Abateguye uyu mushinga bavuga ko uzagira uruhare rukomeye mu kugabanya ikoreshwa ry’inkwi mu mashuri
Mu rwego rwo gukomeza ibikorwa byo kurengera ibidukikije no kugabanya ikoreshwa ry’inkwi mu bigo by’amashuri, Ishami ry’Umuryango w’Abibumbye ryita ku Bimukira (IOM), ku nkunga ya Guverinoma y’u Buyapani, ryubatse ibigega bya gaz itekeshwa mu bigo birindwi by’amashuri byo mu turere twa Musanze na Gakenke.
Kuri uyu wa Kabiri, tariki ya 28 Nyakanga 2026, ibi bigega biramurikirwa ku mugaragaro ku Ishuri rya GS Saint Jerome Janja mu Karere ka Gakenke. Uyu muhango witabiriwe n’Ambasaderi w’u Buyapani mu Rwanda, abayobozi ba Guverinoma y’u Rwanda, abahagarariye IOM ndetse n’abafatanyabikorwa batandukanye.
Uyu mushinga ugamije gufasha ayo mashuri kuva ku gutekesha inkwi, bikagabanya itemwa ry’amashyamba, imyuka ihumanya ikirere ndetse no guteza imbere ikoreshwa ry’ingufu zisukuye mu gutegura amafunguro y’abanyeshuri.
Ibigega bya gaz byubatswe muri GS Saint Jerome Janja, APICUR, MIPC, Ecole des Sciences de Musanze, TSS Nemba, Janja TVET na ES Nyarutovu.
Abateguye uyu mushinga bavuga ko uzagira uruhare rukomeye mu kugabanya ikoreshwa ry’inkwi mu mashuri, bityo ukarinda amashyamba akomeje guhura n’ingaruka z’itemwa rikabije. Biteganyijwe kandi ko ikoreshwa rya gaz rizagabanya imyuka ihumanya ikirere iva mu gutwika inkwi no kunoza imibereho y’abakora mu bikoni by’amashuri.
IOM ivuga ko gushyigikira ikoreshwa ry’ingufu zisukuye biri mu bikorwa bigamije guteza imbere iterambere rirambye no gufasha abaturage guhangana n’ingaruka z’imihindagurikire y’ikirere.
Ku ruhande rwa Guverinoma y’u Buyapani, iyi nkunga igaragaza ubushake bwo gukomeza gufatanya n’u Rwanda mu bikorwa biteza imbere uburezi, kubungabunga ibidukikije no guteza imbere ikoranabuhanga rikoresha ingufu zitangiza ibidukikije.
Biteganyijwe ko uyu mushinga uzatanga urugero rwiza ku bindi bigo by’amashuri, ugafasha igihugu gukomeza urugendo rwo kwimakaza ikoreshwa ry’ingufu zisukuye no kugabanya ingaruka z’imihindagurikire y’ibihe binyuze mu kurengera umutungo kamere.
@Rebero.rw
About The Author
