshi mu kwamamaza ibicuruzwa byabyo, hakwiye no kongerwa ubukangurambaga busobanurira abaturage akamaro ko kurya indyo yuzuye no gukora imyitozo ngororamubiri.
Hari n’abasaba ko ubutumwa bwamamaza bwajya buherekezwa n’ubukangurambaga bwibutsa abaturage gukoresha ibyo bicuruzwa mu rugero, cyane cyane ibirimo isukari nyinshi n’amavuta menshi. Bemeza ko ibi byafasha abantu gufata ibyemezo byubakiye ku makuru ahagije ku buzima bwabo.
Ku ruhande rw’inzego z’ubuzima, zikomeje kwibutsa abaturage ko kwirinda indwara zitandura bidashingiye ku kwirinda igicuruzwa kimwe gusa, ahubwo bishingira ku mibereho muri rusange irimo kurya indyo yuzuye, gukora imyitozo ngororamubiri buri gihe, kwirinda itabi no kunywa inzoga mu rugero.
Prof Mucumbitsi Joseph Muganga w’abana uvura indwara y’umutima umuyobozi w’ihuriro ry’imiryango irwanya indwara zitandura (Rwanda NCD Alliance) mu Rwanda no mu Karere, yagize icyo avuga kuri ibyo byapa byamamaza.
Agira ati: “Muri ayo mavuta yamamazwa ku byapa hari intungamubiri zitari nziza ateza imbere, niyo mpamvu abashyiraho ibyo byapa bagombye kuba bafite aho basaba rushushya rwo gukora ibyo byapa bazi ibyerekeye ubuzima (RBC) yagombye kuba izi ibyamamazwaho ku muhanda cyane cyane ibijyanye n’imirire n’ibyo kunnywa, kuko ibinyobwa byose birimo isukari nyinshi nabyo byongera indwara zitandura”.
Yakomeje avuga ko hari byinshi bikorwa ndetse byamamazwa byangiza ubuzima bw’abantu niyo mpamvu nk’umuryango utegamiye kuri Leta (Rwanda NCD Alliance) barabivuga ariko hagombye kuba Serivice ibemerera nyuma yo kugenzura ko ntacyo byangiza ku buzima bw’abantu.
Mu gihe ibikorwa byo kwamamaza bikomeje kwaguka no kugera ku bantu benshi, impaka ku ruhare rwabyo mu myitwarire y’abaguzi no ku ngaruka bishobora kugira ku buzima rusange zikomeje gufata indi ntera, aho benshi basaba ko inyungu z’ubucuruzi zajyana n’intego zo kubungabunga ubuzima bw’abaturage.
Abahanga mu buzima bavuga ko kugira ibinure byinshi mu mubiri, cyane cyane ibinure bibi (bad cholesterol), bishobora kongera ibyago byo kurwara indwara zitandura zirimo umuvuduko ukabije w’amaraso, indwara z’umutima n’imiyoboro y’amaraso ndetse n’izindi ndwara zifitanye isano n’imirire. Bagaragaza ko kurya indyo ituzuye irimo amavuta menshi no kudakora imyitozo ngororamubiri ari bimwe mu bituma ibyo byago byiyongera.
Ikigo cy’Igihugu cy’Ubuzima (RBC) gisanzwe gishishikariza Abanyarwanda kurya indyo yuzuye kandi iboneye, kugabanya isukari, umunyu n’amavuta birenze urugero, gukora imyitozo ngororamubiri no kwirinda ibindi bishobora kongera ibyago byo kurwara indwara zitandura. RBC igaragaza ko impinduka mu mibereho no mu mirire ari imwe mu ngamba zikomeye zo gukumira indwara zirimo diyabete, umuvuduko ukabije w’amaraso n’indwara z’umutima.
@Rebero.rw
About The Author
